މާސްކް އިން ގަލްފު ގައުމުތަކަށް މުދާ އުފުލުން ވަގުތީ ގޮތުން ހުއްޓާލައިފި

މެދުއިރުމަތީގެ މަސްރަހަށް އަންނަމުންދާ ބަދަލުތަކާ ގުޅިގެން، ގަލްފުގެ ބައެއް ގައުމުތަކަށް މުދާ އުފުލުމަށް ކުރާ ބުކިންތައް ވަގުތީ ގޮތުން މެދުކަނޑާލާފައިވާ ކަމަށް ދުނިޔޭގެ މަޝްހޫރު ޝިޕިން ކުންފުނި، މާސްކް އިން ހާމަކޮށްފިއެވެ.

އެ ކުންފުނިން ނެރުނު އޮޕަރޭޝަނަލް އަޕްޑޭޓެއްގައި ބުނެފައިވަނީ، ޔުނައިޓެޑް އެރަބް އެމިރޭޓްސް (ޔޫއޭއީ)، އޮމާން (ސަލާލާ ބަނދަރު ފިޔަވައި)، އިރާގު، ކުވެއިތު، ގަތަރު، ބަހްރޭންގެ އިތުރުން ސައުދީ އަރަބިއްޔާގެ ބައެއް ސަރަހައްދުތައް ކަމަށްވާ ދައްމާމް އަދި ޖުބައިލް ހިމެނޭހެން އެ ގައުމުތަކަށް މުދާ ފޮނުވުމަށާއި އެ ގައުމުތަކުން މުދާ ބޭރުކުރުމަށް ކުރާ ބުކިންތައް ބަލައިގަތުން، ވަކި ގޮތެއް އަންގަންދެން މިހާރު ހުއްޓާލާފައިވާ ކަމަށެވެ.

މާސްކް އިން ބުނި ގޮތުގައި މި ނިންމުން ނިންމާފައިވަނީ މެދުއިރުމަތީގެ މަސްރަހު ނުތަނަވަސްވެފައިވާތީ، ކުންފުނީގެ މުވައްޒަފުންގެ ސަލާމަތާއި، މުދަލުގެ ރައްކާތެރިކަން ކަށަވަރުކުރުމުގެ އިތުރުން، ޝިޕިން ނެޓްވޯކްގެ ހަމަޖެހުން ދެމެހެއްޓުމަށްޓަކައި ހެދި ރިސްކް އެސެސްމަންޓަކަށް ފަހުގައެވެ.