ވައިގެ މަގުން ފަސް ކިލޯއަށް ވުރެ ގިނަ ޑްރަގު އެތެރެކުރި ޕާކިސްތާނު މީހަކު 23 އަހަރަށް ޖަލަށް

ވައިގެ މަގުން ފަސް ކިލޯއަށް ވުރެ ގިނަ ޑްރަގު އެތެރެކުރިކަން ސާބިތުވެ، ޕާކިސްތާނު މީހަކު 23 އަހަރަށް ޖަލަށް ލާން ކްރިމިނަލް ކޯޓުން  ހުކުމްކޮށްފި އެވެ.

މި މައްސަލައިގައި ޖަލަށް ލާފައި ވަނީ އަބްދުލް ލަތީފް ބަލޮޗް ނަމަކަށް ކިޔާ މީހެކެވެ. އޭނާ މި މައްސަލައިގެ ތުހުމަތުގައި ހައްޔަރުކުރީ މީގެ ދެ އަހަރެއްހާ ދުވަސް ކުރިން، މާޗު 12، 2024 ގައި އެވެ. ބަލޮޗް ރާއްޖެ އައިސްފައި ވަނީ ގަތަރު އެއާވޭސްގެ ފްލައިޓެއްގަ އެވެ. މީނާއާ ކަސްޓަމްސްގެ އޮފިސަރުން ސުވާލުކުރީ ކަސްޓަމްސްގައި މުދާ ޑިކްލެއާކުރަން އޮންނަ ރެޑް ޗެނަލްއަށް އަމިއްލައަށް ގޮސް ވަނުމުންނެވެ.

ބަލޮޗް ވަނީ ކޯޓުގައި ޑްރަގު ޓްރެފިކިންގެ ދައުވާއަށް އިންކާރުކޮށްފަ އެވެ. އޭނާ ކޯޓުގައި ބުނީ، އޭނާ ރާއްޖެ އަންނަން ޗެކިން ކުރީ އެންމެ ލަގެޖެއް ކަމަށެވެ. އަދި ޑްރަގު ފެނުނު ލަގެޖަކީ އޭނާ ގެ ލަގެޖެއް ނޫން ކަމަށް ބުނެފައިވެ އެވެ.

ބަލޮޗް މިހެން ބުނުމުން ކޯޓުން ވަނީ އޭނާ އައި ފްލައިޓަށް ޗެކިންކުރި ލަގެޖުގެ އަދަދާއި އެހެން މައުލޫމާތު ސާފުކޮށްފަ އެވެ. އަދި، ގަތަރު އެއާވޭސްއިން ދިން ލިޔުންތަކުން އޭނާ ގެ ނަމުގައި ދެ ލަގެޖު ޗެކިން ކުރިކަން ވަނީ އެނގިފަ އެވެ.

މި މައްސަލައިގައި ބަލޮޗް އުމުރަށް ޖަލަށް ލުމުގެ އިތުރުން ދެ މިލިއަން ރުފިޔާއިން ޖޫރިމަނާކުރަން ވެސް މި މައްސަލަ ބެއްލެވި ގާޒީ އިބްރާހިމް އިހުސާން ހުކުމްކުރެއްވި އެވެ. ބަލޮޗް ޖޫރިމަނާ ކުރި އަދަދު ބޮޑުކުރީ އޭނާއަކީ އެއް ފަހަރަށް ވުރެ ގިނަ ފަހަރު ރާއްޖެއަށް ޑްރަގު އެތެރެކޮށްފައިވާ މީހެއް ކަމަށް ބެލެވޭތީ އެވެ.