ޒަޔަނިސްޓް އިޒްރޭލު މުޅިން ނައްތާލެވެންދެން، އެންމެ ފަހު ވަގުތާ ޖެހެންދެން އީރާނުން ހަމަލާ ދިނުމުގައި ދެމި އޮންނާނެ: އައިއާރުޖީސީ

އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ހާމަކޮށްފައިވާ ގޮތުގައި، އިސްލާމީ ޖުމްހޫރިއްޔާއަށް އަމާޒުކޮށް އިޒްރޭލާއި އެމެރިކާއިން އަލުން ފެށި އުދުވާނަށް ރައްދު ދިނުމުގެ ގޮތުން ކުރިއަށްގެންދާ "އޮޕަރޭޝަން ޓްރޫ ޕްރޮމިސް 4" ގެ 16 ވަނަ ބުރުގެ ހަމަލާތައް މިހާރު ވަނީ ކާމިޔާބުކަމާއެކު ފޮނުވާލާފައެވެ.

އަންގާރަ ދުވަހުގެ ރޭގެ ވަގުތެއްގައި އައިއާރުޖީސީން ނެރުނު ބަޔާނެއްގައި ބުނެފައިވަނީ، އެ ކޯޕްސްގެ އެއަރޯސްޕޭސް ޑިވިޝަނުން ފޮނުވާލި މިސައިލާއި ޑްރޯންތަކުން އިޒްރޭލުން އިސްތިއުމާރުކޮށްފައިވާ ފަލަސްތީނުގެ މެދުތެރެއާއި އުތުރުގެ ސަރަހައްދުތަކަށް ވަރުގަދަ ހަމަލާތަކެއް ދީފައިވާ ކަމަށެވެ.

މި ހަމަލާތަކުގައި އަމާޒުކުރި ތަންތަނުގެ ތެރޭގައި ހަކިރިޔާގައި ހުންނަ އިޒްރޭލު ސިފައިންގެ ޖެނެރަލް ސްޓާފް އޮފީހާއި އެ ގައުމުގެ މިނިސްޓްރީ އޮފް ވޯ (ދިފާއީ ވުޒާރާ) އާއި، ބްނެއި ބްރަކްގައި ހުރި މުހިންމު އިންފްރާސްޓްރަކްޗާތަކާއި، ތަލް އަވީވުގެ އިރުއުތުރުގައިވާ ބެއިތް ހަކްފާގައި ހުރި އަސްކަރީ އަމާޒުތަކުގެ އިތުރުން ހުޅަނގު ގަލީލީގައި ހުންނަ އަސްކަރީ މަރުކަޒު ހިމެނޭ ކަމަށް އެ ބަޔާނުގައި ފާހަގަކޮށްފައިވެއެވެ.

އައިއާރުޖީސީން ބުނި ގޮތުގައި، ޖާސޫސީ މަސްދަރުތަކުންނާއި މައިދާނުން ލިބިފައިވާ މައުލޫމާތަށް ބަލާއިރު، ބަދަލުހިފުމުގެ މި ހަމަލާތަކުގެ ހަތަރުވަނަ ދުވަހާ ހަމައަށް އައިއިރު ދުޝްމަނުންގެ އަސްކަރިއްޔާއިން މަރުވި މީހުންނާއި ޒަޚަމްވި މީހުންގެ އަދަދު ވަނީ 680 އަށްވުރެ މައްޗަށް އަރާފައެވެ.

އިޒްރޭލުން އިސްތިއުމާރުކޮށްފައިވާ ސަރަހައްދުތަކުގެ މަލްޓި-ލޭޔަރ ޑިފެންސް ސިސްޓަމްތަކުގެ އޮޕަރޭޝަނަލް ބަލިކަށިކަމާއި، ޓެކްނިކަލް މައްސަލަތަކުގެ އިތުރުން، ހަމަލާތައް ދެނެގަތުމުގެ ގާބިލުކަން ކުޑަވުމުގެ ސަބަބުން، އީރާނުގެ މިސައިލްތަކާއި ޑްރޯންތަކަށް އެ ސަރަހައްދުތަކުގެ ވައިގެ ސަރަހައްދަށް ވަދެ، އަމާޒުތަކަށް ހަމަލާދިނުމަށް ފަހި މަގުތަކެއް ހުޅުވިގެންދިޔަ ކަމަށް އެ ބަޔާނުގައި ބުނެފައިވެއެވެ.

