އިރާނުގެ އެސެމްބްލީ އޮފް އެކްސްޕާޓްސް އަށް ހަމަލާދިން ކަމަށް އިޒްރޭލުން ފެތުރި ޚަބަރު އީރާނުން ދޮގު ކޮށްފި
އިރާނުގެ އެސެމްބްލީ އޮފް އެކްސްޕާޓްސްގެ ބައްދަލުވުމަކަށް ހަމަލާދިން ކަމަށް ބުނެ އިޒްރޭލުން ފަތުރަމުންދާ ޚަބަރުތަކަކީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށް ތަސްނީމް ނިއުސް އެޖެންސީން ހާމަކޮށްފި. އިޒްރޭލުން ބުނާ ވަގުތުގައި އެފަދަ އެއްވެސް ބައްދަލުވުމެއް ބާއްވާފައި ނުވާއިރު، މިއީ އިރާނުގެ މަސްރަހު ގަޑުބަޑުކޮށްލުމަށް ހިންގާ ނަފްސާނީ ހަނގުރާމައެއް ކަމަށް އެ ގައުމުގެ މަސްދަރުތަކުން ބުނޭ.
ތެހެރާންގައި 2019 ވަނަ އަހަރުގެ މާރިޗު މަހުގެ 12 ވަނަ ދުވަހު ބޭއްވި އީރާނުގެ އެސެމްބްލީ އޮފް އެކްސްޕާޓްސްގެ ބައްދަލުވުމެއްގައި އެ މަޖިލީހުގެ މެންބަރުން ބައިވެރިވެވަޑައިގަންނަވަނީ. | އޭއެފްޕީ
އީރާނުގެ އެންމެ މަތީ ވެރިޔާ އިންތިޚާބު ކުރާ އެސެމްބްލީ އޮފް އެކްސްޕާޓްސްގެ ބައްދަލުވުމަކަށް އަމާޒުކޮށް ހަމަލާދީފައިވާ ކަމަށް ބުނެ އިޒްރޭލުން ދާދިފަހުން ފެތުރި ޚަބަރުތައް، ކަންހިނގިގޮތް އެނގޭ އިތުބާރު ހުރި މަސްދަރަކުން ކަނޑައެޅިގެން ދޮގުކޮށްފިއެވެ.
ތަސްނީމް ނިއުސް އެޖެންސީއަށް މައުލޫމާތު ދެމުން އެ މަސްދަރުން ބުނީ، އިރާނުގެ އެސެމްބްލީ އޮފް އެކްސްޕާޓްސް ނުވަތަ އެ ގައުމުގެ ވަގުތީ ލީޑަރޝިޕް ކައުންސިލްގެ ބައްދަލުވުމަކަށް ހަމަލާދީފައިވާ ކަމަށް ބުނެ އިޒްރޭލާއި އެ ގައުމުގެ މީޑިއާތަކުން ފަތުރަމުންދާ ޕްރޮޕަގަންޑާއަކީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ.
މީގެ އިތުރުން، އެ މަސްދަރުން ހާމަކުރި ގޮތުގައި އިޒްރޭލުން އެ ބުނާ ވަގުތުގައި އެސެމްބްލީ އޮފް އެކްސްޕާޓްސްގެ އެއްވެސް ބައްދަލުވުމެއް ބާއްވާފައެއް ނުވެއެވެ.
އިޒްރޭލުން ފެތުރި ޚަބަރުގައި ބުނެފައިވަނީ އިމާރާތައް ހަމަލާ ދިނީ ބައްދަލުވުމެއް ހިނގަމުން ދަނިކޮށް ކަމުގަ އެވެ.
އިތުބާރު ހުރި އެ މަސްދަރުން އިތުރަށް ފާހަގަކުރި ގޮތުގައި، މިފަދަ ދޮގު ޚަބަރުތައް ފަތުރަނީ އިރާނުގެ ވެރިކަމުގެ ބާރުތަކުގެ މެދުގައި ހުސްކަމެއް އުފެދިފައިވާ ކަމުގެ އިހުސާސް އާންމުންގެ މެދުގައި އުފެއްދުމަށް ހިންގާ ނަފްސާނީ ހަނގުރާމައެއްގެ ތެރެއިންނެވެ.
