ޑޮލަރު ރޭޓު މައްޗަށް ދާތީ ސުވާލު ކުރުމުން ސައީދު ދެއްކެވީ ދެ އިންތިޚާބު އެއްކޮށްލުން މުހިއްމު ވާ ސަބަބުގެ ވާހަކަ

ރައްޔިތުންގެ މަޖިލީހުގެ މެޖޯރިޓީ، ސަރުކާރު ހިންގާ ޕީއެންސީ އަށް ދީފި ނަމަ ޑޮލަރުގެ އަގު ހުއްޓުމެއްނެތި މައްޗަށް ދާ ދިއުން ހުއްޓޭނެ ކަމުގެ ޔަގީންކަން ސަރުކާރުން ދިން ނަމަވެސް މަޖިލީހުގެ ސުޕަ މެޖޯރިޓީ ދިން ތާ ވެސް އަހަރުތަކެއް ފާއިތުވެގެން ގޮސްފައިވާއިރު ވެސް މި މައްސަލައަށް ހައްލު ނުލިބޭތީ ސުވާލު ކުރުމުން ސުވާލަށް ޖަވާބު ނުދެއްވާ، ދެ އިންތިޚާބު އެއްކޮލުމަކީ މުހިއްމު ކަމެއް ކަމަށް ރައީސް ޑރ. މުހައްމަދު މުއިއްޒުގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ. 

2024 ވަނަ އަހަރު ބޭއްވި މަޖިލިސް އިންތިޚާބުގެ ކެމްޕެއިން ގައި ރައްޔިތުންނާ ބައްދަލު ކުރައްވާ މިނިސްޓަރު ސައީދު ވަނީ މަޖިލީހުގެ މެޖޯރިޓީ ލިބިގެން ވިޔަސް ދިވެހި ރުފިޔާ ޑޮލަރުގެ ކުރިމަތީގައި 30 ނުވަތަ 40 ޕަސެންޓް ވަރުގަދަވެގެންދާނެ ކަމަށް ވިދާޅުވެފަ އެވެ. އޭގެ ނަތީޖާ އަކަށް ވެގެންދާނީ މުސްތަގުބަލުގައި 15.42 އަށް ވުރެ ވެސް ޑޮލަރު ރޭޓް ދަށަށް ދިއުން ކަމަށް ވެސް މިނިސްޓަރު ވިދާޅުވި އެވެ. 

އަންގާރަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުމުގައި މަޖިލީހުގެ 75 ގޮނޑި ސަރުކާރަށް ދިންތާ ވެސް އެތައް ދުވަހެއް ވެފައިވާއިރު މިހާތަނަށް ވެސް މިކަމަށް ހައްލެއް ލިބިފައި ނުވާއިރު، ޑޮލަރުގެ އަގު ކުރިއަށް ވުރެ ބޮޑުވަމުންދާތީ އެކަމާ ގުޅިގެން ރާއްޖެޓީވީ އިން ސުވާލު ކުރުމުން މިނިސްޓަރު އެ ސުވާލަށް ޖަވާބުދެއްވާފައެއް ނުވެ އެވެ.

އޭގެ ބަދަލުގައި މިނިސްޓަރު މުޅިން ވެސް ދެއްކެވީ މި ސަރުކާރަށް އޭރުވެސް  މަޖިލީހުގެ ސުޕަ މެޖޯރިޓީ ބޭނުންވީ ކީއްވެގެން ކަމުގެ ވާހަކަ އެވެ. ދެން މިނިސްޓަރު ދެއްކެވީ ދެ އިންތިޚާބު އެއްކޮށްލުމަކީ މުހިއްމު ކަމެއް ކަމަށާ ކައުންސިލް އިންތިޚާބުގައި ވެސް ސަރުކާރު ހިންގާ ޕީއެންސީ ގެ ކެންޑިޑޭޓުންނަށް ވޯޓު ދޭން ޖެހޭ ވާހަކަ އެވެ. ކުރި ސުވާލަށް އެއްވެސް ވަރަކަށް ޖަވާބެއް ނުދެއްވަ އެވެ. 

އުޖާލާ ދުވަސްތަކެއް އަޅުގަނޑުމެންނަށް މި އޮތީ. އަޅުގަނޑު އެދޭނީ ލޯކަލް ކައުންސިލް އިންތިޚާބު ވެސް އަޅުގަނޑުމެންނަށް ލިބުން. އެއާ އެކުއެކީގަ ރިޔާސީ އިންތިޚާބާ މަޖިލިސް އިންތިޚާބު އެއްދުވަހެއްގައި މި ބާއްވާ ބޭއްވުން. އެވެސް ވަރަށް މުހިއްމު. އެއީ މުހިއްމު ވާ ސަބަބަކީ، އިކޮނޮމިކް ސަރޓަނެޓީ ޔަގީން ކުރުމުގައި، ރައްޔިތުންނަށް މި 5 އަހަރަށް ވެވަޑައިގެންފަ ހުރި ވައުދުތައް ފުއްދުމުގަ އަޅުގަނޑުމެންނަށް އެއްބާރުލުން ދޭނެ ގޮތަކަށް މި އިންތިޒާމުތައް ހަމަޖެހުން،

ރައީސް ޑރ. މުހައްމަދު މުއިއްޒުގެ އިކޮނޮމިކް މިނިސްޓަރު މުހައްމަދު ސައީދު

ޑޮލަރު މާރުކުރާ ގްރޫޕުތަކުން ދައްކާ ގޮތުގައި މިއަދު ޑޮލަރެއް ލިބެން ހުރީ 20.20 ރުފިޔާ އާއި 20.05 ރުފިޔާ އާ ދެމެދު ގަ އެވެ. ރާއްޖެ އަށް މުދާ އެތެރެކުރާ ބައެއް ކުންފުނިތަކުން ބުނީ އެ ކުންފުނިތަކަށް ބޭރުން ދޭ ޑޮލަރު ސަޕޯޓު ވެސް ދަށްކުރުމުން ކަޅު ބާޒާރަށް ގޮސް ޑޮލަރު ގަންނަން އިންތިހާ އަށް ދަތިތައް އެބަހުރި ކަމަށެވެ. މީގެ ސަބަބުން މުދާ ގަންނަން ކުރަން ޖެހޭ ހަރަދު ބޮޑުވެ، މުދާ ވިއްކާ އަގު އުފުލުމުގެ ފުރުސަތު އެބައޮތެވެ.

ރައީސް މުއިއްޒު އާއި ސަރުކާރުގެ އިސްވެރިން އަދިވެސް ވިދާޅުވަނީ ޓޫރިޒަމް ވިޔަފާރިތަކުން ޑޮލަރު މާރުކުރަން ފެށުމުން ޑޮލަރުގެ ކަޅު ބާޒާރުގައި އަގުތައް ތިރިކުރެވޭނެ ކަމަށެވެ.

ސަރުކާރުން ގަބޫލުކުރަނީ، މިހާރު ހުރި ބޭރު ފައިސާގެ ސިޔާސަތުތައް ތަންފީޒުކޮށްގެން ޑޮލަރުގެ މައްސަލަ ހައްލުކުރެވޭނެ ކަމަށެވެ. އަދި ކުރިއަށް އޮތް ދެ އަހަރުގެ ތެރޭގައި ރަސްމީ ރޭޓުގައި ޑޮލަރު ލިބޭނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވި ނަމަވެސް މުއިއްޒުގެ ޑޮލަރު ސިޔާސަތު ތަންފީޒު ކުރަން ފެށި ފަހުން ޑޮލަރުގެ އަގު ދަނީ މަތިވަމުންނެވެ.