ޖިންސީ ކުށްވެރިޔާ އެޕްސްޓީންއާއި ވަހީދާއި ގުޅުމުގެ މައްސަލައިގައި އިސްތިއުފާ ދެއްވަން އެންގި ނަމަވެސް މައްސަލަ ތަހުގީގު ކުރަން ރައީސް މުއިއްޒު ނާންގަވާ އަދި ފުލުހުންވެސް އެކަން ނުބަލާ

އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީންއާ ގާތް ގުޅުމެއް ބޭއްވި ކުރީގެ ރައީސް ޑޮކްޓަރު މުޙައްމަދު ވަޙީދު ޙަސަންގެ ގުޅުމުގެ މައްސަލައިގައި އިސްތިއުފާ ދެއްވަން އެންގި ނަމަވެސް މައްސަލަ ތަހުގީގު ކުރަން ރައީސް މުއިއްޒު އަަންގަވާފައި ނުވާ ކަމަށާއި، ފުލުހުންވެސް އެކަން ނުބަލާކަން ހާމަވެއްޖެ އެވެ. 

އެމެރިކާގެ ސްޓޭޓް ޑިޕާޓްމަންޓް އިން އެޕްސްޓީންގެ ފައިލްތައް އާންމު ކުރިއިރު، ރައީސް ވަޙީދު އާއި އެޕްސްޓީންއާ ދެމެދު ގާތް ގުޅުންތަކެއް އޮތް ކަމަށް ވަނީ ހާމަވެފަ އެވެ. އޭރު ވަޙީދު ހުންނެވީ، ރައީސް މުޢިއްޒުގެ ޚާއްސަ މުޝީރުގެ މަޤާމުގަ އެވެ. 

އެ ފައިލް ތަކުގައިވާ ގޮތުން، ރައީސް ވަޙީދު ވެރިކަމުގެ ހުވާ ކުރެއްވުމާ އެކު އެމަނިކުފާނަށް މަރުޙަބާ ކިޔައި މެސެޖު ކުރި މީހުންގެ ތެރޭގައި އެޕްސްޓީން ވެސް ހިމެނެ އެވެ. މީގެ އިތުރުން އެޕްސްޓީންގެ ޕްރައިވެޓު ރަށެއް ރާއްޖޭގައި ތަރައްޤީ ކުރުމުގެ މަޝްވަރާތައް ވެސް ކޮށްފައިވާއިރު، އެޕްސްޓީން މެދުވެރިކޮށް ފޮތަކަށް ފަންޑު ހޯދުމަށް ވެސް ވަޙީދު ވަނީ މަސައްކަތް ކުރައްވައިފަ އެވެ. 

ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރާއްޖެ ޓީވީ އިން އެ ސުވާލު ކުރުމުން ރައީސް މުޢިއްޒު ވިދާޅުވީ، އެ މައްސަލަ ސަމާލުކަމަށް އައުމާ އެކު، އިސްތިއުފާ ދެއްވުމަށް ރައީސް ވަޙީދަށް އެމަނިކުފާނު އެންގެވި ކަމަށެވެ. އެހެންކަމުން، މަގާމުން ވަކި ކުރެއްވުމުގެ ބަދަލުގައި، އިސްތިއުފާ ދެއްވުމުގެ ފުރުސަތު ރައީސް މުޢިއްޒު ދެއްވާފައިވާކަން މި ވަނީ ހާމަވެފަ އެވެ.

އެޕްސްޓީން ފައިލްގައި ހިމެނޭ ސިޔާސީ ނުފޫޒުގަދަ އެތައް ބައެއްގެ މައްސަލަ އެކި ގައުމުތަކުގެ ކަމާއި ގުޅުންހުރި އިދާރާތަކުން އަންނަނީ ބަލަމުންނެވެ. ނަމަވެސް ރައީސް ވަހީދަށް ރައީސް މުއިއްޒު ދެއްވީ ޝަރަފުވެރިކަމާއެކު މަގާމުން އިސްތިއުފާ ދެއްވުމުގެ ފުރުސަތެވެ. 

މި މައްސަލަ ބަލަމުންދޭތޯ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެޓީވީ އިން ކުރި ސުވާލަށް ޖަވާބު ދެއްވަމުން، ހޯމްލޭންޑް މިނިސްޓަރު އަލީ އިހުސާން ވިދާޅުވީ ޖެފްރީ އެޕްސްޓީން ފައިލްތަކުގެ މައްސަލައިގައި މިހާތަނަކަށް ފުލުހުންގެ މުއައްސަސާއަށް ރައީސް ވަހީދުގެ މައްސަލައެއް ހުށަހެޅިފައި ނުވާ ކަމަށެވެ. އަދި ޔަޤީނުންވެސް އެއްވެސް ޖިނާޢީ ތުހުމަތެއް ކުރެވޭ މައްސަލަ ތަޙުޤީޤުކުރުމަށް އެއްވެސް ފަރާތަކުން އެދިފައި ވެސް އަދި އަންގާފައި ވެސް ނުވެ އެވެ. 

އަދި އަޅުގަނޑުމެންނަކަށް ލިބިފައި ނުވޭ އެކަހަލަ މައްސަލައެއް. އަދި މިހާތަނަށް އަމިއްލައަށް ފެނިގެން ވެސް އެފަދަ ތަޙުޤީޤެއް އަޅުގަނޑުމެން ފަށާފައެއް ނުވާނެ. އެހެންނަމަވެސް، ވަކި މީހަކު އިސްތިސްނާ ނުކޮށް ޖިނާޢީ ކުށެއް ކޮށްފި ކަމަށް އަޅުގަނޑުމެންނަށް ގަބޫލުކުރެވޭ ހާލަތުގަ އާއި އަދި ހުށަހެޅޭ ހާލަތުގައި އެ މައްސަލަތައް އަޅުގަނޑުމެން ގެންދާނަން ބަލަމުން އިނގޭތޯ.

ހޯމްލޭންޑް މިނިސްޓަރު އަލީ އިހުސާން

އެކި ފަހަރު މަތިން ރައީސް ވަޙީދު، އެޕްސްޓީންއާ ބައްދަލު ކުރައްވާފައިވާ ކަމަށް ވެސް ވަނީ ހާމަވެފަ އެވެ. އެގޮތުން ރައީސް ވަޙީދު ވެރިކަަމަށް ވަޑައިގެންނެވުމުގެ ކުރިން، އެޕްސްޓީންގެ ގޭގައި ވެސް ވަނީ އޭނާއާ ބައްދަލު ކޮށްފަ އެވެ. އޭގެ ފަހުން ވެރި ކަަމަށް ވަޑައިގެން، އދ. ގެ އާންމު މަޖިލީހުގައި ބައިވެރިވެ ވަޑައިގެންނެވުމަށް ކުރެއްވި ދަތުރުގައި ވެސް ވަނީ އެޕްސްޓީންއާ ބައްދަލު ކުރައްވައިފަ އެވެ.

އާންމުންގެ ގިނަ ފާޑު ކިޔުން ތަކެއް އަމާޒުވީއިރު ވެސް، އެ މައްސަލައާ ގުޅިގެން ރައީސް މުޢިއްޒު، ވަޙީދު މަގާމުން ވަކި ކުރައްވާފައި ނުވެ އެވެ. އޭގެ ދުވަސް ތަކެއް ފަހުން، ފެބްރުވަރީ މަހުގެ ތިން ވަނަ ދުވަހު ވަޙީދު ވަނީ އަމިއްލަފުޅަށް މަގާމުން އިސްތިއުފާ ދެއްވައިފަ އެވެ.