އިޒްރޭލްގެ ހަމަލާ ތަކުގައި އީރާންގެ ކުރީގެ ރައީސް އަޙުމަދީ ނިއްޖާދު އަވަހާރަވި ކަމަށް ބުނާ ވާހަކަ ދޮގު ކޮށްފި

އެމެރިކާ އާއި އިޒްރޭލް އިން އީރާނަށް ދެމުން އަންނަ ހަމަލާ ތަކުގައި އީރާނުގެ ކުރީގެ ރައީސް މަހުމޫދު އަޙުމަދީ ނިއްޖާދު އަވަހާރަވި ކަމަށް ބުނެފައި ވީ ނަމަވެސް، އެމަނިކުފާނު އަވަހާރަ ނުވާ ކަމަށް ބުނެފި އެވެ. 

އަންގާރަ ދުވަހު އަޙުމަދީ ނިއްޖާދުގެ އަރިސް ބޭފުޅަކު ވިދާޅުވެފައި ވަނީ އެމަނިކުފާނު އަވަހާރަވެފައި ނުވާ ކަަމަށެވެ. އެގޮތުން އަޙުމަދީ ނިއްޖާދުއާ ސީދާ ގުޅުން ނުކެނޑި އެބަ އޮތް ކަމަށާއި، އެމަނިކުފާނުގެ ޙާލު ކޮޅު ރަނގަޅު ކަމަށް ވެސް ބުނެފައިވެ އެވެ. ނަމަވެސް، އެމަނިކުފާނުގެ ސެކިއުރިޓީ ބަލަހައްޓާ ޓީމާ ގުޅުން ހުރި އިމާރާތަކަށް ހަމަލާ އަމާޒުވެފައިވާ ކަމަށް ފާހަގަ ކޮށްފައިވެ އެވެ. 

އެ ހަމަލާ ގައި އަޙުމަދީ ނިއްޖާދުގެ ސަލާމަތީ ކަންކަން ބަލަހައްޓާ ބޮޑީ ގާޑުންގެ ގޮތުގައި މަސައްކަތް ކުރާ، އީރާާނުގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ތިން މެމްބަރަކު މަރުވެފައިވާ ކަމަށް އަޙްމަދީ ނިޖާދުގެ އަރިސް ބޭފުޅާ ވިދާޅުވި އެވެ. އެ ހަމަލާ އަމާޒުވެފައިވާ އިމާރަތަކީ އަޙުމަދީ ނިއްޖާދު ދިރިއުޅުއްވާ ގެކޮޅާ ގާތް ގަނޑަކަށް 100 މީޓަރު ދުރުގައި ހުރި ތަނެއް ކަމަށާއި، އެމަނިކުފާނު ދިރިއުޅުއްވާ ގެކޮޅަށް އެއްވެސް ގެއްލުމެއް ނުލިބޭ ކަމަށް ބުނެފައިވެ އެވެ. 

ނަމަވެސް މިކަމުގައި އީރާނުގެ ސަރުކާރުން ރަސްމީ އެއްޗެއް ބުނެފައި ނުވާ ކަމަށް މީޑިއާ ތަކުގައި ބުނެފައިވެ އެވެ.

އަޙުމަދީ ނިއްޖާދު އަކީ 2005 ވަނަ އަހަރުން ފެށިގެން، 2013 ވަނަ އަހަރާ ހަމައަށް އީރާންގެ ރައީސްކަން ކުރެއްވި ބޭފުޅެކެވެ. އެމަނިކުފާނު ފާހަގަ ވެގެން ގޮސްފައި ވަނީ ޖެހިލުން ކުޑަ، އަދި ފަސް ޖެހުމެއް ނެތް ބޭފުޅެއްގެ ގޮތުގަ އެވެ. އެގޮތުން މީގެ ކުރިން އެމަނިކުފާނު ވަނީ ދުނިޔޭގެ ޗާޓުން ވެސް އިޒްރޭލް ފޮހެލަން ޖެހޭ ކަމަށް ވިދާޅުވެ ވާހަކަ ދައްކަވައިފަ އެވެ.