ޖެނުއަރީ މަހު ބޮޑުވާނެ ކަމަށް ބުނި މުސާރަ ބޮޑުނުވުމުން ކަރެކްޝަންގެ ގިނަ އޮފިސަރުންތަކެއްގެ ސޮއިއާއެކު ޕެޓިޝަންއެއް ރައީސް އޮފީހަށް!
މިކަމާ ގުޅިގެން ރައީސް އޮފީހަށް ހުށަހެޅި ޕެޓިޝަނުގައި މުސާރައިގެ އިތުރުން، މެޑިކަލް އިންޝުއަރެންސްގެ ދަށުން މައިންބަފައިންނަށް ފަރުވާ ލިބޭނެ ގޮތް ހަމަޖެއްސުމަށާއި މުވައްޒަފުންނަށް ފްލެޓް ލިބޭނެ އިންތިޒާމުތައް ފަހިކޮށްދިނުމަށް ވަނީ އެދިފަ. މުސާރަ ބޮޑުނުވި ސަބަބާ ގުޅޭގޮތުން މިނިސްޓަރުގެ ބަހެއް ހޯދުމަށް ކުރި މަސައްކަތް ވަނީ ނާކާމިޔާބުވެފަ.
ކަރެކްޝަންގެ ދަސްވެވެނިވުމުގެ ރަސްމިއްޔާތުގެ ތެރެއިން | ހޯމް މިނިސްޓްރީ
ޖެނުއަރީ މަހު ބޮޑުވާނެ ކަމަށް ބުނި މުސާރަ ބޮޑުނުވުމުން އެކަމުގެ ކަނބޮޑުވުން ފާޅުކޮށް ކަރެކްޝަންގެ ގިނަ އޮފިސަރުންގެ ސޮއި އާއެކު ޕެޓިޝަނެއް ރައީސް އޮފީހަށް ހުށަހަޅައިފި އެވެ.
ހޯމް މިނިސްޓަރ އަލީ އިހްސާން ކަރެކްޝަން އޮފިސަރުންގެ މުސާރަ ޖެނުއަރީ މަހުގެ މުސާރަޔާއި އެކު ބޮޑުވާނެ ކަމަށް ވަޢުދު ވީ ނަމަވެސް، ކަރެކްޝަން އޮފިސަރުންގެ މުސާރަ ބޮޑުވެފައި ނުވެ އެވެ. އެހެންވެ ކަރެކްޝަންގެ ގިނަ އޮފިސަރުންތަކެއް އެކަމުގެ ކަންބޮޑުވުން ފާޅުކޮށް ރައީސް އޮފީހަށް ޕެޓިޝަންއެއް ހުށަހެޅީ މިދިޔަ ހޯމަ ދުވަހު އެވެ.
އެގޮތުން ކަރެކްޝަންގެ އޮފިސަރެއް ރާއްޖެ އެމްވީ އަށް މައުލޫމާތު ދެމުން ބުނީ، މުސާރަ ބޮޑުވާނެ ކަމަށް ވިދާޅުވެ އެކަން އޮގޮތަށް ނުވުމުން ކަންބޮޑުވާ ކަމަށެވެ. ރައީސް އޮފީހަށް ހުށަހެޅި އެ ޕެޓިޝަނުގައި މެޑިކަލް އިންސުއަރެންސް އަށް މައިންބަފައިން އިތުރުކުރެވޭނެ ގޮތެއް ހަމަޖައްސައިދިނުމަށާއި ކަރެކްޝަންގެ މުވައްޒަފުންނަށް ފުލެޓް ލިބޭނެ ގޮތްތަކެއް ހަމަޖައްސައިދިނުމަށް ވަނީ އެދިފަ އެވެ.
ވެރިންގެ މީޓިންއެއްގައި ބުނި މުސާރަ ބޮޑުކޮށްދޭނަމޭ. އޭގެ ކުރިން ވެސް ބުނި ބޮޑުވާނެ ވަރަށް ޔަގީންކަން ދިން.ކަރެކްޝަން އޮފިސަރެއް
މީގެ އިތުރުން މިދިޔަ އަހަރު ޑިސެމްބަރު މަހު ކަސްޓަމްސްގެ އިވެންޓެއްގައި ހޯމް މިނިސްޓަރު އަލީ އިހުސާން ވިދާޅުވީ، ކަސްޓަމްސް މުވައްޒަފުންނާއި ކަރެކްޝަން މުވައްޒަފުންގެ މުސާރަ ޖެނުއަރީ މަހު ބޮޑުވާނެ ކަމަށާއި މުސާރާގެ އޮނިގަނޑު މިހާރު ގާތްގަނޑަކަށް ނިމިފައިވާ ކަމަށެވެ.
އަދި މިދިޔަ އަަހަރު ގެ ނޮވެމްބަރު މަހު، ޕްރިޒަންސް އޮފިސަރުން ގެ ކަންބޮޑުވުންތައް ސަރުކާރުން އަޑު ނާހާތީ އެކަން މީޑީއާ އަށް ތިލަވުމުން އެކަން ހައްލުކުރުމަށް ވަޒީރު އިހުސާން ވަނީ ކަރެކްޝަންސް ގެ އޮފިސަރުންނާއި އެކު ކުއްލި ބައްދަލުވުމެއް ބާއްވާފަ އެވެ. ތަފާތު އެކި ސަބަބުތަކާއި ހުރެ، ސަރުކާރަށް ޕްރެޝަރ ބޮޑުވެފައި ވަނިކޮށް އެ އޮފިސަރުންނާއި ބައްދަލުކުރައްވާ އިހުސާން ވަނީ ގިނަ ވައުދުތަކެއް ވެވަޑައިގަންނަވާފަ އެވެ.
އޭރު އޮފިސަރުންނާއި ބައްދަލުކުރައްވާ އިހުސާން ވިދާޅުވީ މި އަހަރު ގެ ފެބްރުއަރީ ގެ ނިޔަލަށް ކަރެކްޝަންސް ގެ މުވައްޒަފުންނަށް މުސާރަ އާއި އިނާޔަތްތައް އެއް ހަމަ ކުރުމު ގެ ސިޔާސަތު ގެ ދަށުން ބޮޑު މުސާރަ ލިބޭނެ އިންތިޒާމް ހަމަޖެހިފައިވާ ކަމަށެވެ. އަދި މެޑިކަލް ސްކީމަށް ބަދަލު ގެނެސް މައިންބަފައިންނާއި އާއިލާގެ އިތުރު ބައެއް ފަރާތްތަކަށް މެޑިކަލް ސްކީމް ގެ ދަށުން ސިއްހީ ފަރުވާ ލިބޭނެ އިންތިޒާމް ހަމަޖައްސާ ދޭނެ ކަަމަށް ވިދާޅުވި އެވެ.
މިކަމާއި ގުޅިގެން ކުރިން އިންތިޒާމްތައް ހަމަޖެހިފައި ހުރި ކަމަށް ވިދާޅުވި މުސާރަ ނުލިބި ވާ ސަބަބާއި މެދު ސުވާލުކުރުމަށް ގުޅުމުން އިހުސާން ފޯނަށް ޖަވާބުދެއްވާފަ އެއް ނުވެ އެެވެ. އަދި މެސެޖު މެދުވެރިކޮށް އިހުސާން އާއި މި ނޫހުން ވާނީ ސުވާލުކޮށްފަ އެވެ. ނަމަވެސް އެ ސުވާލަށް ވަޒީރު ޖަވާބެއް ނުދެއްވަ އެވެ.
