ގަލްފް ސަރަހައްދުގައި ހުރި އެމެރިކާގެ އެންމެ ބޮޑު ޑޭޓާ ސެންޓަރަށް އީރާނުން ހަމަލާދީފި
އިޒްރޭލާއި އެމެރިކާއިން އީރާނަށް ދިން ހަމަލާތަކުގެ ބަދަލުހިފުމުގެ ގޮތުން އައިއާރުޖީސީން ކުރިއަށްގެންދާ އޮޕަރޭޝަނުގައި، އިޒްރޭލުގެ ދިފާއީ ވުޒާރާއާއި ބެން ގޫރިއަން އެއާޕޯޓުގެ އިތުރުން އެމެރިކާގެ އަސްކަރީ މަނަވަރުތަކަށް ވަނީ ހަމަލާދީފައި. މި ހަމަލާތަކުގައި ދުޝްމަނުންގެ ރޭޑާރު ސިސްޓަމްތަކާއި ބަހްރޭންގައި ހުންނަ އެމެޒޯންގެ އެންމެ ބޮޑު ޑޭޓާ ސެންޓަރު ގޮއްވާލާފައިވާކަމަށް އީރާނުން ބުނޭ. ކުރިއަށް އޮތް ދުވަސްތަކުގައި މި ހަމަލާތައް އިތުރަށް ވަރުގަދަކުރާނެ ކަމުގެ އިންޒާރުވެސް އައިއާރުޖީސީން ވަނީ ދީފައި.
މާރިޗު 4، 2026 ގައި ނަގާފައިވާ މި ފޮޓޯއިން ފެންނަނީ، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން އިޒްރޭލުން އިސްތިއުމާރުކޮށްފައިވާ ސަރަހައްދުތަކަށް ދިން ރައްދު ހަމަލާތަކަށްފަހު އެ ސަރަހައްދުގެ ހާލަތު އޮތް ގޮތް. | ޕްރެސްޓީވީ
އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އިޒްރޭލާއި އެމެރިކާގެ ޓާގެޓްތަކަށް އަމާޒުކޮށް މުޅި ސަރަހައްދުގައި ކުރިއަށްގެންދާ "އޮޕަރޭޝަން ޓްރޫ ޕްރޮމިސް 4" ގެ 17 ވަނަ މަރުހަލާ ފަށާފައިވާކަން އިއުލާންކޮށްފިއެވެ.
އިޒްރޭލުގެ ތެލް އަވީވާއި އެމެރިކާއިން އީރާނަށް ދިން ހަމަލާތަކުގެ ބަދަލުހިފުމުގެ ގޮތުން ފެށި މި އޮޕަރޭޝަނަށް ފަސް ދުވަސް ފުރުނުއިރު، އައިއާރުޖީސީން މިކަން ހާމަކޮށްފައިވަނީ ބުދަ ދުވަހު ނެރުނު ބަޔާނެއްގައެވެ.
އެ ބަޔާނުގައި ވާގޮތުން، އެމެރިކާއާއި އިޒްރޭލުން ބޭނުންކުރާ އެންމެ ޒަމާނީ ހަތް ރާޑަރު ސިސްޓަމް ކާމިޔާބުކަމާއެކު ގޮއްވާލުމާ ގުޅިގެން، މި ސަރަހައްދުގައި އެމެރިކާއާއި ޒަޔަނިސްޓް އިޒްރޭލުން ބޭނުންކުރާ "ލޯތައް" މިހާރު ވަނީ ކަނުކޮށްލެވިފައި ކަމަށް ބުނެފައިވެއެވެ.
މީގެއިތުރުން، އިޒްރޭލުގެ ދިފާއުގައި އެމެރިކާއިން ގާއިމުކޮށްފައިވާ "ތާޑް" (THAAD) މިސައިލް ސިސްޓަމް ފޫއަޅުވާލުމަށްފަހު، އިޒްރޭލުގެ މިނިސްޓްރީ އޮފް ވޯ (ދިފާއީ ވުޒާރާ) ހުންނަ އިމާރާތަށާއި، އެ ގައުމުގެ އެންމެ ބާރުބޮޑު ވައިގެ ބަނދަރު ކަމަށްވާ ބެން ގޫރިއަން އެއާޕޯޓަށް ހަމަލާދީފައިވާކަން ވެސް އެ ބަޔާނުގައި ފާހަގަކޮށްފައިވެއެވެ.
