ތެލުގެ އެއްވެސް ކަންބޮޑުވުމެއް ނެތް ކަމަށް ރައީސް ވިދާޅުވިތާ ދެ ދުވަސްތެރޭ އެސްޓީއޯއިން ވިއްކާ ޑީސަލާއި ޕެޓްރޯލްގެ އަގު ވަރަށް ބޮޑަށް ބޮޑުކޮށްފި
5 މާރިޗު 2026 | ބުރާސްފަތި 05:46ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން، އެސްޓީއޯ އިން ވިއްކާ ޕެޓްރޯލް ލިޓަރަކުން 2.51 ރުފިޔާ އަދި ޑީސަލް ލިޓަރަކުން 3.62 ރުފިޔާ ބުރާސްފަތި ދުވަހުން ފެށިގެން ވަނީ ބޮޑު ކޮށްފައި. މިއީ މެދުއިރުމަތީގެ ހަމަނުޖެހުންތަކާ ހުރެ ތެޔޮ ފީފާއެއްގެ އަގު 82 ޑޮލަރަށް އެރުމުން ގެނައި ބަދަލެއް ކަމަށްވާއިރު، މީގެ ސަބަބުން މުދަލާއި ޚިދުމަތުގެ އަގުތަކަށް ބަދަލު އަންނާނެ. އެސްޓީއޯގެ އިތުރުން ހޯކްސް ކުންފުނިން ވެސް މިހާރު ވަނީ ތެލުގެ އަގުތައް މަތިކޮށްފައި.
ޕެޓްރޯލް ޝެޑްގައި ޕެޓްރޯލް އެޅުމަށް ކިއު ހަދައިގެން. | ރާއްޖެއެމްވީ
އަގުހެޔޮ ތެލުގެ އައު ޝިޕްމަންޓެއް ރާއްޖެއަށް ދަތުރުކުރަމުންދާ ކަމަށް ރައީސް.ޑރ މުހައްމަދު މުއިއްޒު ސަރުކާރުގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވިތާ 24 ގަޑިއިރު ހަމަނުވަނީސް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ވިއްކާ ޑީސަލާއި ޕެޓްރޯލްގެ އަގު ވަރަށް ބޮޑަށް ބޮޑުކޮށްފި އެވެ.
އެސްޓީއޯ އިން ވިއްކާ ޑީސަލާއި ޕެޓްރޯލްގެ އަގު ބޮޑުކޮށްފައި މިވަނީ އެމެރިކާ އާއި އިޒްރޭލުން ގުޅިގެން އީރާންއަށް ހަމަލާ ދިނުމާއި އެކު އުފެދިފައިވާ ހަމަނުޖެހުމާއި ގުޅިގެން ދުނިޔޭގައި ތެލުގެ އަގުތައް ރެކޯޑް އަދަދަކަށް ބޮޑުވަމުންދާ ދަނޑިވަޅެއްގަ އެވެ. ތެޔޮ ސަޕްލައި ކުރަން ބޭނުންކުރާ މުހިންމު ޗެނަލެއް ކަމަށްވާ ހޮރްމުޒް ކަނޑުއޮޅި ވެސް އީރާނުން ވަނީ ބަންދުކޮށްފަ އެވެ. އެގޮތުން މިހާރު ދުނިޔޭގެ ބާޒާރުގައި ތެޔޮ ފީފާއެއްގެ އަގު ވަނީ 82 އެމެރިކާ ޑޮލަރަށް ބޮޑުވެފަ އެވެ.
މިކަމަށް ރިޔާއަތްކޮށް ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ސައީދު ވިދާޅުވީ، ތެލުގެ އައު ޝިޕްމަންޓެއް މިހާރުވެސް ރާއްޖެއަށް ދަތުރުކުރަމުންދާ ކަމަށާއި، މުދާ އުފުލާ ރޫޓުތަކަށް އެއްވެސް ހުރަހެއް ނެތް ކަމަށެވެ.
ނަމަވެސް އެސްޓީއޯއިން ބުނީ، ބުރާސްފަތި ދުވަހުން ފެށިގެން އެ ކުންފުނިން ވިއްކާ ޕެޓްރޯލާއި ޑީސަލްގެ އަގު ބޮޑުކުރަން ނިންމާފައިވާ ކަމަށެވެ.
އެގޮތުން މިހާރު ޕެޓްރޯލް ލިޓަރެއްގެ އަގަކީ 16.01 ރުފިޔާ އެވެ. މިއީ ލިޓަރަކުން 2.51 ރުފިޔާ ނުވަތަ 18.6 އިންސައްތައިގެ ބޮޑުވުމެކެވެ. އަދި މިހާރު ޑީސަލް ލިޓަރެއްގެ އަގު ވަނީ 17.54 ރުފިޔާ އަށް އުފުލިފަ އެވެ. ކުރިން ޑީސަލް ލީޓަރެއް 13.92 ރުފިޔާ އަށް ލިބެ އެވެ. މިއީ ލިޓަރަކުން 3.62 ރުފިޔާ ނުވަތަ 26 އިންސައްތައިގެ އިތުރުވުމެކެވެ.
މިއީ އެސްޓީއޯއިން ވިއްކާ ތެލުގެ އަގު މިފަހުން މިހާ ބޮޑުތަނުން ބޮޑުކުރި ފުރަތަމަ ފަހަރު ކަމަށްވާއިރު، މިކަމުގެ ސަބަބުން މުދަލާއި ޚިދުމަތުގެ އަގުތަކަށް ބަދަލު އަންނާނެ އެވެ.
މީގެ އިތުރުން ހޯކްސް އިން ވިއްކާ ޕެޓްރޯލާއި ޑީސަލްގެ އަގުތައް ވެސް ވަނީ ހަމަ އެ އަދަދުން ބޮޑު ކޮށްފަ އެވެ.
މީގެ ކުރިން ތެލުގެ އަގުތަކަށް ބަދަލުއައީ ރަޝިޔާ-ޔޫކްރެއިން ހަނގުރާމައާ ގުޅިގެންނެވެ. ނަމަވެސް 2023 ވަނަ އަހަރުން ފެށިގެން ތެލުގެ އަގުތައް އައީ ހެޔޮވަމުންނެވެ.
