އީރާނުން އެމެރިކާއަށް އެއްވެސް މެސެޖެއް ފޮނުވާފައި ނުވާނެ: އޮފިޝަލް
އީރާނުން އެމެރިކާއަށް މެސެޖެއް ފޮނުވި ކަމަށް ބުނެ މީޑިއާތަކުން ފަތުރާ ޚަބަރުތައް އެ ގައުމުގެ އޮފިޝަލަކު ވަނީ ދޮގުކުރައްވާފައި. އެ ގައުމުން އެމެރިކާއަށް އެއްވެސް މެސެޖެއް ފޮނުވާފައި ނުވާނެ ކަމަށާއި، އީރާނުގެ ސިފައިން ތިބީ ދިގުދެމިގެންދާ ހަނގުރާމައަކަށް ފުރިހަމައަށް ތައްޔާރުވެގެން ކަމަށްވެސް އެ އޮފިޝަލް ވިދާޅުވި. މިކަން ހާމަކޮށްފައިވަނީ އީރާނުން އެމެރިކާއަށް މެސެޖެއް ފޮނުވި ކަމަށް ބުނެ "އެކްސިއޯސް" ވެބްސައިޓުން ރިޕޯޓުކުރުމާ ގުޅިގެން.
އީރާނުން ފޮނުވާލި މިސައިލެއް އެރި އިމާރާތަކުން އަލިފާނާއި ދުން އަރަމުންދަނީ: މި ހާދިސާ ހިނގާފައިވަނީ 2025 ޖޫން 13 ވީ ހުކުރު ދުވަހު އިޒްރޭލުގެ މެދުތެރޭގެ ސިޓީއެއް ކަމަށްވާ ތެލް އަވީވްގައި. | ގެޓީ އިމޭޖަސް
ތެހެރާނުން އެމެރިކާއަށް މެސެޖެއް ފޮނުވާފައިވާ ކަމަށް މީޑިއާތަކުން ފަތުރަމުންދާ ޚަބަރުތައް އީރާނުގެ އޮފިޝަލަކު ކަނޑައެޅިގެން ދޮގުކުރައްވައިފިއެވެ.
އީރާނުގެ ތަސްނީމް ނިއުސް އެޖެންސީއަށް ބުރާސްފަތި ދުވަހު މައުލޫމާތު ދެއްވަމުން އެ ގައުމުގެ އޮފިޝަލަކު ވިދާޅުވީ، އީރާނުން އެމެރިކާއަށް އެއްވެސް މެސެޖެއް ފޮނުވާފައި ނުވާނެ ކަމަށާއި، އަދި އެމެރިކާގެ ފަރާތުން ފޮނުވާ މެސެޖުތަކަށް އީރާނުން ޖަވާބު ނުދޭނެ ކަމަށެވެ.
މީގެ އިތުރުން، އީރާނުގެ ހަތިޔާރު އެޅި ސިފައިން ތިބީ ދިގުދެމިގެންދާ ހަނގުރާމައަކަށް ފުރިހަމައަށް ތައްޔާރުވެގެން ކަމަށް އެ އޮފިޝަލް ވަނީ ތަކުރާރުކޮށް ވިދާޅުވެފައެވެ.
އީރާނުގެ އޮފިޝަލް މިހެން ވިދާޅުވެފައި މިވަނީ، ފާއިތުވި ދުވަސްތަކުގައި އީރާނުން އެމެރިކާއަށް މެސެޖެއް ފޮނުވާފައިވާ ކަމަށާއި ނަމަވެސް އެމެރިކާގެ ފަރާތުން އެއަށް ޖަވާބެއް ލިބިފައިނުވާ ކަމަށް ބުނެ "އެކްސިއޯސް" ވެބްސައިޓުން ރިޕޯޓުކޮށްފައި ވަނިކޮށެވެ.
