ކޮންމެ ކަމެއްގައި ވެސް "ރައީސް ވިދާޅުވީ"، މިފަހަރު ވަޓްސްއަޕް ގްރޫޕް ވެސް ހައްދަވަނީ "ރައީސް ވިދާޅުވީ" ތީ
ސަރުކާރުގެ ވަޒީރުން ބާއްވާ ނޫސްވެރިންގެ ބައްދަލުވުންތަކުގައި، އިދާރީ ފެންވަރުގެ ކުދިކުދި ކަންކަމުގައި ވެސް ރައީސުލްޖުމްހޫރިއްޔާގެ އިރުޝާދު ހޯއްދަވާ ކަމަށް ވިދާޅުވާތީ އާންމުންގެ ފާޑުކިޔުން ވަނީ އަމާޒުވެފަ. ވަޓްސްއަޕް ގްރޫޕް ހެދުމާއި ސްކޫލްތަކަށް ނަން ދިނުން ފަދަ އާދައިގެ ކަންކަމުގެ "ކްރެޑިޓް" ރައީސަށް އެރުވުމަކީ ވަޒީރުންގެ ޒިންމާތޯ ސުވާލު އުފެދޭ.
ރައީސް ޑރ. މުހައްމަދު މުއިއްޒު އަދި އެމަނިކުފާނު ގެ ހަޔަރ އެޑިއުކޭޝަން މިނިސްޓަރު އަލީ ހައިދަރު. | ހަޔަރ އެޑިއުކޭޝަން
ސަރުކާރުގެ ހިންގުން ހަރުދަނާކޮށް، ރައްޔިތުންނަށް މައުލޫމާތު ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވާފައިވާ އިރުޝާދާ އެއްގޮތަށް، މި ހަފްތާގެ ތެރޭގައި އެމަނިކުފާނުގެ ވަޒީރުން ގެންދަވަނީ ސިލްސިލާކޮށް ނޫސްވެރިންގެ ބައްދަލުވުންތައް ބާއްވަމުންނެވެ. ނަމަވެސް، މި ބައްދަލުވުންތަކުގައި މިނިސްޓަރުން ދައްކަވާ ބައެއް ވާހަކަތަކާ ވިދާޅުވާ ބައެއް ކަންކަމަކީ ހަގީގަތުގައި ވެސް އެކަމާ މެދު ސުވާލު އުފެދޭ ކަންކަމެވެ.
ނޫސްވެރިން ކުރާ ކޮންމެ ސުވާލެއްގެ ޖަވާބުގައި "ރައީސް މުއިއްޒު ވިދާޅުވީ" ނުވަތަ "ރައީސް އިރުޝާދު ދެއްވީ" ނުވަތަ "ރައީސް ޚާއްސަ ސަމާލުކަމެއް ދެއްވައިގެން" ނޭ ވިދާޅުވެ މިނިސްޓަރުންގެ ޖަވާބު ފުރިހަމަ ނުވަނީ ކަންނޭނގެ އެވެ. ހަމަ ކޮންމެ މިނިސްޓަރަކު ވެސް މިފަދަ ބަސްތައް އެތައް ފަހަރަކު ތަކުރާރު ނުކުރައްވާ އެންމެ ޕްރެސް އެއް ވެސް އަދި ނުބާއްވަ އެވެ.
ބުދަ ދުވަހު ބޭއްވި އެއް ބައްދަލުވުން އަދި ވަކީން ޚާއްސަކޮށް ފާހަގަވެގެން ދިޔައެވެ. މުއިއްޒުގެ ހަޔަރ އެޑިއުކޭޝަން މިނިސްޓަރު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. އަލީ ހައިދަރު ދެއްކެވި އެއް ވާހަކަފުޅަކީ ގިނަ ބައެއްގެ ސަމާލުކަން ހުއްޓުނު ކަމެކެވެ. ބޭރު ގައުމުތަކުގައި ތިބި ދަރިވަރުންގެ ހާލަތު ބެލުމަށްޓަކައި އެ ދަރިވަރުން ހިމެނޭ ވަޓްސްއަޕް ގްރޫޕެއް ހެއްދެވުމަށް ރައީސް މުއިއްޒު އެމަނިކުފާނަށް އިރުޝާދު ދެއްވީ ކަމަށް ވިދާޅުވުމުން އެކަން ދެން ވީ ވަރަށް ބޮޑު ޖޯކަ ކަށެވެ.
