ލަސް ތަކެއް ނުވެ، އީރާން އިން އައު ރޫހާާނީ ލީޑަރަކު އައްޔަން ކުރާނެ

އެމެރިކާ އިން ދިން ހަމަލާ ތަކެއްގައި އީރާންގެ އެންމެ މަތީ ވެރިޔާ، އަދި އެ ޤައުމުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލާފައިވާއިރު، ލަސް ތަކެއް ނުވެ އެ ޤައުމުން އައު ރޫހާނީ ލީޑަރަކު އައްޔަން ކުރާނެ ކަމަށް ބުނެފި އެވެ. 

އަންގާރަ ދުވަހު އެހެން ވިދާޅުވެފައި ވަނީ، އީރާންގެ އެސެމްބްލީ އޮފް އެކްސްޕާޓްސްގެ މެމްބަރެކެވެ. އޭނާއާ ހަވާލާދީ މީޑިއާ ތަކުގައި އެ ވާހަކަ ގެނެސްފައިވާއިރު، އީރާާންގެ ނިއުސް އެޖެންސީ ތަކުން ބުނެފައި ވަނީ ރޫހާނީ ލީޑަރު ހޮވުމުގެ ޒިންމާ މަތި ކޮށްފައިވާ މަޖިލީހުން މިހާރު އެ މަސައްކަތް ކުރިއަށް ގެންދަމުން އަންނަ ކަމަށެވެ. 

އެމެރިކާގެ ހަމަލާ ތަކުގައި ހޮނިހިރު ދުވަހު ޚާމަނާއީ އަވަހާރަ ވެފައިވާއިރު، އީރާންގެ ވެރިކަން ބަދަލު ކުރުމުގެ ކަންކަން ކުރިއަށް ގެންދާނެ ގޮތުގެ ޕްލޭން އާދީއްތަ ދުވަހު ހާމަ ކޮށްފައިވެ އެވެ. އެ ޕްލޭންގެ ދަށުން، އައު ރޫހާނީ ލީޑަރަކު އިންތިޚާބު ކުރެވެންދެން، އީރާންގެ ކަންކަން ކުރިއަށް ގެންދިޔުމަށް ވަގުތީ ކައުންސިލެއް ވެސް އެކުލަވާލާފައިވެ އެވެ. 

އެ ވަގުތީ ކައުންސިލްގައި ހިމެނި ވަޑައިގަންނަވަނީ އީރާންގެ ރައީސް މަސްއޫދު ޕެޒެޝްކިއާން އާއި، އެ ޤައުމުގެ އުއްތަމަ ފަނޑިޔާރުގެ އިތުރުން، ދީނީ އިލްމުވެރިންގެ ތެރެއިން ބޭފުޅެކެވެ. މި ކައުންސިލް އަކީ އީރާންގެ ޤާނޫނުތައް މުޠާލިއާކޮށް، އިންތިޚާބަކަށް ކުރިމަތިލާ ކެންޑިޑޭޓުންގެ ޝަރުތު ފުރިހަަމަވޭތޯ ބަލައި، އަދި އެކަމާ ގުޅޭ ކަންކަން ކަނޑައަޅާނެ އެންމެ މަތީ މަޖިލީހެވެ. 

އުމުރުފުޅުން މިހާރު 71 އަހަރުވެފައިވާ އީރާންގެ ރައީސް ޕެޒެޝްކިއާން އަކީ، އައު ރޫހާނީ ލީޑަރު އައްޔަން ކުރެވެންދެން ޤައުމު ހިންގުމުގައި އެންމެ އިސްކޮށް ޙަރަކާތްތެރި ވާނެ އެއް ފަރާތެވެ. ހިތުގެ ބަލި ތަކަށް ޚާއްސަ ޑޮކްޓަރެއްގެ ގޮތުގައި މަޝްހޫރުވެފައިވާ، އަދި އިސްލާހީ މަސައްކަތުގަައި ވެސް އުޅުއްވާފައިވާ ޕެޒެޝްކިއާން، އީރާންގެ ރައީސް ކަަމަށް ވަޑައިގެންނެވީ 2024 ވަނަ އަހަރުގެ ޖޫން މަހުގެ ތެރޭގަ އެވެ. 

އެއީ ޕެޒެޝްކިއާންގެ ކުރިން އީރާންގެ ރައީސް ކަމުގައި ހުންނެވި، އިބްރާހީމް ރައިސީ އަވަހާރަ ވުމާ ގުޅިގެންނެވެ. ރައިސީ އަވަހާރަވެފައި ވަނީ އެމަނިކުފާނު ދަތުރު ކުރައްވަމުން ގެންދެވި ހެލިކޮޕްޓަރު ވެއްޓުނު ހާދިސާގަ އެވެ. އީރާންގެ މަސްރަހު އޮތް ގޮތުން، އައު ރޫހާނީ ލީޑަރަކު ކަނޑައެޅުމަކީ އެ ޤައުމަށް ވަރަށް މުހިންމު ކަމަކަށް ވާނެ އެވެ.