މީގެ އިތުރުން، އިސްތިއުމާރުކޮށްފައިވާ ސަރަހައްދުތަކުގެ މެދުތެރެއިން މެދުނުކެނޑި ދުމާއި ހިރަފުސް އަރަމުންދިއުމަކީ، ކުޑަކުދިން މަރަމުންދާ ދުޝްމަނުންގެ އަސްކަރީ އަދި ސަލާމަތީ ބިންގަލަށް އިސްލާމީ ޖުމްހޫރިއްޔާއިން ދެމުންދާ ވަރުގަދަ ހަމަލާތަކުގެ ހެއްކެއް ކަމަށްވެސް އައިއާރުޖީސީން ބުނެއެވެ.

"އީރާނުގެ ހަތިޔާރު އެޅި ސިފަައިންގެ އަޒުމަކީ ރޭވުންތެރިކަމާއެކު މި އޮޕަރޭޝަންތައް ކުރިއަށް ގެންގޮސް، ޒަޔަނިސްޓް ރެޖީމްގެ އަސްކަރީ އިންފްރާސްޓްރަކްޗާ ބަލިކޮށްލުން،" ބަޔާނުގައިވެއެވެ.

އަދި މި ސަރަހައްދުގައި ފެތުރިފައިވާ ނުރައްކާތެރި އިސްތިއުމާރީ ބާރު (ޒަޔަނިސްޓް ރެޖީމް) މުޅިން ނައްތާލެވެންދެން، އެންމެ ފަހު ވަގުތާ ޖެހެންދެން އީރާނުން މި އަޒުމުގައި ދެމިއޮންނާނެ ކަމަށްވެސް ބުނެފައިވެއެވެ.

އައިއާރުޖީސީ: އެއްގަމު ސިފައިން ހަނގުރާމައިގެ މައިދާނަށް

މީގެ އިތުރުން، އައިއާރުޖީސީން ވަނީ އެ ކޯޕްސްގެ އެއްގަމު ސިފައިންވެސް އިޒްރޭލާއި އެމެރިކާއާ ދެކޮޅަށް ހަނގުރާމައިގެ މައިދާނަށް ނުކުމެފައިވާކަން އިއުލާނުކޮށްފައެވެ. އެގޮތުން އެއްފަހަރާ ތިން އޮޕަރޭޝަނެއް ފަށައި، 230 އަށްވުރެ ގިނަ ޑްރޯން ބޭނުންކޮށްގެން ހަމަލާދީފައިވާ ކަމަށް ބުނެފައިވެއެވެ.

މިހާތަނަށް ހިންގި އޮޕަރޭޝަންތަކުގެ ތަފްސީލު ހާމަކުރަމުން އައިއާރުޖީސީން ބުނީ، އިރާގުގެ އުރުބިލްގައި ހުންނަ އެމެރިކާގެ އަސްކަރީ މަރުކަޒަށް އެތައް ޑްރޯން ހަމަލާއެއް ދީފައިވާ ކަމަށާއި، އިރާގުގެ އުތުރުގައި ހަރަކާތްތެރިވާ ޓެރަރިސްޓް ގްރޫޕްތަކުގެ މަރުކަޒުތައް އެކި ފަހަރު މަތިން ސުންނާފަތިކޮށްފައިވާ ކަމަށެވެ. އަދި ކުވެއިތުގައި ހުންނަ އެމެރިކާގެ އަލީ އަލް-ސާލިމް އަދި އަރިފްޖާން ބޭސްއަށްވެސް ދޭތެރެ ދޭތެރެއިން ޑްރޯން ހަމަލާތައް ދެމުންދާ ކަމަށް ބުނެފައިވެއެވެ.

މި ހަމަލާތަކާ ގުޅޭގޮތުން އީރާނުގެ އަސްކަރިއްޔާއާއި އައިއާރުޖީސީގެ އޮޕަރޭޝަންތައް ކޯޑިނޭޓްކުރާ އެންމެ މަތީ މަރުކަޒު ކަމަށްވާ ޚާތަމް އަލް-އަންބިޔާ ސެންޓްރަލް ހެޑްކުއާޓާޒްގެ ތަރުޖަމާނު ލެފްޓިނަންޓް ކާނަލް އިބްރާހީމް ޒުލްފަގާރީ ވިދާޅުވީ، "އޮޕަރޭޝަން ޓްރޫ ޕްރޮމިސް 4" ގެ ދަށުން އީރާނުގެ ސިފައިން ދަނީ މި ސަރަހައްދުގައި ހުރި ދުޝްމަނުންގެ ނާޒުކު އަދި މުހިންމު މަރުކަޒުތަކަށް ވަރުގަދަ ހަމަލާތަކެއް ދެމުންނެވެ.