އީރާންގެ ރޫހާނީ ލީޑަރު ކަމަށް ކޮންމެ މީހަކު އަޔަސް، މަރާލާނަން: އިޒްރޭލްގެ ޑިފެންސް މިނިސްޓަރު

އެމެރިކާ އާއި އިޒްރޭލް އިން ދިން ހަމަލާ ތަކެއްގައި އީރާންގެ އެންމެ މަތީ ވެރިޔާ އަދި ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ވެފައިވާއިރު، ދެން އެ މަގާމަށް ވަޑައިގަންނަވާ ކޮންމެ މީހަކު ވެސް މަރާލާނެ ކަމުގެ އިންޒާރު އިޒްރޭލް އިން ދީފި އެވެ.

މި އިންޒާރު ދީފައި ވަނީ އިޒްރޭލްގެ ޑިފެންސް މިނިސްޓަރު އިޒްރާއީލް ކަޓްޒް އެވެ. އެކްސްގައި ކުރެއްވި ޕޯސްޓެއްގައި ކާޓްޒް ވިދާޅުވީ، އިޒްރޭލް ސުންނާފަތި ކޮށްލުމުގެ ރޭވުންތައް ކުރިއަށް ގެންދިޔުމަށާއި، އެމެރިކާ އާއި މިނިވަން ދުނިޔެ އަށާއި ސަރަހައްދީ ޤައުމު ތަކަށް ބިރު ދެއްކުމަށް އީރާންގެ ޓެރަރިސްޓް ސަރުކާރުން ކަނޑައަޅާ ކޮންމެ ލީޑަރަކީ ވެސް އަވަހާރަ ކޮށްލަން ޖެހޭ އަމާޒެއް ކަމަށެވެ. އަދި އެ ބޭފުޅެއްގެ ނަމަކަށް، ނުވަތަ ފިލައިގެން އުޅޭ ތަނަކަށް ބެލުމެއް ނެތި އިޒްރޭލް އިން އެ އަމާޒު ފުރިހަމަ ކުރާނެ ކަމަށް ވެސް ކާޓްޒް ވިދާޅުވި އެވެ. 

އެމެރިކާ އާއި އިޒްރޭލް އިން އީރާން އަށް ހަމަލާ ދޭން ފަށާފައި ވަނީ މިދިޔަ ހޮނިހިރު ދުވަހު އެވެ. ޖެހިގެން އައި އާދީއްތަ ދުވަހުގެ ފަތިހު އީރާން އިން ވަނީ، އެ ހަމަލާ ތަކުގައި އެ ޤައުމުގެ ރޫހާނީ ލީޑަރު ޚާމަނާއީ އަވަހާރަ ވެފައިވާކަން ކަށަވަރު ކޮށްދީފަ އެވެ. އޭގެ ފަހުން އަންގާރަ ދުވަހު އެމެރިކާ އާއި އިޒްރޭލް އިން ވަނީ، އީރާންގެ ރޫހާނީ ލީޑަރު ހޮވުމުގެ މަސްއޫލިއްޔަތު އަދާ ކުރާ މަޖިލީހުގެ އިމާރާތަށް ވެސް ހަމަލާ ދީފަ އެވެ. 

އީރާންގެ ދައުލަތާ ގުޅުން ހުރި ތަސްނީމް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އެމެރިކާ އާއި ޒަޔަނިސްޓް މުޖުރިމުން ހަމަލާ ދީފައި ވަނީ އީރާންގެ ވެރި ރަށް ތެހެރާންގެ ދެކުނުން އޮންނަ ގުމް ސިޓީގައި ހުންނަ، އެސެމްބްލީ އޮފް އެކްސްޕާޓްސްގެ އިމާރާތަށެވެ. މި މަޖިލީހަކީ އީރާންމެ އެންމެ މަތީ ވެރިޔާ އައްޔަން ކުރުމާއި، އޭނާގެ މަސައްކަތްތައް ބެލެހެއްޓުމުގެ އިތުރުން، ބޭނުން ވެއްޖެ ޙާލަތެއްގައި މަގާމުން ވަކި ކުރުމުގެ ބާރު ވެސް ލިބިގެންވާ މުއައްސަސާ އެވެ. 

އީރާންގެ މީޑިއާ ތަކުން އާންމު ކޮށްފައިވާ ވީޑިއޯ ތަކުން ފެންނަ ގޮތުގައި، އެމެރިކާ އާއި އިޒްރޭލް އިން ދިން ހަމަލާ ތަކުގެ ސަބަބުން އެ އިމާރާތަށް ބޮޑެތި ގެއްލުން ތަކެއް ލިބިފައިވާ ކަމަށެވެ. ނަމަވެސް، މި ހަމަލާގައި އެއްވެސް މީހަކު މަރުވިކަން، ނުވަތަ އެއްވެސް މީހަކަށް އަނިޔާވި ކަމުގެ ތަފްސީލެއް މިހާތަނަށް އެއްވެސް ފަރާތަކުން ހާމަ ކޮށްފައިވެ އެވެ.