އީރާނުގެ ސުޕްރީމް ލީޑަރު އައްޔަންކުރާ މަޖިލިސް ބާއްވަމުން ދިޔަ އިމާރާތައް ބޮން އަޅައިފި
އީރާނުގެ ގުމް ސިޓީގައި ހުންނަ "އެސެމްބްލީ އޮފް އެކްސްޕާޓްސް" ގެ އިމާރާތަށް އެމެރިކާ އާއި އިޒްރޭލުން ދިން ހަމަލާތަކެއްގައި އެ ތަނަށް ބޮޑެތި ގެއްލުންތަކެއް ލިބިއްޖެ. މި ހަމަލާތައް އަމާޒުވެފައި މިވަނީ އީރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ އަވަހާރަކޮށްލާފައިވާ ދަނޑިވަޅެއްގައި. މީޑިއާތަކުން އާންމުކުރި ވީޑިއޯތަކުން ފެންނަ ގޮތުގައި މި ހަމަލާގެ ސަބަބުން އެ އިމާރާތުގެ ބޮޑު ބައެއް ވަނީ ސުންނާފަތިވެފައި.
ތެހެރާންގައި 2019 ވަނަ އަހަރުގެ މާރިޗު މަހުގެ 12 ވަނަ ދުވަހު ބޭއްވި އީރާނުގެ އެސެމްބްލީ އޮފް އެކްސްޕާޓްސްގެ ބައްދަލުވުމެއްގައި އެ މަޖިލީހުގެ މެންބަރުން ބައިވެރިވެވަޑައިގަންނަވަނީ. | އޭއެފްޕީ
އިޒްރޭލާއި އެމެރިކާއިން އަންގާރަ ދުވަހު ދިން ހަމަލާތަކެއް، އީރާނުގެ އެންމެ މަތީ ވެރިޔާ ނުވަތަ ސުޕްރީމް ލީޑަރު އައްޔަންކުރުމުގެ މަސްއޫލިއްޔަތު އަދާކުރާ މަޖިލީހުގެ އިމާރާތަށް އަމާޒުވެފައިވާ ކަމަށް އެ ގައުމުގެ ދައުލަތާ ގުޅުންހުރި މީޑިއާތަކުން ރިޕޯޓްކޮށްފިއެވެ.
އީރާނުގެ ތަސްނީމް ނިއުސް އެޖެންސީން ބުނި ގޮތުގައި، އެމެރިކާ އާއި ޒަޔަނިސްޓު މުޖުރިމުން ހަމަލާދީފައިވަނީ ތެހެރާންގެ ދެކުނުން އޮންނަ ގުމް ސިޓީގައި ހުންނަ "އެސެމްބްލީ އޮފް އެކްސްޕާޓްސް" (މަޖިލިސް-އޭ ޚުބްރެގާން) ގެ އިމާރާތަށެވެ.
އެ ސަރަހައްދުގެ މީޑިއާތަކުން އާންމުކުރި ވީޑިއޯ ފުޓޭޖްތަކުން ފެންނަ ގޮތުގައި، ދިން ހަމަލާތަކުގެ ސަބަބުން އެ އިމާރާތަށް ވަނީ ބޮޑެތި ގެއްލުންތަކެއް ލިބިފައެވެ.
އެމެރިކާ އާއި އިޒްރޭލުން މިދިޔަ ހޮނިހިރު ދުވަހު ދިން ހަމަލާތަކެއްގައި އީރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ ވަނީ އަވަހާރަކޮށްލާފައެވެ.
