ރަކީދޫ ރައްޔިތުން ނިކުމެ ކައުންސިލް އިދާރާ ބަންދުކޮށްފި
ރަކީދޫ ކައުންސިލުން ދޭންޖެހޭ އިދާރީ ޚިދުމަތްތައް ލިބެމުން ނުދަނީ، އެ ކައުންސިލުގެ އިދާރީ ހުރިހާ މުވައްޒަފުންނާއި ކައުންސިލުގެ 3 މެންބަރަކު އިސްތިއުފާ ދިނުމާ ގުޅިގެން.
ޚިދުމަތް ނުލިބޭތީ ރައްޔިތުން ނިިކުމެ ވަނީ ވ. ރަކީދޫ ކައުންސިލް އިދާރާ ބަންދުކޮށްފަ | ރާއްޖެ އެމްވީ
ވ. ރަކީދޫ ކައުންސިލްގެ އިދާރީ މުވައްޒަފުންނާއި ކައުންސިލުގެ ތިން މެންބަރުން އިސްތިއުފާ ދިނުމާ ގުޅިގެން، ރައްޔިތުންނަށް ދޭންޖެހޭ ޚިދުމަތްތައް ލިބެމުން ނުދާތީ، އެ ރަށު ރައްޔިތުން ނިކުމެ ހޯމަ ދުވަހު ކައުންސިލް އިދާރާ ބަންދުކޮށްފި އެވެ.
ވ. އަތޮޅު ކައުންސިލްގެ ރައީސް ޝުޖާޢު ޢަލީ އެކްސްގައި ހިއްސާކުރެއްވި ފޮޓޯތަކުން ފެންނަން ހުރި ގޮތުން، ރަކީދޫ ކައުންސިލް އިދާރާގެ ދޮރު ކައިރީ މޭޒުތައް ލައްކޮށް، އިދާރާއަށް ނުވަދެވޭ ގޮތް ހަދައިފައިވެ އެވެ. މި ހަރަކާތަކީ ރައްޔިތުންނަށް ބޭނުންވާ އިދާރީ ޚިދުމަތްތައް ނުލިބި ދަތިވެ، ނުރުހުން ފާޅުކުރުމުގެ ގޮތުން ކުރި ކަމެއް ކަމަށް ބެލެވެ އެވެ.
ޝުޖާޢުގެ ޕޯސްޓުގައި ބުނެފައިވާ ގޮތުން، ރަކީދޫ ކައުންސިލުން ދޭންޖެހޭ އިދާރީ ޚިދުމަތްތައް ލިބެމުން ނުދަނީ، އެ ކައުންސިލުގެ ހުރިހާ އިދާރީ މުވައްޒަފުންނާއި ކައުންސިލުގެ 3 މެންބަރަކު އިސްތިއުފާ ދިނުމާ ގުޅިގެންނެވެ. މުވައްޒަފުން ނެތުމުގެ ސަބަބުން ރައްޔިތުންނަށް ބޭނުންވާ ލިޔުންތައް ހެދުމާއި، އެހެނިހެން ކައުންސިލް ޚިދުމަތްތައް ލިބެމުން ނުދާ ކަމުގެ ކަންބޮޑުވުން ރައްޔިތުން ފާޅުކޮށްފައިވެ އެވެ.
މައުލޫމާތު ލިބިފައިވާ ގޮތުން، ރަކީދޫ ޕޮލިސް ޑެސްކު ވެސް ހިންގަނީ އެ ރަށުގެ ކައުންސިލް އޮފީސް އިމާރާތުގެ އެތެރޭގަ އެވެ. އެހެންކަމުން، ރަކީދޫގައި ހަރަކާތްތެރިވާ ފުލުހުންނަށް ވެސް މިއަދު އޮފީހަށް ނިކުމެވޭނެ ކަމަކަށް ނުބެލެވެ އެވެ. މިއީ ރަށުގެ ސަލާމަތާއި ރައްކާތެރިކަމުގެ ޚިދުމަތްތަކަށް ވެސް ބުރޫ އަރާނެ ކަމެއް ކަމަށް ބެލެވެ އެވެ.
ރަކީދޫގެ އިތުރުން، ކައުންސިލް އޮފީސް ހިންގާނެ އަދަދަށް މުވައްޒަފުން ހަމަނުވާ ވަރަށް، ގިނަ ރަށްރަށުގެ ކައުންސިލްތައް ރާއްޖޭގައި އެބަހުއްޓެވެ. މި މައްސަލަ ދިމާވީ، ދާއީމީ މުވައްޒަފުން ނެގުން މަނާކޮށް ރައީސް މުއިއްޒުގެ ސަރުކާރުން ހަރުކަށި ގާނޫނެއް ފާސްކުރި ފަހުންނެވެ.
ރައީސް މުއިއްޒުގެ ފުރިހަމަ ކޮންޓްރޯލް އޮންނަ ރައްޔިތުންގެ މަޖިލީހުން ފާސްކުރި ގާނޫނުގައި ބުނެފައިވާ ގޮތުން، ކައުންސިލެއްގެ އުމުރުގައި ބާކީ ހަ މަސްދުވަސް އޮތް ނަމަ، އެ ކައުންސިލަކަށް އެއްވެސް ދާއިމީ މުވައްޒަފެއް ނުނެގޭނެ އެވެ. އަދި އެ މުއްދަތުގައި ތަރައްގީގެ އެއްވެސް ޕްރޮޖެކްޓެއް ހިންގުން ވެސް ސަރުކާރުން މަނާކޮށްފައިވެ އެވެ.
މި ގާނޫނުގެ ސަބަބުން، ރާއްޖޭގެ ގިނަ ރަށްރަށުގައި ކައުންސިލް ޚިދުމަތްތައް ހުއްޓުމަކަށް އައިސް، ރައްޔިތުންނަށް ބޭނުންވާ އިދާރީ ޚިދުމަތްތައް ލިބެމުން ނުދާ ކަމަށް ފާހަގަކުރެވެ އެވެ. މުވައްޒަފުން ނެތުމުގެ ސަބަބުން، ރަށްރަށުގެ ތަރައްގީގެ މަސައްކަތްތައް ވެސް ލަސްވެ، ރައްޔިތުންނަށް ބޮޑެތި ދަތިތައް ކުރިމަތިވަމުން އަންނަ ކަމަށް ގިނަ ބަޔަކު ދަނީ ފާހަގަކުރަމުންނެވެ.
