ޕީއެންސީން ކައުންސިލް އިންތިޚާބަށް ސަރުކާރުގެ ވަސީލަތްތަކާއި މުވައްޒަފުން ބޭނުންކޮށް، އެމްޑީޕީއަށް ދަނީ ޖެއްސުން ކުރަމުން: ވަހީދު
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި، އެމްޕީއެލްގެ މުވައްޒަފުން ބޭނުންކޮށްގެން ހުޅުމާލޭގައި ޕީއެންސީގެ ބިލްބޯޑުތައް ހަރުކުރާ މަންޒަރު ފެންނަ ވީޑިއޯއެއް އާންމުކޮށް، އެމްޑީޕީގެ ކެމްޕޭން ތަކެއްޗަށް ގެއްލުންދީ ހުރަސްއަޅަމުންދާ ކަމަށް ބުނެފައިވޭ. ނަމަވެސް މިފަދަ ޖެއްސުންތަކާ އެކުވެސް ފަހަތަށް ނުޖެހި އިންތިޚާބުގެ މަސައްކަތްތައް ކުރިއަށް ގެންދާނެ ކަމަށް، މި އިންތިޚާބަށް އެމްޑީޕީން ހަމަޖައްސާފައިވާ ތަރުޖަމާން ވަހީދު ވިދާޅުވެފައިވޭ.
އެމްޑީޕީގެ ކެންޕޭން ޕޯސްޓަރަށް ގެއްލުން ދީފައި. | ރާއްޖެއެމްވީ
ސަރުކާރުގެ ޕާޓީ، ޕީއެންސީން ކުރިއަށް އޮތް ލޯކަލް ކައުންސިލް އިންތިޚާބަށް ސަރުކާރުގެ ވަސީލަތްތަކާއި މުވައްޒަފުން ބޭނުންކޮށް، އެމްޑީޕީއަށް ވަރަށް ގިނަ ގޮތްގޮތުން ޖެއްސުން ކުރަމުންދާ ކަމަށް އެ ޕާޓީން ބުނެފި އެވެ.
ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި، ލޯކަލް ކައުންސިލް އިންތިޚާބަށް އެމްޑީޕީން ހަމަޖައްސާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު ވަނީ ޕީއެންސީން އިންތިޚާބަށް ސަރުކާރުގެ ވަސީލަތްތަކާއި، މުވައްޒަފުން ބޭނުން ކޮށްގެން މަސައްކަތް ކުރާ ވީޑީއޯއެއް އާއްމުންނަށް ދައްކާފަ އެވެ. އަދި ވިދާޅުވީ މިފަހުން ހުޅުމާލޭގައި ޕީއެންސީގެ ބިލްބޯޑުތައް ހަރު ކޮށްފައިވަނީ އެމްޕީއެލްގެ ވަސީލަތްތަކާއި، މުވައްޒަފުން ބޭނުން ކޮށްގެން ކަމަށެވެ.
އަޅުގަނޑުމެންނަށް ސަރުކާރުގެ ވަސީލަތްތަކާއި މުވައްޒަފުން ބޭނުންކޮށްގެން މިއިންތިޚާބަށް ނުފޫޒު ފޯރުވުމަށްޓަކައި ހިންގާ އެތައް ކަމެއްގެ ހެކި ވަނީ ލިބިފައި. އެގޮތުން އަޅުގަނޑު މިހާރު މި ދައްކާލަނީ އެމްޕީއެލްގެ މުވައްޒަފުންނާ ވަސީލަތް ބޭނުންކޮށްގެން ރައީސް އޮފީހުގެ މިނިސްޓަރު އަލީ އާރިފްގެ ކޮއްކޮ މިހުންނަނީ އެމްޕީއެލްގެ އަހުމަދު އާރިފް އާދަމް ފްލީޓް މެނޭޖަރެއްގެ ގޮތުގައި އެބޭފުޅާ އަންގަވައިގެން ކުރުވާ މަސައްކަތެއް ގެ ގޮތުގައި ހުޅުމާލޭގައި ޕޯސްޓަރު ހަރު ކުރުމުގެ މަސައްކަތް ކޮށްފައިވޭ.ލޯކަލް ކައުންސިލް އިންތިޚާބަށް އެމްޑީޕީން ހަމަޖައްސާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު
އެމްޑީޕީގެ ޕޯސްޓަރުތަކާއި، ބިލްބޯޑުތަކަށް ގެއްލުންދޭކަން ފާހަގަކުރައްވައި ވަހީދު ވިދާޅުވީ، މިފަހުން ފުވައްމުލަކު ސިޓީގައި ހަރުކޮށްފައިހުރި އެޕާޓީގެ ޕޯސްޓަރުތަކާއި، ބިލްބޯޑުތަކަށް ގެއްލުންދީފައިވާ ކަމަށެވެ. އަދި ވިދާޅުވީ އައްޑޫސިޓީ މަރަދޫގައި ޖަހާފައި ހުރި ބިލްބޯޑުތަކަށް ގެއްލުން ދީފައިވާއިރު، ޕޯސްޓަރުތަކުގެ ކުރިމަތީގައި ޕީއެންސީގެ ބިލްބޯޑުތައް ޖަހައި ފޮރުވާފައިވާ ކަމަށެވެ.
ވަހީދު ވިދާޅުވީ މިފަދަ ގޮތަކަށް އެމްޑީޕީއަށް ސަރުކާރުން ޖެއްސުން ކުރި ނަމަވެސް ޕާޓީ ފަހަތަށް ނުޖެހޭނެ ކަމަށާއި، އެމްޑީޕީ ދާނީ ކުރިއަށް ކަމަށެވެ.
