އެމެރިކާ އާއި އިޒްރޭލް އިން އީރާން އަށް ދޭ ހަމަލާތަކާ ދެކޮޅަށް، ރަޝިޔާ އާއި ޗައިނާ

އެމެރިކާ އާއި އިޒްރޭލް އިން އީރާނަށް ދެމުން އަންނަ ހަމަލާތައް ކުށްވެރި ކުރައްވައި، އެ ހަމަލާތަކާ ދެކޮޅަށް ރަޝިޔާ އާއި ޗައިނާގެ ފޮރިން މިނިސްޓަރުން ނިކުންނަވައިފި އެވެ. 

މި ހަފްތާގެ ތެރޭގައި ރަޝިޔާގެ ފޮރިން މިނިސްޓަރު ސަރގޭ ލަވްރޮވް އާއި، ޗައިނާގެ ފޮރިން މިނިސްޓަރު ވަންގް ޔީ ވަނީ ބައްދަލު ކުރައްވައިފަ އެވެ. ދެ ބާރުގެ އިސް ދެ ބޭފުޅުން ބައްދަލު ކުރެއްވިއިރު، އެ ބައްދަލުވުމުގައި ވަނީ އީރާނަށް އެމެރިކާ އާއި އިޒްރޭލް އިން ދެމުން އަންނަ ހަމަލާތަކާ މެދު މަޝްވަރާ ކުރައްވައިފަ އެވެ.

ޗައިނާާގެ ފޮރިން މިނިސްޓަރު ވަންގް ޔީ ވިދާޅުވީ، އީރާނަށް ދީފައިވާ ހަމަލާ ތަކަކީ ބައިނަލްއަޤުވާމީ އެންމެހައި ޤާނޫނު ތަކާއި، އުސޫލުތަކާ ޚީލާފަށް ދީފައިވާ ހަމަލާ ތަކެއް ކަމަށެވެ. އަދި އެއީ ސަރަހައްދީ ގޮތުން ވެސް ނުރައްކާތެރި އަދި ހަމަޖެހުން ގެއްލޭ ހަމަލާ ތަކެއް ކަމަށް އޭނާ ފާހަގަ ކުރެއްވި އެވެ. 

ރަޝިޔާގެ ފޮރިން މިނިސްޓަރު ލަވްރޮވް ވިދާޅުވީ، އީރާން އިން ނިއުކްލިއާ ބޮމެއް ހޯދުމަށް، ނުވަތަ އުފެއްދުމަށް މަސައްކަތް ކުރަމުންދާ ކަމުގެ އެއްވެސް ހެއްކެއް އެ އެގައުމުން ފެނިފައި ނުވާ ކަމަށެވެ. އީރާން އަށް ހަމަލާ ދިނުމަށް އެމެރިކާ އާއި އިޒްރޭލް އިން ދައްކާފައިވާ ސަބަބުތަކާއި، އުޒުރުތަކަކީ ދޮގެއް ކަމަށް ވެސް އޭނާ ވިދާޅުވި އެވެ. 

ލަވްރޮވް އިތުރަށް ވިދާޅުވީ، އީރާނަކީ ނިއުކްލިއާ ހަތިޔާރު ނުފެތުރުމުގެ އެއްބަސްވުމުގައި ސޮއި ކުރި ޤައުމެއް ކަމަށާއި، އެ އެއްބަސްވުމުގެ އެންމެހައި ޝަރުތު ތަަކަށް އީރާނުން ތަބާވަމުން އަންނަ ކަމަށެވެ. އަދި މި ހަމަލާ ތަކަކީ އީރާނަށް ސިޔާސީ ގޮތުން ބުރޫ އެރުވުމަށް ހިންގި ހަމަލާ ތަކެއް ކަމަށް ވެސް ލަވްރޮވް ސިފަ ކުރެއްވި އެވެ. 

ހަމަ އެއާ އެކު، ޗައިނާ އިން ވަނީ އީރާނަށް ފުރިހަމަ އަށް އެއްބާރުލުން ދެމުންދާ ކަމަށް ބުނެފަ އެވެ. ވަންގް ޔީ ވިދާޅުވީ، އީރާން އަށް ދިން ހަމަލާ ތަކަކީ ޤައުމުގެ ސިޔާދަތަށް ހުރަސް އެޅުމަށް ދިން ހަމަލާ ތަކެއް ކަމަށާއި، ބައިނަލްއަޤުވާމީ މުޖުތަމައުގެ ހުރިހާ ޤައުމު ތަކުން އެ ހަމަލާތަކާ ދެކޮޅު ހަދަަން ޖެހޭ ކަމަށް ވެސް އޭނާ ވިދާޅުވި އެވެ.