ދޮޅުމަސް ތެރޭގައި 72 މިލިއަން ރުފިޔާގެ މަސްތުވާތަކެއްޗާއި، ދެ މިލިއަން ސިނގިރޭޓުގެ އިތުރުން 7،000 ވޭޕް އަތުލައިގަނެފި
މިނިސްޓަރު އިހުސާން ވިދާޅުވީ، ފާއިތުވި ދޮޅު މަހެއްހާ ދުވަހުގެ ތެރޭގައި ފުލުހުން އަދި ކަސްޓަމްސް ގުޅިގެން ހިންގި ތަފާތު އެކި އޮޕަރޭޝަންތަކުގެ ނަތީޖާއެއްގެ ގޮތުން 83،450 ގްރާމުގެ މަސްތުވާތަކެތި އަތުލައިގަނެފައިވާ ކަމަށް. މިއީ މަގުމަތީގެ އަގުން ބަލާނަމަ ގާތްގަނޑަކަށް 72.2 މިލިއަން ދިވެހި ރުފިޔާގެ މަސްތުވާތަކެތި ކަމަށް މިނިސްޓަރު އިހުސާން ވިދާޅުވި. މީގެ އިތުރުން މި މުއްދަތުގެ ތެރޭގައި 7،000 ވޭޕް ސްޓިކާއި ދެ މިލިއަނެއްހާ ސިނގެރޭޓް ވެސް ކަސްޓަމްސް އިން އަތުލައިގެންފައިވޭ.
ފުލުހުންގެ ބެލުމުގެ ދަށުގައި ހުރި 103 ކިލޯގެ މަސްތުވާތަކެތި ނައްތާލުމުގެ ތެރެއިން. ފައިލް ފޮޓޯ | ޕޮލިސް
ފާއިތުވި ދޮޅު މަހެއްހާ ދުވަހުގެ ތެރޭގައި ފުލުހުން އަދި ކަސްޓަމްސް ގުޅިގެން ކުރި މަސައްކަތުގެ ތެރެއިން 72 މިލިއަން ރުފިޔާގެ މަސްތުވާތަކެއްޗާއި، ދެ މިލިއަން ސިނގިރޭޓުގެ އިތުރުން 7،000 ވޭޕް އަތުލައިގަނެވިފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ، ފާއިތުވި ދޮޅު މަހެއްހާ ދުވަހުގެ ތެރޭގައި ފުލުހުން އަދި ކަސްޓަމްސް ގުޅިގެން ހިންގި ތަފާތު އެކި އޮޕަރޭޝަންތަކުގެ ނަތީޖާއެއްގެ ގޮތުން 83،450 ގްރާމުގެ މަސްތުވާތަކެތި އަތުލައިގަނެފައިވާ ކަމަށެވެ.
މިއީ މަގުމަތީގެ އަގުން ބަލާނަމަ ގާތްގަނޑަކަށް 72.2 މިލިއަން ދިވެހި ރުފިޔާގެ މަސްތުވާތަކެތި ކަމަށް މިނިސްޓަރު އިހުސާން ވިދާޅުވި އެވެ. މިނިސްޓަރު އިހުސާން ވިދާޅުވީ އޭގެ ތެރެއިން 72 ކިލޯގެ މަސްތުވާތަކެއްޗަކީ ބޯޑަރު ހުރަސްކޮށް އެތެރެކުރަން މަސައްކަތްކުރަނިކޮށް، ކަސްޓަމްސްއިން އަތުލައިގަތް މަސްތުވާތަކެތި ކަމަށާއި، އަދި އެއީ ތަފާތު އަށް މައްސަލައެއްގައި އަތުލައިގަތް މަސްތުވާތަކެތި ކަމަށެވެ. އަދި ހަމައެކަނި އެ ތަކެތީގެ އަގަކީ 59 މިލިއަން ރުފިޔާ ކަމަށް އޭނާ ވިދާޅުވި އެވެ.
މިއީ މަގުމަތީގެ އަގުން ބަލާނަމަ ގާތްގަނޑަކަށް 72.2 މިލިއަން ދިވެހި ރުފިޔާގެ މަސްތުވާތަކެތި. މި ތަކެތި އަތުލެވިފައިވަނީ ފުލުހުންނާއި ކަސްޓަމްސްގެ ވަރަށް ގިނަ މުވައްޒަފުންގެ ވަރަށް ބުރަ މަސައްކަތުން. ވަކިން ޚާއްސަކޮށް ކަސްޓަމްސް އިން ބޯޑަރު ބެލެހެއްޓުމުގަ މިހާރު ގެންގުޅުއްވާ ތަފާތު އެކިއެކި ހުނަރު ބޭނުންކުރައްވައިގެން އަދި އިންޓެލިޖެންސުން ލިބޭ އެކި މައުލޫމާތު އެއްކޮށްގެން ކުރެވޭ ބުރަ މަސައްކަތުގެ ނަތީޖާ މިއީ.ހޯމް މިނިސްޓަރު އަލީ އިހުސާން
ރާއްޖޭގެ ގާނޫނާގައި ގަވައިދާ ހިލާފަށް އެތެރެކުރަމުންދާ ތަކެތި އަދި ރާއްޖެއަށް އެތެރެކުރަން މަނާތަކެތި ހިފެހެއްޓުމަށް ކަސްޓަމްސްއިން ބުރަ މަސައްކަތްތަކެއް ކުރަމުން އަންނަކަން ފާހަގަކުރައްވައި މިނިސްޓަރު އިހުސާން ވިދާޅުވީ، މި އަހަރުގެ ދޮޅުމަހެއްހާ ދުވަހުގެ ތެރޭގައި 7،000 ވޭޕް ސްޓިކާއި ދެ މިލިއަނެއްހާ ސިނގެރޭޓް ވެސް ކަސްޓަމްސް އިން އަތުލައިގެންފައިވާ ކަމަށެވެ.
މިނިސްޓަރު އިހުސާން ވިދާޅުވީ، ރާއްޖެއަށް އެތެރެކުރަން މަނާތަކެތި ހިފެހެއްޓުމަށާއި، މަސްތުވާތަކެއްޗާއި ދެކޮޅަށް ކާމިޔާބު ގިނަ އޮޕަރޭޝަންތައް ހިންގިފައިވާ ކަމަށެވެ.
ރާއްޖެއަށް ވޭޕް އާއި ވޭޕް ކުރުމަށް ބޭނުންވާ ތަކެތި އެތެރެ ކުރުން އޮތީ 15 ނޮވެމްބަރު 2024 އިން ފެށިގެން މަނާވެފަ އެވެ. އަދި 15 ޑިސެންބަރު 2024 އިން ފެށިގެން ރާއްޖޭގައި ވޭޕްގެ ވިޔަފާރިކުރުމާއި އެ ބުއިން ވަނީ މަނާކޮށްފަ އެވެ.
