އިޒްރޭލާ ގުޅިގެން އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގައި މިހާތަނަށް އެމެރިކާގެ 500 އެއްހާ ސިފައިން މަރުވެއްޖެ
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލަރީޖާނީ ވިދާޅުވީ، އިޒްރޭލާއި ގުޅިގެން އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގައި އެމެރިކާގެ 500 އަށްވުރެ ގިނަ ސިފައިން މަރުވެފައިވާ ކަމަށް. އީރާނުގެ ރޫހާނީ ލީޑަރު އަވަހާރަކޮށްލުމުގެ ބަދަލުހިފުމަށް ދެމުންދާ މި ހަމަލާތަކުގެ ސަބަބުން އެމެރިކާގެ އަސްކަރީ މަރުކަޒުތަކަށް ބޮޑެތި ގެއްލުންތަކެއް ލިބެމުންދާކަން އޭނާ ފާހަގަކުރެއްވި. އަދި މި އުދުވާނަށް ހައްގު އަދަބު ލިބެންދެން ބަދަލުހިފުމުގެ އޮޕަރޭޝަންތައް މެދުނުކެނޑި ކުރިއަށްދާނެ ކަމަށްވެސް ލަރީޖާނީ ވިދާޅުވި.
2026 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހު ތެލްއަވީވަށް އީރާނުން ދިން މިސައިލް ހަމަލާއަކާ ގުޅިގެން، އެ ސިޓީގެ އުޑުމަތިން ބޮޑު އަލިފާންގަޑެއް ފެންނަނީ. | ގެޓީ އިމޭޖަސް
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ހަނގުރާމަވެރި ސިޔާސަތުތަކުގެ ސަބަބުން، އެމެރިކާގެ ރައީސް ޑޮނަލްޑް ޓްރަމްޕް އީރާނާ ދެކޮޅަށް ފެއްޓެވި ހަނގުރާމައިގެ ސަބަބުން އެމެރިކާއަށް ބޮޑެތި ގެއްލުންތަކެއް ލިބެމުންދާ ކަމަށް އީރާނުގެ ސަލާމަތީ ކަންތައްތަކާ ބެހޭ އިސްވެރިޔާ ވިދާޅުވެއްޖެއެވެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ސެކްރެޓަރީ އަލީ ލަރީޖާނީ ބުދަ ދުވަހު އެކްސްގައި ކުރެއްވި ޕޯސްޓެއްގައި ވިދާޅުވީ، ފެބްރުއަރީ މަހުގެ 28 ވަނަ ދުވަހުން ފެށިގެން އިޒްރޭލާ ގުޅިގެން އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގައި މިހާތަނަށް އެމެރިކާގެ 500 އެއްހާ ސިފައިން މަރުވެފައިވާ ކަމަށެވެ.
ލަރީޖާނީ ވިދާޅުވީ މި ބޮޑު ގެއްލުމުގެ ސަބަބުން، ޓްރަމްޕް ގެންގުޅުއްވާ "އެމެރިކާ ފަސްޓް" ނުވަތަ އެމެރިކާ އިސްކުރުމުގެ ސިޔާސަތަކީ އޮޅުވާލުމެއްކަން ހާމަވެފައިވާ ކަމަށެވެ.
"ނަތަންޔާހޫގެ ކޮމެޑީ ޑްރާމާގެ މަޅީގައި ޖެހިވަޑައިގެން، ރައީސް ޓްރަމްޕް ވަނީ އެމެރިކާގެ ރައްޔިތުން އީރާނާ ދެކޮޅަށް ކުރާ ބޭއިންސާފު ހަނގުރާމައެއްގެ ތެރެއަށް ވައްދާފައި. މިދިޔަ މަދު ދުވަސްކޮޅުގެ ތެރޭގައި އެމެރިކާގެ 500 އަށްވުރެ ގިނަ ސިފައިން މަރުވެފައިވާއިރު، މިހާރު ޓްރަމްޕް ހިސާބު ޖައްސަވަންވީ އަދިވެސް އިސްކަންދެވެނީ އެމެރިކާއަށްތޯ ނުވަތަ އިޒްރޭލަށްތޯ،" ލަރީޖާނީގެ ޕޯސްޓުގައި ވިދާޅުވެފައިވެއެވެ.
އީރާނުގެ އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އަވަހާރަކޮށްލުމުގެ ބަދަލުހިފުމަށް އީރާނުން ފަށާފައިވާ ފުޅާ އޮޕަރޭޝަންގެ ދަށުން، ދުޝްމަނުންނަށް މެދުނުކެނޑި ގެއްލުން ދެމުންދާނެ ކަމަށް އެސް.އެން.އެސް.ސީ ގެ ވެރިޔާ ވިދާޅުވިއެވެ. ޚާމަނާއީ އަވަހާރަކޮށްލާފައިވަނީ މިދިޔަ ހޮނިހިރު ދުވަހު އެމެރިކާ އާއި އިސްރާއީލުން ގުޅިގެން ދިން ވައިގެ ހަމަލާއެއްގައެވެ.
"މިކަން އަދި ނިމުނީއެއް ނޫން. އިމާމް ޚާމަނާއީ ޝަހީދުކޮށްލުމުގެ ބަދަލުގައި ކަލޭމެންނަށް ވަރަށް ބޮޑު އަގަކުން އަގުދައްކަން ޖެހޭނެ. މާތްﷲ އިރާދަކުރެއްވިއްޔާ،" ލަރީޖާނީ ވިދާޅުވިއެވެ.
މިދިޔަ ހަފުތާ ބަންދުން ފެށިގެން އީރާނުން ދަނީ އިޒްރޭލަށާއި، ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ބަދަލުހިފުމުގެ ހަމަލާތައް ސިލްސިލާކޮށް ދެމުންނެވެ.
މި ހަމަލާތަކުގެ ސަބަބުން އިޒްރޭލުން ހިފާފައިވާ ފަލަސްތީނުގެ ބިންތަކަށާއި، އީރާނާ އަވަށްޓެރި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް މީގެ ކުރިން ދުވަހަކުވެސް ނުލިބޭ ފަދަ ބޮޑެތި ގެއްލުންތަކެއް ވަނީ ލިބިފައެވެ.
އީރާނުގެ ކަމާބެހޭ ފަރާތްތަކުން ހާމަކޮށްފައިވާ ގޮތުގައި، މި ހަމަލާތައް ދެމުންދާނީ އިޒްރޭލާއި އެމެރިކާގެ އުދުވާނަށް ހައްގު އަދަބު ލިބެންދެނެވެ.