މި އޮޕަރޭޝަން ކާމިޔާބުކަމުގެ ހެއްކަކީ، ފާއިތުވި 100 ގަޑިއިރުގެ ތެރޭގައި އިޒްރޭލުން ހިފާފައިވާ ބިންތަކުގައި މެދުނުކެނޑި ނުރައްކަލުގެ ސައިރަންގެ އަޑު އިވެމުންދިއުމާއި، އެ ގައުމުގައި ވަޒަންވެރިވެފައިވާ މީހުން ގިނަ ވަގުތުތަކެއް ވަންދެން ރައްކާތެރި ބަންކަރުތަކުގައި ތިބެން ޖެހުން ކަމަށް އައިއާރުޖީސީން ބުނެފައިވެއެވެ.
މިއީ ޓެރަރިސްޓް މުޖުރިމުންގެ ކިބައިން ހަރުކަށި ބަދަލުހިފުމަށްޓަކައި އީރާނުން ފޮނުވާލާ މިސައިލްތަކާއި ޑްރޯންތައް ވަރަށް ރޭވުންތެރިކަމާއެކު އަމާޒަށް ވާސިލުވަމުންދާކަމުގެ ހެއްކެއް ކަމަށްވެސް އެ ބަޔާނުގައިވެއެވެ.
އަދި ކުރިއަށް އޮތް ދުވަސްތަކުގައި މި ހަމަލާތައް މިހާރަށްވުރެ ވަރުގަދަވެ، ފުޅާވެގެންދާނެ ކަމަށްވެސް އައިއާރުޖީސީން އިންޒާރު ދީފައިވެއެވެ.
މި އޮޕަރޭޝަން ފެށީއްސުރެ މިހާތަނަށް އައިއާރުޖީސީން ވަނީ އެތައް ސަތޭކަ ބެލިސްޓިކް މިސައިލާއި ގޮވާތަކެތި ހަރުކޮށްފައިވާ ޑްރޯންތައް، މި ސަރަހައްދުގައި ހުރި މުހިންމު އަދި ސްޓްރެޓީޖިކް މުހިންމު އަމާޒުތަކަށް ފޮނުވާލާފައެވެ.
މި ހަމަލާތަކުގެ އަމާޒުތަކުގެ ތެރޭގައި ތެލް އަވީވާއި ގުދުސްގެ އިތުރުން، ކުވެއިތު، ބަހްރޭން އަދި ގަތަރު ފަދަ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކާއި މަސްލަހަތު ހިމެނޭ ތަންތަން ހިމެނެއެވެ.
މީގެއިތުރުން، އިންޑިއާ ކަނޑުގައި އޮތް އެމެރިކާގެ މަނަވަރެއް ކަމަށްވާ "އެބްރަހަމް ލިންކަން" އެއާކްރާފްޓް ކެރިއަރަށާއި، އެމެރިކާގެ ޑިސްޓްރޯޔަރަކަށް ވެސް އީރާނުން ވަނީ ހަމަލާދީފައެވެ.
އެމެރިކާއިން މި ސަރަހައްދުގައި ހިންގާ އެންމެ ބޮޑު "ޑޭޓާ ސެންޓަރު" އަށް ހަމަލާދިނުން
ބުދަ ދުވަހު އައިއާރުޖީސީން ވަނީ މި ސަރަހައްދުގައި ހުރި އެމެރިކާގެ އެންމެ ބޮޑު ޑޭޓާ ސެންޓަރަށް "ވަރުގަދަ ހަމަލާއެއް" ދީފައިވާކަންވެސް އިއުލާންކޮށްފައެވެ.
އެއީ ބަހްރޭންގައި ހުންނަ އެމެޒޯންގެ ޑޭޓާ ސެންޓަރުކަން ހާމަކުރަމުން އައިއާރުޖީސީން ބުނީ، އެ ތަނަށް ހަމަލާދިނީ ދުޝްމަނުންގެ އަސްކަރީ އަދި ޖާސޫސީ ހަރަކާތްތަކަށް އެ ސެންޓަރުތަކުން އެހީތެރިކަން ފޯރުކޮށްދޭ މިންވަރު ދެނެގަތުމަށްފަހު ކަމަށެވެ.
އެމެޒޯންގެ ރަސްމީ ރިޕޯޓުތަކާ ހަވާލާދީ އީރާނުން ބުނެފައިވަނީ، މި ހަމަލާގެ ސަބަބުން އެ ސެންޓަރަށް ބޮޑެތި ގެއްލުންތަކެއް ލިބިފައިވާ ކަމަށެވެ.
2019 ވަނަ އަހަރު ބަހްރޭންގައި ހުޅުވި އެމެޒޯންގެ ސަރަހައްދީ އޮފީހަކީ، ޕާޝިއަން ގަލްފްގެ ގައުމުތަކަށާއި ހުޅަނގު އޭޝިއާގެ އެހެން ސަރަހައްދުތަކަށް އެމެޒޯންގެ ކްލައުޑް ސާވިސް ފޯރުކޮށްދޭ މައި މަރުކަޒެވެ.
