އީރާނުން އެމެރިކާގެ ސީ.އައި.އޭ އާ ވާހަކަދައްކަން ތައްޔާރަށް އޮތް ކަމަށް ބުނެ ފެތުރީ ދޮގު ޚަބަރެއް
ހަނގުރާމަ ހުއްޓާލުމުގެ މަޝްވަރާއަށް އީރާނުގެ އިންޓެލިޖެންސުން ސީ.އައި.އޭ އާ ބައްދަލުކުރަން އުޅޭކަމަށް ބުނެ ފަތުރާ ޚަބަރުތައް އެ ގައުމުން ދޮގުކޮށްފި. މިއީ އެމެރިކާގެ މާޔޫސްކަން ހާމަވާ ފަދަ ނަފްސާނީ އޮޕަރޭޝަނެއް ކަމަށާއި، ދުޝްމަނުންނަށް ހައްގު އަދަބު ދިނުމުގައި އީރާނުން ފަސްނުޖެހޭނެ ކަމަށް އެ ގައުމުގެ އިންޓެލިޖެންސް މިނިސްޓްރީން ބުނޭ.
އިޒްރޭލަށް އަމާޒުކޮށް ފޮނުވާލި ހަމަލާތަކުގެ އިންޒާރުގެ ރަނގަބީލާއެކު، އެ ގައުމުގެ ޝޯރޭޝް ސަރަހައްދުގައި ތިބި މީހުން ރައްކާތެރިކަން ހޯދުމަށް ބިންގަރާހެއްގެ ތެރެއަށް ވަދެ ފިލާފައި. | ރޮއިޓާސް
އީރާނުގެ އިންޓެލިޖެންސް ފޯސްތަކުން އެމެރިކާގެ ސެންޓްރަލް އިންޓެލިޖެންސް އެޖެންސީ (ސީ.އައި.އޭ) އާ ވާހަކަދެއްކުމަށް ތައްޔާރަށް އޮތް ކަމަށް ބުނެ ނިއުޔޯކް ޓައިމްސް އިން ދާދިފަހުން ޝާއިއުކުރި ރިޕޯޓަކީ މުޅިން ދޮގު ރިޕޯޓެއް ކަމަށް ކަމާބެހޭ މައުލޫމާތު އެނގޭ މަސްދަރަކުން ތަސްނީމް ނިއުސް އެޖެންސީއަށް ކަށަވަރުކޮށްދީފިއެވެ.
އީރާނުގެ އިންޓެލިޖެންސް މިނިސްޓްރީގެ އިސް މަސްދަރަކުން ބުދަ ދުވަހު ބުނީ، މިހާރު ހިނގަމުންދާ ހަނގުރާމަ ހުއްޓާލުމުގެ މަގުސަދުގައި ސީ.އައި.އޭ އާއެކު މަޝްވަރާތައް ފެށުމަށް އީރާނުގެ އިންޓެލިޖެންސް ފޯސްތަކުން ޝައުގުވެރިކަން ފާޅުކޮށްފައިވާ ކަމަށް ބުނެ ނިއުޔޯކް ޓައިމްސް އިން ފަތުރާފައިވާ ޚަބަރަކީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ. އަދި މިއީ ހަނގުރާމައިގެ ވަގުތުގައި ހިންގާ ނަފްސާނީ އޮޕަރޭޝަނެއްގެ ބައެއް ކަމަށްވެސް އެ މަސްދަރުން ބުނެފައިވެއެވެ.
މީގެ އިތުރުން، ދުޝްމަނުންނަށް ހައްގު އަދަބު ދިނުމުގައި އީރާނުން ފަސްނުޖެހޭނެ ކަމަށް އެ މަސްދަރުން ވަނީ ބުނެފައެވެ. އަދި މިފަދަ ދޮގު ޚަބަރުތައް ފެތުރުމުން ދޭހަވަނީ، އަސްކަރީ މައިދާނުގައި އެމެރިކާގެ މާޔޫސްކަން އިތުރުވަމުންދާ މިންވަރު ކަމަށްވެސް އެ މަސްދަރުން ފާހަގަކުރިއެވެ.
މަސްދަރު: ތަސްނީމް ނިއުސް އޭޖެންސީ
