އީރާންގެ ރައީސް ޕެޒެޝްކިއާންގެ އޮފީހަށް އިޒްރޭލް އިން ހަމަލާ ދީފި

އީރާންއާ ދެކޮޅަށް އެމެރިކާ އާއި އިޒްރޭލް އިން ކުރިއަށް ގެންދާ ހަނގުރާމައިގައި، އީރާންގެ ރައީސް މަސްއޫދު ޕެޒެޝްކިއާންގެ އޮފީހާއި، އެ ޤައުމުގެ ނެޝަނަލް ސެކިއުރިޓީ ކައުންސިލް އިމާރާތަށް ހަމަލާ ދީފައިވާ ކަމަށް އިޒްރޭލް އިން ބުނެފި އެވެ. 

އަންގާރަ ދުވަހު އިޒްރޭލްގެ އަސްކަރިއްޔާ އިން ބުނެފައި ވަނީ، އީރާންގެ ރައީސްގެ އޮފީހާއި، އެ ޤައުމުގެ ނެޝަނަލް ސެކިއުރިޓީ ކައުންސިލްގެ އިމާރާތަށް ވައިގެ މަގުން ހަމަލާ ދީފައިވާ ކަމަށެވެ. 

އިޒްރޭލް އިން ބުނެފައި ވަނީ، އެ ހަމަލާ ތަކުގައި އީރާންގެ ވެރި ރަށް ތެހެރާންގެ މެދު ތެރޭޣައި ހުންނަ އެ ޤައުމުގެ ވެރިކަން ކުރާ ކޮމްޕައުންޑުގެ ތެރޭގައި ހުރި މުހިންމު ވަސީލަތް ތަކަށް އަމާޒުކޮށް ހަމަލާދީ، އެ ތަންތަން ސުންނާފަތި ކޮށްލާފައިވާ ކަމަށެވެ. އެ ބަޔާނުގައި އިޒްރޭލް އިން ވަނީ، އީރާންގެ ސަރުކާރަކީ ޓެރަރިސްޓު ވެރިކަމެއްގެ ގޮތުގައި ސިފަ ކޮށްފަ އެވެ. 

މި ހަމަލާގެ އިތުރު ތަފްސީލް ހާމަ ކުރަމުން އިޒްރޭލްގެ އަސްކަރިއްޔާ އިން ބުނީ، އެ ކޮމްޕައުންޑަށް ދިން ހަމަލާ ތަކުގައި އީރާންގެ ރިޔާސީ އޮފީހާއި، ނެޝަނަލް ސެކިއުރިޓީ ކައުންސިލް އިމާރާތަށް ގިނަ އަދަދެއްގެ ބޮން އަޅާފައިވާ ކަމަށެވެ. މިއީ އީރާންގެ އެންމެ މަތީ ފަންތީގެ ނިންމުންތައް ނިންމާ މަރުކަޒު ތަކަށް އަމާޒުކޮށް ދެވުނު ނުރައްކާތެރި ހަމަލާ ތަކެކެވެ. 

މި ހަމަލާ ތަކަކީ ސަރަހައްދީ ގޮތުން މަސްރަހު ގޯސްވެފައިވާ ދަނޑިވަޅެއްގައި، އީރާންގެ އަސްކަރީ ވެރިންނާއި، ސިޔާސީ ވެރިންގެ ބާރުތަކާ ދެކޮޅަށް އެމެރިކާ އާއި އިޒްރޭލް އިން ދެމުން އަންނަ ހަމަލާ ތަކެކެވެ. އީރާންގެ ރައީސްގެ އޮފީހަށް ހަމަލާ ދީފައިވާ ކަމަށް އިޒްރޭލް އިން ބުނެފައިވާއިރު، އީރާން އިން މިހާތަނަށް ވަކި އެއްޗެއް ބުނެފައި ނުވެ އެވެ. 

އެމެރިކާގެ ހަމަލާ ތަކުގައި އީރާންގެ އެންމެ މަތީ ވެރިޔާ، އަދި ރޫހާނީ ލީޑަރު އާޔަތުﷲ އަލީ ޚާމަނާއީ އާއި، އެ ޤައުމުގެ އިސް ކޮމާންޑަރުން ތަކެއް ވެސް ވަނީ އަވަހާރަވެފަ އެވެ.