ބަންދު ދުވަސްތަކަށްފަހު ހުޅުވޭ ފުރަތަމަ ހަފްތާގައި ސްޓޫޑެންޓް ލޯނަށް އެދުމުގެ ފުރުސަތު ހުޅުވާލަނީ، މިއަހަރު ލޯނަށް އެދުމުގައި ޑެޑްލައިނެއް ނޯންނާނެ: މިނިސްޓަރު ހައިދަރު
މިނިސްޓަރު ހައިދަރު ވިދާޅުވީ، މިއަހަރުގެ ސްޓޫޑެންޓް ލޯނު ސްކީމަށް އެދުމުގެ ފުރުސަތު މުޅި އަހަރަށް ހުޅުވާލުމަށް ނިންމާފައިވާއިރު، މީގެ ސަބަބުން ވަކި މުއްދަތެއްގެ ތެރޭގައި ފޯމު ހުށަހަޅަންޖެހުމުން، ދަރިވަރުންނަށް ކުރިމަތިވާ ދަތިތަކަށް ހައްލެއް ލިބޭނެ ކަމަށް. އަދި ލޯނަށް އެދޭ ދަރިވަރުން ކިޔަވަން ބޭނުންވާ ދާއިރާއަކުން ޕްލޭސްމަންޓާއި އެހެނިހެން ލިޔެކިޔުންތައް ފުރިހަމަކޮށް ތައްޔާރުވެ ތިބުމަށް އިލްތިމާސްކޮށްފައިވޭ.
ޤައުމީ ޔުނިވާސިޓީގެ ގްރެޖުއޭޝަނެއްގެ ތެރެއިން (ފައިލް ފޮޓޯ) | ރައީސް އޮފީސް
ރަމާޟާން މަހުގެ ފަހު ދިހަައަކާ ގުޅިގެން އަންނަ ސަރުކާރުގެ ބަންދު ދުވަސްތަކަށް ފަހު، ހުޅުވޭ ފުރަތަމަ ހަފްތާގައި ސްޓޫޑެންޓް ލޯނަށް އެދުމުގެ ފުރުސަތު ހުޅުވާލާނެ ކަމަށާއި، ފޯމް ހުށަހެޅުމުގައި ޑެޑްލައިނެއް ނޯންނާނެ ކަމަށް ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ހައިދަރު ވިދާޅުވީ، މިއަހަރު ތައާރަފް ކުރާ ލޯނު ސްކީމަށް ލޯނަށް އެދުމުގެ ފުރުސަތު ހުޅުވާލުމަށްޓަކައި ޕޯޓަލް ތައްޔާރު ކުރުމާއި، އުސޫލު އެކުލަވާލުމުގެ މަސައްކަތް ކުރިއަށްދާ ކަމަށެވެ.
މިނިސްޓަރު ހައިދަރު ވިދާޅުވީ ދަރިވަރުންނަށް ދެމުންދާ ޚިދުމަތްތައް އިތުރަށް ފުރިހަމަ ކުރުމަށް މިއަހަރުގެ ލޯނު ސްކީމަށް މުހިންމު ބަދަލުތަކެއް ގެންނާނެ ކަަމަށެވެ.
އެގޮތުން ސްކީމުގެ ކަންކަން ހަރުދަނާކުރުމަށް ކުރާ މަސައްކަތުގެ ތެރެއިން އެޕްލިކޭޝަން ޑެޑްލައިނެއް ނުބާއްވައި ލޯނަށް އެދުމުގެ ފުރުސަތު މުޅި އަހަރަށް ހުޅުވާލާގޮތަށް ހަމަޖައްސާފައިވާ ކަމަށެވެ. މިހާތަނަށް ދަރިވަރުން ލޯނު ހޯދުމަށް އެދި ހުށަހަޅަން ވަކި މުއްދަތެއް ކަނޑައެޅިފައި އޮތުމުން އެ މުއްދަތުގައި ލޯނަށް ހުށަހެޅުމަށް ބައެއް ދަރިވަރުންނަށް ދަތިވާ ކަމަށާއި، ބައެއް ހާލަތްތަކުގައި ދަރިވަރުންނަށް ލޯނަށް ކުރިމަތިލުމުގެ ފުރުސަތު ވެސް ގެއްލިފައިވާ ކަމަށް މިނިސްޓަރު ހައިދަރު ވިދާޅުވި އެވެ. އަދި ވިދާޅުވީ މި ގެންނަ ބަދަލުގެ ސަބަބުން ލޯނަށް އެދޭ ދަރިވަރުންނަށް ފަސޭހަތަކެއް ލިބޭނެ ކަމަށް މިނިސްޓަރު ހައިދަރު ވިދާޅުވި އެވެ.
