އީރާނުގެ ލީޑަރު އަވަހާރަ ކޮށްލި ހާދިސާ އާ ގުޅިގެން މުއިއްޒުގެ ސަރުކާރުން އަމަލުކުރީ ކަމާ ބެހޭ ގޮތުން ހެދިފައިވާ ގަވައިދާ ވެސް ޚިލާފަށް!

އީރާނުގެ ލީޑަރު އާޔަތުﷲ ޚާމަނާއި އަވަހާރަ ކޮށްލި ހާދިސާ އާ ގުޅިގެން ރާއްޖޭގައި މިހާރު އޮތް މުހައްމަދު މުއިއްޒުގެ ސަރުކާރުން އަމަލުކުރީ ކަމާ ބެހޭ ގޮތުން ހެދިފައިވާ ގަވައިދާ ވެސް ޚިލާފަށްކަން ހާމަ ވެއްޖެ އެވެ.

ރާއްޖެއާ ސިޔާސީ ގޮތުން ގުޅިފައިވާ ބޭރު ގައުމެއްގެ ވެރިއަކު އަވަހާރަ ވުމުގެ ހިތާމައިގައި އަމަލު ކުރަންޖެހޭ ގޮތާ ބެހޭ ގަވައިދެއް 24 އޮގަސްޓް 1995 ގައި ރައީސުލް ޖުމްހޫރިއްޔާގެ އޮފީހުން ވަނީ އާންމު ކޮށްފައެވެ.

ރާއްޖެ އާ ސިޔާސީ ގޮތުން ގުޅިފައިވާ ބޭރު ގައުމެއްގެ ވެރިއަކު އަވަހާރަވެއްޖެ ނަމަ ރަސްމީ ގޮތުން ހިތާމަފާޅު ކުރުަމަށްޓަކައި އަމަލު ކުރަން ޖެހޭ ގަވައިދުގެ އެއްވަނަ ނަންބަރުގައި ބުނެފައިވަނީ، އިސްލާމީ ގައުމެއްގެ ނުވަތަ ސާކުގެ ގައުމެއްގެ ހެޑް އޮފް ސްޓޭޓަކު އަވަހާރަވެއްޖެ ނަމަ 1 ދުވަސް ބަންދުކޮށް 3 ދުވަސް ވަންދެން ދިވެހި ގައުމީ ދިދަ ބައިދަނޑިއަށް ތިރި ކުރަން ޖެހޭނެ ކަމަށެވެ.

މި ގަވައިދުގައި ބުނާ ގޮތުން އިސްލާމް ނޫން ގައުމެއްގެ ނުވަތަ ސާކުގައި ނުހިމެނޭ ގައުމެއްގެ ސަރުކާރު ހިންގަވާ ވެރިޔާ އަވަހާރަ ވެއްޖެ ނަމަ 1 ދުވަސްވަންދެން ދިވެހި ގައުމީ ދިދަ ބައިދަނޑިއަށް ތިރި ކުރަންވާނެ ކަމަށެވެ.

ގަވައިދުގައި ބުނެފައިވަނީ ދިވެހި ގައުމީ ދިދަ ތިރި ކުރާނީ ދިދަ ތިރިކުރުމަށް ރައީސް އޮފީހުން އެންގުމުން ކަމުގައެވެ.

އިސްލާމީ ގައުމެއް ކަމަށްވާ އިރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ އިޒްރޭލާއި އެމެރިކާ ގުޅިގެން ދިން ނުރައްކާތެރި ހަމަލާ އެއްގައި އަވަހާރަވުމާ ގުޅިގެން ސައްތައިން ސައްތަ މުސްލިމް ގައުމެއްގެ ގޮތުގައި އޮތް ދިވެހިރާއްޖޭގެ ސަރުކާރުން އެއްވެސް އެއްޗެއް ނުބުނެ ހިމޭނުން އޮތުމުން ގިނަ ބަޔަކު ވަނީ ސަރުކާރަށް ނުހުރުމާއެކު ފާޑު ކިޔާފަ އެވެ. މި ކަމާ ބެހޭ ގޮތުން ރައީސް މުއިއްޒު އަށް ނޫސްވެރިން ސުވާލުކުރުމުން ވިދާޅުވީ، އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް އިރާނުން ދެމުން އަންނަ ރައްދު ހަމަލާތަކާ ގުޅިގެން އެ ގައުމުތަކަށް ގުޅައި އެ ގައުމުތަކާއެކު އޮތްކަން ހާމަ ކުރަނީ ދިވެހި ރައްޔިތުންގެ ފަރާތުން ކަމަށެވެ.

