އީރާނަށް ނަތަންޔާހޫގެ ބައްދަލުވުންތަން ބާއްވާތަން އެނގޭ: އައިއާރުޖީސީ ކޮމާންޑަރު
އޭނާ ވިދާޅުވި ގޮތުގައި އެމެރިކާގެ ރައީސް ޓްރަމްޕް މި ހަނގުރާމައިގެ ތެރެއަށް ވެއްޓުނީ ނަތަންޔާހޫ ދިން ދޮގު މައުލޫމާތުތަކުގެ ސަބަބުން ކަމަށާއި، އެމެރިކާއިން ގެންދަނީ އިޒްރޭލަށް ޓަކައި އެ ގައުމުގެ މަސްލަހަތު ގުރުބާން ކުރަމުން. މީގެ އިތުރުން، އީރާނުގެ އަސްކަރީ ބާރު މިހާރު ދިހަގުނަ އިތުރުވެފައިވާ ކަމަށާއި، ދުޝްމަނުންގެ މަކަރުވެރި ރޭވުންތަކަށް އީރާނުން ފާރަވެރިވެފައިވާ ކަމަށްވެސް ސަފަވީ ފާހަގަކުރެއްވި.
އިސްލާމިކް ރިވެލޫޝަނަރީ ގާޑް ކޯޕްސް (އައި.އާރް.ޖީ.ސީ) ގެ ކުރީގެ ކޮމާންޑަރު ޔަހްޔާ ރަހީމް-ސަފަވީ. | ޕްރެސްޓީވީ
ނަތަންޔާހޫގެ ބައްދަލުވުންތައް ބާއްވާ ތަންތަން އީރާނަށް އެނގޭ ކަމަށް، އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ކުރީގެ ކޮމާންޑަރު ވިދާޅުވެއްޖެއެވެ. މިއީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއަށް އަމާޒުކޮށް ހަމަލާދިނުމުގެ ޖާސޫސީ ގާބިލުކަން އައިއާރުޖީސީއަށް ލިބިފައިވާކަން އީރާނުން ހާމަ ކުރުމުގެ ގޮތުން އޭނާ ދެއްކެވި ވާހަކަފުޅެއް ކަމަށް ބެލެވެ އެވެ.
ހޯމަ ދުވަހުގެ ރޭ ދައުލަތުގެ ޓީވީން ދެއްކި އިންޓަވިއުއެއްގައި ޔަހްޔާ ރަހީމް ސަފަވީ ވިދާޅުވީ، ނަތަންޔާހޫގެ ބައްދަލުވުންތައް ބާއްވާ ތަންތަން އީރާނަށް އެނގޭ ކަމަށާއި، އެ ގައުމުގެ ޖާސޫސީ މައުލޫމާތުތައް މިހާރު ފުރިހަމަވެފައިވާ ކަމަށެވެ.
މި ވާހަކަތައް އައިސްފައިވަނީ، ތެހެރާންގެ މެދުތެރޭގައި ހުންނަ އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީގެ އޮފީހަށް އަމާޒުކޮށް އިޒްރޭލާއި އެމެރިކާ ގުޅިގެން ދިން ވައިގެ ހަމަލާއެއްގައި އެމަނިކުފާނު އަވަހާރަކޮށްލިތާ ތިން ދުވަސް ފަހުންނެވެ.
އަވަހާރަކޮށްލެވުނު ލީޑަރުގެ އަސްކަރީ މުޝީރުގެ މަގާމުގައި ގިނަ އަހަރުތަކެއް ވަންދެން މަސައްކަތް ކުރެއްވި ސަފަވީ ވިދާޅުވީ، އީރާނުގެ ވަށައިގެންވާ ސަރަހައްދުތަކުގައި އެމެރިކާ އާއި އިޒްރޭލުން ހިންގާ ހަރަކާތްތަކާއި އެ ފަރާތްތަކުގެ ކޮންޓްރޯލް އޮންނަ ތަންތަނުގެ ފުރިހަމަ މައުލޫމާތު އީރާނުގެ ޖާސޫސީ އިދާރާތަކަށް އެނގޭ ކަމަށެވެ.
2025 ވަނަ އަހަރުގެ ޖޫން މަހު އިޒްރޭލުން ދިން ކުރު ހަމަލާތަކަށްފަހު ހަމަލާބަދަލުކުރުން ހުއްޓާލާފައި އޮތުމަށްފަހު، އެމެރިކާ އާއި އިޒްރޭލުން އީރާނާ ދެކޮޅަށް އާ ހަނގުރާމައެއް ފެށި ސަބަބާ ގުޅޭގޮތުން ވާހަކަދައްކަވަމުން އޭނާ ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕް މި ހަނގުރާމައިގެ ތެރެއަށް ވެއްޓުނީ ނަތަންޔާހޫ ދިން ދޮގު މައުލޫމާތުތަކާއި އީރާނުގެ އަސްކަރީ ބާރާ ގުޅޭގޮތުން ހެދި ނުބައި އަންދާޒާތަކުގެ ސަބަބުން ކަމަށެވެ.
ޖެނެރަލް ސަފަވީ ވިދާޅުވީ، އޭނާގެ ސިޔާސީ ދިރާސާތަކުން ދައްކާގޮތުގައި ޓްރަމްޕް ވެފައިވަނީ ނަތަންޔާހޫގެ އަތްމަތީގައި ގެންގުޅޭ ކުޅޭ އެއްޗަކަށް ކަމަށާއި، އޭނާ ގެންދަވަނީ އިޒްރޭލަށްޓަކައި އެމެރިކާ ގުރުބާން ކުރައްވަމުން ކަމަށެވެ. އަދި 12 ދުވަހުގެ ހަނގުރާމައަށްފަހު އީރާނު ބަލިކަށިވެފައިވާ ކަމަށް އެމީހުންނަށް ހީވި ނަމަވެސް، އީރާނުގެ ބާރު މިހާރު ދިހަގުނަ އިތުރުވެފައިވާ ކަމަށްވެސް އޭނާ ވިދާޅުވިއެވެ.
މީގެ އިތުރުން ސަފަވީ ވިދާޅުވީ، އެމެރިކާ އާއި އިޒްރޭލުން ޑިޕްލޮމެސީގެ މަގު އިޚްތިޔާރުކުރާ ކަމަށް ދައްކައިގެން ތިބެ، އީރާނަށް ކުއްލި ހަމަލާތަކެއް ދީފާނެ ކަމަށާއި، އެމީހުންގެ އެ މަކަރުވެރި އުކުޅުތަކަށް އީރާނަށް އެނގޭ ކަމަށެވެ.