މީގެ އިތުރުން މިނިސްޓަރު ހައިދަރު ވިދާޅުވީ، ލޯނަށް އެދެން ވާނީ ކިޔަވަން ފުރިހަމަ އަށް ތައްޔާރު ވެގެން ކަމަށާއި، މިފަހަރު ލޯނު ހޯދުމަށް ހުށަހަޅާ ލިޔުންތައް ތަފާތުވާނެ ކަމަށެވެ. އަދި ވިދާޅުވީ، ކުރު މުއްދަތެއްގެ ތެރޭގައި ކިޔެވުން ފެށޭގޮތަށް، ކިޔަވައިދޭ މަރުކަޒުން ދޫކޮށްފައި އޮންނަ ޕްލޭސްމަންޓް/ އޮފަރ ލެޓަރ، ފުރިހަމަކުރަން ބޭނުންވާ ޕްރޮގްރާމްގެ ފީ ސްޓްރަކްޗަރ، އެމްކިޔުއޭ. އިން ދޫކުރާ އިންޓެންޑެޑް ޕްރޮގްރާމް ރެކޮގްނިޝަން ލެޓަރގެ އިތުރުން މަސައްކަތްކުރުމަށް ރެގިޔުލޭޓަރީ އޮތޯރިޓީއަކުން ހުއްދަދޭ ދާއިރާއަކުން ކިޔަވާނަމަ، އެ ފުރިހަމަކުރާ ޕްރޮގްރާމަކީ އެ އޮތޯރިޓީން ހުއްދަ ދޭ ޕްރޮގްރާމެއްކަން އަންގައިދޭ ލިޔުން ހުށަހަޅަން ޖެހޭ ކަމަށެވެ.
މިނިސްޓަރު ހައިދަރު ވިދާޅުވީ ކުރިއަށް އޮތީ ސަރުކާރު ބަންދު ދުވަސްތަކެއް ކަމަށާއި، މިދުވަސްތަކަށް ފަހު ސަރުކާރު ހުޅުވޭ ހަފްތާގައި ލޯނަށް، ފޯމް ހުށަހެޅުމުގެ ފުރުސަތު ހުޅުވާލައްވާނެ ކަމަށެވެ.
މިދަނީ ލޯނަށް އެދުމުގެ ދޮރު ހޮޅުވާލުމުގެ މަސައްކަތް ކުރަމުން. އިރާދަކުރެއްވިއްޔާ މިފެށޭ ބަންދުތަކަށް ފަހު ފެށޭ ހަފްތާގައި ފުރުސަތު ހުޅުވާލެވޭނެ. އެހެންކަމުން ލޯނަށް އެދެން ބޭނުންވާ ދަރިވަރުންނަށް އަޅުގަނޑު އިލްތިމާސް ކުރަނީ އިސްވެ ދެންނެވުނު ލިޔުންތައް ފުރިހަމަކޮށް ތައްޔާރު ވެގެން ތިއްބެވުމަށް. ފުރިހަމަ އެޕްލިކޭޝަނެއް ހުށަހަޅާ ދަރިވަރަކަށް ލޯނު ފައިސާ ހަމަޖެހިގެންދާނެ. އެހެން އަހަރުތަކާ އަޅާބަލާއިރު، ވަރަށް ބޮޑު ތަން އަވަސްވާނެ މިއަހަރު.ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު
މިސަރުކާރުގައި ސްޓޫޑެންޓް ލޯނު ވަނީ ޝަރީޢާ ކޮމްޕްލަޔަންޓް ލޯނަކަށް ބަދަލު ކޮށްފަ އެވެ. އެއާއެކު ލޯނުގެ ފައިސާ އަނބުރާ ދައްކާއިރު އެއްވެސް އިތުރު ސަރވިސް ޗާޖެއް ނުނަގާނެ އެވެ.
މިއަހަރު ވެސް ސްޓޫޑެންޓް ލޯނަށް ބަދަލު ގެންނާނެ ކަމަށް މިނިސްޓަރު ހައިދަރު ވިދާޅުވެފައިވާއިރު، ލޯނުގެ ފައިސާ ނުލިބޭ މައްސަލައާއި، ސަރުކާރުގެ ހަރަދުގައި ކިޔަވަންދާ ދަރިވަރުންނަށް ކޮލެޖް/ޔުވަރިސިޓީގެ ފީ ނުދައްކާ މައްސަލަ ދޭތެރެދޭތެރެއިން ބޮޑުވެ އެވެ.
