މާލޭގެ ވާހަކަ ދައްކަވާއިރު، މިހާރުގެ ރައީސް، މޭޔަރުކަމުގައި ހުންނެވިއިރު ހެއްދެވި އެކްޝަން ޕްލޭނަށް ވީ ގޮތެއް ބަލާލުން ކީއްތޯ؟
ރައީސް ޑރ. މުއިއްޒު މާލޭގެ މޭޔަރުކަމުގައި ހުންނެވިއިރު ވެވަޑައިގެންނެވި ގިނަ ވައުދުތަކެއް ނުފުއްދޭކަން ފާހަގަކޮށް ފާޑުކިޔުންތައް ވަނީ އަމާޒުވެފަ. މީގެ ތެރޭގައި މާލެ ޑިޖިޓަލައިޒްކުރުމާއި، ކަނބަލުންގެ މާރުކޭޓު ހެދުމާއި، ބޯހިޔާވަހިކަމުގެ އިތުރުން ގޭގެއަށް ޒިޔާރަތްކުރުމަށް ވީ ވައުދުތައް ހިމެނޭއިރު، މި މަސައްކަތްތައް އެކަށީގެންވާ ގޮތެއްގައި ކުރިއަށް ގޮސްފައިނުވާކަން މި ލިޔުމުގައި ފާހަގަކޮށްފައިވޭ.
ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް މުޢިއްޒު | ރައީސް އޮފީސް
ކައުންސިލް އިންތިޚާބާއެކު ރައީސް ޑރ. މުހައްމަދު މުއިއްޒު އަނެއްކާ ވެސް ދައްކަވަނީ މާލޭގެ ކަންކަން ތިމަން މަނިކުފާނަށް އެނގިވަޑައިގަންނަވާނެ ކަމުގެ ވާހަކަ އެވެ. ރައީސަށް ތާއީދު ކުރާ ބޭފުޅުން ވިދާޅުވަނީ މުއިއްޒު އަކީ މަޝްރޫޢުތައް ހިންގުމުގައި މާ ތަޖުރިބާކާރު ބޭފުޅެއް ކަމަށެވެ. އެ ތަޖުރިބާގެ އަލީގައި މާލެ ބަދަލުކޮށްލާނެ ކަމަށް އެތައް ޕްލެޓްފޯމެއްގައި އެބަ ވިދާޅުވެ އެވެ.
މިޒާތުގެ ވާހަކަތައް މާލޭގެ މޭޔަރުކަމަށް ވަޑައިގަތް ދުވަސް ވަރު ވެސް ޚުދު ރައީސް މުއިއްޒު އެއިރު ވެސް ދެއްކެވި އެވެ. ވަޑައިގެންނެވީ ނިކަން ފަށުވި ބަސްތަކުން އަތުރާލާފައިވާ އެކްޝަން ޕްލޭނަކާއި އެކުގަ އެވެ. އެކަމުން ހާސިލްވީ ކިހާ މިންވަރެއްތޯ ނިންމާނީ ތިބޭފުޅުންނެވެ. އެކަންކަން އަޅުގަނޑު ހަނދާންކޮށްދޭނަމެވެ. ވީ ވައުދުތައް އަދި ދިވެހިން ހަނދާން ހުންނާނެ އެވެ.
އެންމެ ފުރަތަމަ ކަމަކަށް އެކްޝަން ޕްލޭންގައި ބުނެފައި ވަނީ، ގޭގެއަށް ޒިޔާރަތްކުރާނެ ވާހަކަ އެވެ. ޝެޑިއުލް އެއް ހަދާ ހަފްތާ އަކު އެއް ދުވަހު އެކަން ކުރައްވާނެ ވާހަކަ އެވެ. ގޭގެއަށް ނުދެވޭ ނަމަ އޮންލައިންކޮށް ވެސް އެކަން ކުރައްވާނެ ވާހަކަ އެވެ. އެކަމަކު އެކަން އެހެން ނުހިނގި ތަނުގައި އެ ވާހަކަ ވެސް ފަހުން ނުދައްކަވަ އެވެ.
ދެންއޮތީ މޮޅު ވަައުދެކެވެ. މާލެ ސިޓީ ކައުންސިލްގެ ހުރިހާ މައުލޫމާތެއް އެއް ޕްލެޓްފޯމަކުން ފަސޭހައިން ހޯދާލެވޭގޮތަށް މުޅި މާލޭ ސިޓީ ކައުންސިލްގެ ހިދުމަތްތައް ޑިޖިޓަލައިޒްކުރާނެ ވާހަކަ އާއި މުޅި މާލެ ވައިފައި ކުރުމުގެ ވައުދު ވެވަޑައިގަތެވެ. އަދި ރައްޔިތުންގެ ޝަކުވާތައް އަޑުއެހުމަށްޓަކައި 24 ގަޑިއިރު ރައްޔިތުންނަށް ހިދުމަތް ދޭ ކޯލް ސެންޓަރެއް ޤާއިމްކުރައްވާނެ ކަމަށް ވެސް ވިދާޅުވި އެވެ. އެކަމަކު މިއިން އެއްވެސް ކަމެއް މި ގޮތަކަށް ނުހިނގަ އެވެ.
މާލެ، ވިލިމާލެ އަދި ހުޅުމާލޭގައި އަންހެންވެރިންނަށް ހާއްސަކޮށް، "ކަނބަލުންގެ އުފެއްދުންތެރިކަމާއި ތަރުކާރީ މާރުކޭޓު" ޤާއިމްކުރާނެ ކަމަށް ވެސް ވިދާޅުވި އެވެ. އެކަން ވެސް ވީ ފަހުން ނުދައްކާ ވާހަކަ އަކަށެވެ. ދެން އޮތީ ފަހު އެކަމަކު އެންމެ މުހިންމު އެއް ވާހަކަ އެވެ. ސިޓީ ކައުންސިލްގެ އެކްޝަން ޕްލޭންގައި އެންމެ ބޮޑު އިސްކަމެއް ދީފައި އޮތީ މާލެ ސިޓީގެ ރައްޔިތުންނަކީ ބިންވެރި ބަޔަކަށް ހެދުމަށެވެ. އެކަން އެއްވެސް މިންވަރަކަށް ހިނގާފަ އެއް ނެތެވެ. ފެހި މާލެ އެއް ޤާއިމްކުރުމަށް ވީ ވައުދު ވެސް އޮތީ އެހެންނެވެ.
ކަން މިހެން އޮތް އިރު މިއަދު އަނެއްކާ ވެސް އިންތިޚާބެއް ކުރިމަތިވުމުން މާލޭ މީހުންގެ މަދަދުގާރަކަށް ވާނެ ކަމުގެ ވާހަކަ ރައީސް ދެއްކެވުމުން މިކަންކަން ހަނދާންކޮށްލުން މުހިންމެވެ. އިހަށް ވީ ވައުދުތައް ނުފުދުނު ސަބަބާއި މޭޔަރު ކަމުގައި ހުންނެވި ދުވަސްވަރުގެ ފަލްސަފާ ވެރިކަމަށް ވަޑައިގެން ކުރިއަށް ނުގެންދަވާ ސަބަބު ސާފުކޮށްދެއްވާށެވެ. އެހެން ނޫނީ އަމަލާއި ބަހާ ދިމާ ނުވެ ގެއްލޭނީ ރައްޔިތުންގެ އިތުބާރެވެ.
