ތިން ރަށުގެ އިސްލާމިކް ސެންޓަރާއި، މިސްކިތް އަދި ގުރުއާން ސެންޓަރު މަޝްރޫއުގެ އެއްބަސްވުމުގެ އަގު ހާމަ ކުރުމަށް އިސްލާމިކް މިނިސްޓްރީން ދެކޮޅު ހަދައިފި

ރާއްޖޭގެ 3 ރަށެއްގައި އިސްލާމިކް ސެންޓަރު އެޅުމަށާ، އަދި މިސްކިތަކާއި ގުރުއާން ސެންޓަރެއް ބިނާކުރުމުގެ މަޝްރޫއުގެ އެއްބަސްވުމުގައި ސޮއިކުރި ނަމަވެސް އަގު ހާމަ ކުރުމަށް ދެކޮޅު ހަދައިފި އެވެ. 

21 ޖެނުއަރީ 2026 ގައި އިސްލާމިކް މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި ކ. ގުޅި މިސްކިތް އިމާރާތްކުރުމާ، ގއ. ވިލިނގިލި ގުރުއާން ސެންޓަރެއް އިމާރާތްކުރުމާ، ހއ. އިހަވަންދޫ އިސްލާމިކް ސެންޓަރު، ޅ. ނައިފަރު އިސްލާމިކް ސެންޓަރުގެ އިތުރުން ގއ. ވިލިނގިލި އިސްލާމިކް ސެންޓަރުގެ މަސައްކަތު އެއްބަސްވުމުގައި ވަނީ ސޮއިކޮށްފަ އެވެ.

އެގޮތުން އިހަވަންދޫ އިސްލާމިކް ސެންޓަރުގެ މަސައްކަތް ފެޑޯ ޕްރައިވެޓް ލިމިޓެޑާއި، ނައިފަރު އިސްލާމިކް ސެންޓަރުގެ މަސައްކަތް ސެންޓަރަލް ލައިން ޕްރައިވެޓް ލިމިޓެޑާ ވަނީ ހަވާލު ކޮށްފަ އެވެ. އަދި ވިލިނގިލީ އިސްލާމިކް ސެންޓަރުގެ މަސައްކަތް ކޭ އެންޑް އެފް ހޯލްޑިވް ޕްރައިވެޓް ލިމިޓެޑާ ހަވާލު ކޮށްފައިވާއިރު،  ވިލިނގިލި ގުރުއާން ސެންޓަރު އަފާމީ މޯލްޑިިވްސް ޕްރައިވެޓް ލިމިޓެޑާ ހަވާލު ކޮށްފައިވެ އެވެ. މީގެ އިތުރުން ގުޅި މިސްކިތުގެ މަސައްކަތް އަފާމީ މޯލްޑިވްސް ޕްރައިވެޓް ލިމިޓެޑާ ވަނީ ހަވާލު ކޮށްފަ އެވެ. 

މި އެއްބަސްވުންތަކުގައި މިނިސްޓްރީގެ ފަރާތުން ސޮއިކުރެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ. މި މަޝްރޫއުތަކަކީ ރާއްޖޭގެ އަތޮޅުތަކުގައި އިސްލާމީ ސެންޓަރުތަކާ، ގުރުއާން ސެންޓަރުތަކާ، ޒަމާނީ މިސްކިތްތައް ބިނާކުރުމަށް ކުރިއަށް ގެންދާ މަޝްރޫއުތަކެއް ކަމަށް މިނިސްޓްރީން ބުނެ އެވެ. 

ނަމަވެސް އިސްލާމިކް މިނިސްޓްރީން މި އެއްބަސްވުންތަކުގެ އަގު ހާމަ ކޮށްފައިނުވެ އެވެ. 22 ވަނަ ދުވަހުން ފެށިގެން މިއަދާ ހަމައަށް މިކަމުގެ ތަފްސީލު ހޯދުމަށް ރާއްޖެއެމްވީން ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ.

މިނިސްޓްރީގެ މީޑިއާގެ ކަންކަމުގައި އެންމެ އިސްކޮށް އުޅުއްވާ، އިސްލާމިކް މިނިސްޓްރީގެ ޑެޕިއުޓީ މިނިސްޓަރު އަލީ އަހުސަން އަށް ގުޅައި މެސެޖް ކުރި ނަމަވެސް ޖަވާބު ދެއްވާފައިނުވެ އެވެ.  އަދި ހޮނިހިރު ދުވަހު އަހުސަން އަށް ގުޅައި، ރާއްޖެއެމްވީން ކަމަށް ދެންނެވުމުން ފޯނު ކަނޑާލެއްވި އެވެ. އޭގެފަހުން ދަތުރެއްގެ މަތީގައި ކަމަށް ވިދާޅުވެ މެސެޖް ކުރުމަށް އެދިފައިވެ އެވެ. އަދި ސުވާލު ފޮނުވުމުން ސީން ކުރުމަށް ފަހު ޖަވާބު ދެއްވާފައިނުވެ އެވެ.

މީގެ އިތުރުން މިނިސްޓަރު ޝަހީމް އަށް ގުޅައި، މެސެޖްކުރި ނަމަވެސް ސުވާލަށް ޖަވާބު ދެއްވާފައިނުވެ އެވެ.