ޗައިނާއާ ގުޅިގެން، އީރާން ހަނގުރާމަ ހައްލު ކުރަން މަސައްކަތް ކުރާނެ ކަމަށް ފްރާންސް އިން ބުނެފި

އެމެރިކާ އާއި އިޒްރޭލް އިން އީރާން އަށް ހަމަލާ ދިނުމުގެ ސަބަބުން ފެށިފައިވާ ހަނގުރާމަ ހައްލު ކުރުމަށް، ޗައިނާއާ އެކު މަސައްކަތް ކުރަން ފްރާންސް އިން އެއްބަސްވެފައިވާ ކަމަށް ބުނެފި އެވެ.

ފްރާންސްގެ ފޮރިން މިނިސްޓްރީ އިން އެކަން ހާމަ ކޮށްފައިވާއިރު، ހޯމަ ދުވަހު ފްރާންސްގެ ފޮރިން މިނިސްޓަރު ޖީން ނޮއެލް ބަރޮޓް އާއި، ޗައިނާގެ ފޮރިން މިނިސްޓަރު ވަންގް ޔީ ވަނީ ފޯނުން ގުޅުއްވައި މަޝްވަރާ ކުރައްވައިފަ އެވެ. 

ފްރާންސްގެ ފޮރިން މިނިސްޓްރީ އިން ނެރެފައިވާ ބަޔާނުގައި ބުނެފައި ވަނީ، އީރާންގެ ރައްޔިތުންގެ އުންމީދުތައް ކަށަވަރު ކޮށްދޭނެ ސިޔާސީ ޙައްލެއް ހޯދުމުގެ މަސައްކަތް ކުރުމަށް، ދެ ޤައުމުގެ ފޮރިން މިނިސްޓްރީ އިން އެއްބަސްވެފައިވާ ކަމަށެވެ. އަަދި އެއީ ހަމަޖެހޭ، ސަލާމަތާއި ރައްކާތެރިކަން ކަށަވަރު ކޮށްދޭނެ ކަމެއް ކަމަށް ވެސް ފާހަގަ ކޮށްފައިވެ އެވެ. 

އެމެރިކާ އާއި އިޒްރޭލް އިން އީރާން އަށް ދިން ހަމަލާގެ ސަބަބުން، އޭގެ ރައްދުގައި އީރާން އިން ވެސް ގެންދަނީ ހަމަލާ ތަކެއް ދެމުންނެވެ. އެކަމާ ގުޅޭ ގޮތުން ފްރާންސްގެ ފޮރިން މިނިސްޓަރު ބަރޮޓް ވިދާޅުވެފައި ވަނީ، ސަރަހައްދުގެ ހަމަޖެހުން ގެއްލި، ޙާލަތު ގޯސްވުމުގެ ޒިންމާ އީރާންގެ ވެރިން ނަންގަވަން ޖެހޭނެ ކަމަށެވެ. 

މީގެ އިތުރުން ބަަރޮޓް ވިދާޅުވީ، އީރާންގެ ނިއުކްލިއާ ޕްރޮގްރާމް އާއި، ބެލިސްޓިކް މިސައިލްގެ ޙަރަކާތް ތަކާއި، އަދި ޓެރަރިސްޓު ޖަމާއަތް ތަަކަށް އެ ޤައުމުން ދޭ އެހީތެރިކަމާ ގުޅޭ ގޮތުން އދ.ގެ ސަލާމަތީ މަޖިލީހުން ނެރުނު ޤަރާރަށް އީރާން އިން އިހުތިރާމް ކޮށްފައި ނުވާ ކަމަށެވެ. އެކަމަށް ފާޑު ވިދާޅުވެ ބަރޮޓް ވަނީ، ހެޔޮ ނިޔަތުގައި ކަންކަން ކުރިއަށް ގެންދިޔުމަށް މަޝްވަރާ ދިން ޤައުމު ތަކުގެ މަޝްވަރާ އީރާން އިން ބަަލައި ގެންފައި ނުވާ ކަމަށް ވެސް ވިދާޅުވެފަ އެވެ. 

އިތުރަށް ބަރޮޓް ވިދާޅުވީ، އެމެރިކާ އާއި އިޒްރޭލް އިން އީރާން އަށް ދެމުން އަންނަ ހަމަލާ ތަކުގައި ފްރާންސްގެ އެއްވެސް ބައިވެރިވުމެއް ނޯންނާނެ ކަމަށެވެ. އަދި އެ ހަމަލާތައް ދިނުމުގެ ކުރިން، ފްރާންސް އަށް އެއްވެސް މައުލޫމާތެއް ވެސް ލިބިފައި ނުވާ ކަމަށް އޭނާ ވިދާޅުވި އެވެ. އެއާ އެކު އޭނާ ވިދާޅުވީ، ޤައުމު ތަކުގައި އޮތް މައްސަލަ ޙައްލު ކުރުމަށް ބައިނަލްއަޤުވާމީ މުއައްސަސާ ތަކުން އިސްކަން ދޭން ޖެހޭ ކަމަށާއި، ބޭނުންވާ ހިސާބުން ބާރުގެ ބޭނުން ވެސް ކުރަން ޖެހޭ ކަމަށެވެ. 

މި މައްސަލައިގައި ޗައިނާ އާއި ފްރާންސްގެ މިނިސްޓަރުން ވަނީ، އަބަދު ވެސް މަޝްވަރާ ކުރުމުގެ ފުރުސަތު ބޭއްވުމަށް އެއްބަސްވެ ވަޑައިގެންފަ އެވެ. ދެ ޤައުމުގެ ފޮރިން މިނިސްޓަރުން މަޝްވަރާ ކުރައްވާފައިވާއިރު، ޗައިނާ އިން ވަނީ، އީރާންގެ ސިޔާދަތު ރައްކާތެރި ކުރުމަށް ކުރަމުން އަންނަ މަސައްކަތަށް ތާއީދު ކުރާ ކަމަށް ވެސް ހާާމަ ކޮށްފަ އެވެ.