ސިފައިިންގެ ފްލެޓަކުން ބައި ކިލޯ މަސްތުވާތަކެތި ފެނިއްޖެ
މި އޮޕަރޭޝަނުގައި ހައްޔަރުކޮށްފައިވަނީ، ހުޅުމާލެ ސިފްކޯހިޔާ 0801 ބީ، މާލެ، އުމުރުން 22 އަހަރުގެ އިބްރާހީމް ޢަމްރު ތައުފީގް. ކޯޓުގައި އޭނާގެ ފަރާތުން ބުނެފައިވަނީ އޭނާއަކީ މަސްތުވާތަކެތި ބޭނުންކުރާ މީހެެއް ކަމަށާއި މަސްތުވާތަކެތި ވިއްކާ ވިޔަފާރި ނުކުރާ ކަމަށް.
މައްސަލައިގައި ހައްޔަރުކުރި ޒުވާނާ: ބައި ކިލޯގެ މަސްތުވާތަކެތި ހޯދީ ސިފައިންގެ ފްލެޓެއްގެ ތެރެއިން | ރާއްޖެ އެމްވީ
ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހުޅުމާލޭގައި ހިންގި އޮޕަރޭޝަނެއްގައި ބައި ކިލޯގެ މަސްތުވާތަކެއްޗާއެކު ޒުވާނަކު ފުލުހުން ހައްޔަރުކޮށްފި އެވެ.
މި އޮޕަރޭޝަނުގައި ހައްޔަރުކޮށްފައިވަނީ ހުޅުމާލެ ސިފްކޯހިޔާ ގައި ދިރިއުޅޭ އުމުރުން 22 އަހަރުގެ އިބްރާހީމް ޢަމްރު ތައުފީގް އެވެ. އޭނާ ހައްޔަރުކޮށްފައިވަނީ މިދިޔަ ހޯމަ ދުވަހު މަސްތުވާތަކެތި ގެންގުޅެ، ބޭނުންކޮށް އަދި އެ ތަކެތީގެ ވިޔަފާރިކުރާ ކަމަށް ތުހުމަތުކުރެވޭ މައްސަލައަކާ ގުޅިގެން ކަމަށް ފުލުހުން ބުންޏެވެ.
ފުލުހުން ހާމަކުރި ގޮތުގައި މަސްތުވާތަކެތި ފެނުނީ އޭނާ ދިރިއުޅެމުން އަންނަ ސިފައިންގެ ފްލެޓުގެ ތެރެއިންނެވެ. އެގޮތުން އޭނާ ހައްޔަރުކޮށް ބަލައި ފާސްކުރިއިރު މަސްތުވާތަކެތި ކަމަށް ބެލެވޭ 500 ގްރާމްގެ ތަކެތި ފެނިފައިވާ ކަމަށް ފުލުހުން ބުންޏެވެ.
އޭނާ ދިރިއުޅޭ ކޮޓަރިން ގިނަ އަދަދެއްގެ މަސްތުވާތަކެއްޗާއި، އެތަކެތި ބަންދުކުރުމަށް ބޭނުންކުރާ އާލާތްތައް ފެނިފައިވާ ކަމަށް ފުލުހުން ކޯޓުގައި ބުނެފައިވެ އެވެ. މިގޮތުން އޭނާ ދިރިއުޅޭ ކޮޓަރީގައި ހުރި ޑްރެސިން ޓޭބަލްގެ ޑްރޯވާގެ ތެރެއިން ހުސް ރަބަރު ޕެކެޓާއި ކައްޓާ އެއް ފެނިފައިވާ ކަމަށް ފުލުހުން ކޯޓުގައި ބުނެފައިވެ އެވެ.
ނަމަވެސް ކޯޓުގައި އިބްރާހީމް ޢަމްރު ތައުފީޤު ގެ ފަރާތުން ބުނެފައި ވަނީ އޭނާއަކީ މަސްތުވާތަކެތި ބޭނުންކުރާ މީހެއް ކަމަށާއި، ނަމަވެސް މަސްތުވާތަކެތި ވިއްކާ ވިޔަފާރި ނުކުރާ ކަމަށެވެ.
މި މައްސަލައާ ގުޅިގެން އިބްރާހީމް ޢަމްރު ތައުފީޤުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް އަމުރުކުރިކަމަށް ފުލުހުން ބުންޏެވެ. އަދި މި މައްސަލަ ތަހުގީގުކުރަމުން އަންނަކަމަށް ވެސް ބުންޏެވެ.
އޮޕަރޭޝަން އަލިމަގުގެ ދަށުން މިހާތަނަށް 100 އެއްހައި މީހުން ފުލުހުން ވަނީ ހައްޔަރުކޮށްފަ އެވެ. މަސްތުވާތަކެތީގެ ބޮޑުން ހައްޔަރުކޮށް އަތުލައިގަތުމަށް ފެށި މި އޮޕަރޭޝަނާ ގުޅޭ ފަހުގެ މައުލޫމާތު އަދި ފުލުހުން ހާމައެއް ނުކުރެ އެވެ.
މިފަދަ މައްސަލަތަކުގައި މަދުން ނަމަވެސް ފުލުހުންނާއި، ސިފައިން ވެސް މީގެ ކުރިން ޝާމިލުވެ އެ މައްސަލަތައް ވެސް ފެންމަތިވެފައި އެބަހުއްޓެވެ. މިއީ ސަލާމަތީ ހިދުމަތްތަކުގައި މަސައްކަތްކުރާ ފަރާތްތަކާ ގުޅިގެން ފެންމަތިވާ މައްސަލަތަކަކީ ރާއްޖޭގެ މަސްތުވާތަކެތީގެ މައްސަލައިގެ ސީރިއަސް ކަން ދައްކުވައިދޭ ކަމެކެވެ.