އެންމެ ފުރަތަމަ އަޅުގަނޑުމެން ވަޓްސްއަޕް ގްރޫޕްތައް ތައާރަފު ކުރީ 50 ދަރިވަރުންނަށް ވުރެ ގިނައިން ދަރިވަރުން ކިޔަވާ ގައުމުތަކުގައި. އެ ގްރޫޕްތައް މެދުވެރިކޮށް ދަރިވަރުންނަށް ވަގުތުން ޖަވާބު ދެވެމުން ދާނެ. މިހާރު ރައީސް ނިންމަވާފަ އޮތީ 25 ދަރިވަރުންނަށް ވުރެ ގިނައިން ތިބި ގައުމުތަކަށް ވެސް ވަޓްސްއަޕް ގްރޫޕްތަކެއް ތައާރަފު ކުރަން.މުއިއްޒުގެ ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު
ހިނި އައީ ކޮންމެހެން ގްރޫޕްތަކެއް ހަދާތީ އެއް ނޫނެވެ. ހިނި އައީ މިފަދަ ކަމެއް ކުރަން ވެސް ރައީސުލްޖުމްހޫރިއްޔާ ނިންމަވާ އިރުޝާދުދެއްވި ވާހަކަ ވިދާޅުވުމުންނެވެ. ހިތަށް އެރީ މިފަދަ ކޮންމެ ކުޑަކުޑަ ކަމެއްގައި ރައީސް އިރުޝާދުދެއްވާ ކަންކުރަންވީ ގޮތް ވިދާޅުވާ ނަމަ މިނިސްޓަރުން މިއީ ކީއްކުރާ ބައެއް ތޯ އެވެ.
އެއީ ރައީސުލްޖުމްހޫރިއްޔާ ފަދަ ގައުމުގެ އެންމެ މަތީ ވެރިޔަކު އިރުޝާދު ދެއްވަންޖެހޭ ވަރުގެ ކަމެއްތޯ ސުވާލު އުފެދުނު އިރު ޓެކްނޮލޮޖީގެ މި ޒަމާނުގައި، މުއާސަލާތު ކުރުމަށް ގްރޫޕް ޗެޓެއް ހެދުމަކީ ކޮންމެ މިނިސްޓްރީއެއްގެ "ޑެސްކް އޮފިސަރު" ފެންވަރުގައި ނިންމާލެވެންޖެހޭނެ އިދާރީ ކަމެއް ކަމަށް ގިނަ ބަޔަކު ގަބޫލުކުރެ އެވެ.
ކޮންމެ ކަމެއްގައި ރައީސް އިރުޝާދު ދެއްވާއިރު އެމަނިކުފާނުގެ މިނިސްޓަރުން ވެސް ކޮންމެ ކަމެއް ވެސް ކުރައްވަނީ ރައީސް ވިދާޅުވެގެންކަން ރައްޔިތުންނަށް އަންގައިދޭން ކުރައްވަނީ އާދަޔާ ޚިލާފު މަސައްކަތްތަކެކެވެ.
އެގޮތުން ދާދި ފަހުން ހުޅުމާލޭގައި އަލަށް ހުޅުވި ޝަހީދު އަލީ ސުކޫލު ގެ ނަމަކީ ވެސް ސީދާ ރައީސް މުއިއްޒު ދެއްވި ނަމެއް ކަމަށް މުއިއްޒުގެ އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެފައި ވާއިރު އެކަން ވެސް ވީ ހެއްވާ ކަމަކަށެވެ. ތާރީހީ ބަތަލުންނަށް ނިސްބަތްކޮށް ސަރުކާރުގެ ބިނާތަކަށް ނަން ދިނުމަކީ ރާއްޖޭގައި އޮންނަ އާދައަކަށް ވާއިރު، މިފަދަ ކޮންމެ ނިންމުމެއްގެ "ކްރެޑިޓް" ރައީސަށް އެރުވުމަކީ ވަޒީރުންގެ ތެރޭގައި އުފައްދާފައިވާ ނިކަން ވަރުގަދަ ސަގާފަތެކެވެ.
ރައީސަށް އޮތް ވަފާތެރިކަން ދެއްކުމަށް ވިޔަސް މިވަރަށް މިކަން ތަކުރާރު ނުކުރިޔަސް ވެދާނެ ނޫންތޯ އެވެ. ކޮންމެ ކަމެއްގައި ގޮތް ނިންމަވާ އިރުޝާދު ދޭން ރައީސް ބޭނުންވާނަމަަ މިއީ ކީއްކުރާ ވަޒީރުންނެއް ތޯ އެވެ. ނުވަތަ ކީއްކުރާ އިސްވެރިންނެއް ތޯ އެވެ.
