ވައިގެ މަގުން އެތެރެކުރަން އުޅުނު 2.2 ކިލޯ ހެރޮއިން އަތުލައިގަނެފި
ވެލާނާ އިންޓަރނޭޝަނަލް އެއަރޕޯޓުގައި ބަލައިފާސްކުރި ޕާރުސަލްތަކެއްގެ ތެރެއިން 2.2 ކިލޯގެ ހެރޮއިން ކަސްޓަމްސްއިން އަތުލައިގަނެފި. މި ތަކެތީގެ މަގުމަތީ އަގު 2.2 މިލިއަން ރުފިޔާއަށް އަރާނެކަމަށް ލަފާކުރެވޭއިރު، މަސްތުވާތަކެތި ފެނިފައިވަނީ މިދިޔަ ފެބްރުއަރީ މަހުގެ 27 ވަނަ ދުވަހު ރާއްޖެ ގެނައި ޝިޕްމަންޓެއްގެ ތެރެއިން.
ރާއްޖެ އެތެރެކުރަން އުޅެނިކޮށް އަތުލައިގަތް 2.2 ކިލޯގެ ހެރޮއިން | ކަސްޓަމްސް
ވައިގެމަގުން ރާއްޖެއަށް އެތެރެކުރަން އުޅުނު 2.2 ކިލޯގެ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އަތުލައިގަނެފި އެވެ.
މި ތަކެތި އަތުލައިގަނެވިފައިވަނީ ފެބްރުއަރީ 27 ވަނަ ދުވަހު ވައިގެ މަގުން ރާއްޖެ ގެނައި ޕާރުސަލްތަކެއް ބަލައި ފާސްކުރުމުގެ ތެރޭގަ އެވެ. ކަސްޓަމްސްއިން ހާމަކޮށްފައިވާ ގޮތުގައި، މި ޕާރުސަލްތަކުގެ ތެރެއިން ފެނުނު މަސްތުވާތަކެތީގެ ބަރުދަނުގައި ޖުމްލަ 2.2 ކިލޯ ހުއްޓެވެ.
ކަސްޓަމްސްއިން އާންމުކޮށްފައިވާ ފޮޓޯއިން ފެންނަ ގޮތުގައި، މި ތަކެތި ބަންދުކޮށްފައި ހުރީ ރަބަރު ކޮތަޅެއްގައި ކަރުދާހުގެ ތެރޭގަ އެވެ. އަދި މިއީ މަސްތުވާތަކެތީގެ ބާވަތެއް ކަމަށްވާ ހެރޮއިން ކަމަށާއި، މިތަކެތި އަތުލައިގަތީ ވެލާނާ އިންޓަރނޭޝަނަލް އެއަރޕޯޓުން ކަމަށް ކަސްޓަމްސް އިން ބުނެ އެވެ.
މި ތަކެތީގެ މަގުމަތީގެ އަގު 2.2 މިލިއަން ރުފިޔާއަށްވުރެ އިތުރުވާނެ ކަމަށް ކަސްޓަމްސް އިން ބުނެ އެވެ. މި މައްސަލަ އަންނަނީ ތަހުގީގު ކުރަމުންނެވެ.