ރައީސް މުއިއްޒުގެ ވާހަކަފުޅަށް ފާޑުވިދާޅުވެ، ކުރީގެ ނައިބު ރައީސް ޑރ. މުހައްމަދު ޖަމީލު އަހްމަދު އެކްސް ގައި ކުރެއްވި ޕޯސްޓެއްގައި ވިދާޅުވީ "ވަކި އެއްޗެއް ދުލުން ވަރަށް އުނދަގުލުން އިޒްރޭލުގެ އުދުވާނާމެދު ބަސް ބޭނުން ކުރާތަން ޑރ. މުއިއްޒުގެ ކިބައިން މިއަދު ފެނިގެން ދިޔަ،" ކަމަށެވެ.

"އެއްވެސް ޙައްގެއް ނެތި އީރާނުގެ އިސްތިގްލާލު ނަގާލަން އުޅެ ސޮވެރިނިޓީއަށް އަރާ މުސްލިމް ލީޑަރަކު ޝަހީދުކޮށްލުމަށްވުރެ ބޮޑު ވަކި ކުށެއް،" ނޯންނާނެ ކަމަށް ވެސް ޑރ. ޖަމީލު ވިދާޅުވި އެވެ.

މުއިއްޒުގެ ވާހަކަފުޅާ ގުޅިގެން ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ ވިދާޅުވީ މުއިއްޒު ދެއްކެވީ ހަމަޖެހޭ ވާހަކައެއް ނޫން ކަމަށެވެ.

"ތިއީ ހަމަޖެހޭ ވާހަކައެއް ނޫން؛ ރައްޔިތުން މަނިކުފާނު އިންތިޚާބުކުރީ އިސްލާމްދީނާއި ޤާނޫނުއަސާސީއާއި ޤާނޫނާއި ޤަވާޢިދުތަކުގައި ކަނޑައެޅިފައިވާ ޙުކުމްތަކާއި އުޞޫލުތަކުގެ ޙުދޫދުގެ ތެރޭގއި ވެރިކަންކުރުމަށް؛ އަމިއްލަ އިޚުތިޔާއި ޝަޚްޞީ މަޞްލަޙަތަށް އިސްކަންދީގެން ކުރާ ކަންކަމަކީ ރައްޔިތުންގެ ފަރާތުން ކުރާ ކަންކަންކަމުގައި ސިފަކުރެވޭނެ އެއްވެސް އަސާސެއް ނޯންނާނެއެވެ."

ބައިނަލް އަޤުވާމީ އަދ ޑިޕްލޮމެޓިކް ގުޅުންތައް ދުސްތޫރީ ހަމަތަކުގެ މަތިން ހިންގުމުގައި ރައީސް މުއިއްޒު ފެއިލްވެފައި އޮތުމަކީ ދިވެހި ރައްޔިތުންގެ ކުށެއް ނޫން ކަމަށާއި، އެކަމަށް ޒިންމާވާންޖެހޭނީ ޚުދު މުއިއްޒާއި، ބައިނަލްއަޤުވާމީ މައްސަލަތަކުގައި މުއިއްޒު އަށް މަޝްވަރާ އަރުވަންތިބޭ ނާޤާބިލު އަދި މުނާފިޤު މަސްއޫލުވެރިން ކަމަށް ވެސް ކުރީގެ އުއްތަމަ ފަނޑިޔާރު ވިދާޅުވި އެވެ.