ހަނގުރާމައިގެ ހަތަރުވަނަ ދުވަސް: މެދުއިރުމަތި އަނދަނީ، 700 އަށްވުރެ ގިނަ މީހުން މަރުވެއްޖެ
އެމެރިކާއާއި އިޒްރޭލުން އީރާނުގެ މުހިންމު ބިނާތަކަށާއި އާންމުންނަށް އަމާޒުކޮށް ވަރުގަދަ ހަމަލާތަކެއް ދީފައިވާއިރު، މީގެ ރައްދުގައި އީރާނުން ވަނީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށާއި އެމްބަސީތަކަށް މިސައިލާއި ޑްރޯން ހަމަލާތައް ދޭން ފަށާފައި. މި ހަމަނުޖެހުންތަކާ ގުޅިގެން ގަލްފުގެ ގައުމުތަކުގެ ސަލާމަތީ މަސްރަހު ގޯސްވެ، ތެޔޮ އުފެއްދުމާއި ވައިގެ ދަތުރުފަތުރަށް ބުރޫއަރާފައިވާއިރު، އެމެރިކާއިން ވަނީ އެ ސަރަހައްދުގައި ތިބި އެ ގައުމުގެ ރައްޔިތުން ވަގުތުން ފޭބުމަށް އަންގާފައި. އީރާނުގެ ނިއުކްލިއާ ގާބިލުކަން ނައްތާލުމަށް ކަމަށް ބުނެ ދޭ މި ހަމަލާތައް ހުއްޓާނުލާނެ ކަމަށް އެމެރިކާއިން ބުނާއިރު، އީރާނުން ދަނީ ހޮރްމޫޒް ކަނޑުއޮޅި ބަންދުކޮށް ބަދަލުހިފުމުގެ ވަރުގަދަ އިންޒާރުތަކެއް ދެމުން.
އީރާނުގެ ވެރިރަށް ތެހެރާނަށް އަމާޒުކޮށް ދިން މި ހަމަލާތަކުގެ ނަތީޖާއެއްގެ ގޮތުން ބޮޑެތި ގެއްލުންތަކެއް ލިބިފައިވާއިރު، މިއީ މެދުއިރުމަތީގެ ހަމަޖެހުމަށް އޮތް ބޮޑު ނުރައްކަލެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރޭ. | އިސްނާ
އެމެރިކާއާއި އިޒްރޭލު ގުޅިގެން އީރާނަށް ދެމުންދާ ވަރުގަދަ ހަމަލާތަކާ ގުޅިގެން، އީރާނުން ބަދަލުހިފުމުގެ ހަމަލާތައް ދޭން ފެށުމާއެކު މުޅި މެދުއިރުމަތީގައި މަސްރަހު ގޯސްވެ، ހަމަނުޖެހުންތައް އިންތިހާއަށް ފެތުރެން ފަށައިފިއެވެ.
އީރާނުގެ ވެރިރަށް ތެހެރާންގައި ހުރި ސަރުކާރުގެ މުހިންމު އިމާރާތްތަކާއި މުހިންމު ބިނާތަކަށް ވަނީ ހަމަލާދީފައެވެ. އޭގެ ތެރޭގައި އެ ގައުމުގެ ދައުލަތުގެ މީޑިއާ، އައި.އާރް.އައި.ބީ ކޮމްޕްލެކްސްއާއި ޔުނެސްކޯގެ ދުނިޔޭގެ ތަރިކައިގެ ދަފްތަރުގައި ހިމެނޭ ތާރީޚީ ގުލިސްތާން ޕެލަސް ހިމެނެއެވެ. މި ހަމަލާތަކުގައި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ ހިމެނޭހެން 700 އަށްވުރެ ގިނަ މީހުން މަރުވެފައިވާ ކަމަށް ރިޕޯޓުތައް ބުނެއެވެ. މީގެ އިތުރުން، އީރާނުގެ ދެކުނުގައި ހުރި އަންހެން ކުދިންގެ ސްކޫލަކަށް އެމެރިކާއާއި އިޒްރޭލުނ ދިން ހަމަލާއެއްގައި 165 ކުދިން މަރުވެފައިވާ ކަމަށް އީރާނުގެ ރެޑް ކްރެސެންޓާ ހަވާލާދީ އެ ގައުމުގެ މީޑިއާތަކުން ވަނީ ރިޕޯޓުކޮށްފައެވެ.
މި ހަމަލާތަކާ ގުޅިގެން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އިންޒާރު ދެއްވާފައިވަނީ، އީރާނަށް ދޭން އޮތް އެންމެ ވަރުގަދަ ހަމަލާތައް އަދި ކުރިއަށް އޮތް ކަމަށެވެ. އަދި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ އެމެރިކާގެ ހުރިހާ މަގްސަދުތަކެއް ހާސިލްވަންދެން އީރާނަށް ދޭ ހަމަލާތައް ކުރިއަށްދާނެ ކަމަށެވެ. އެމެރިކާގެ ޑިފެންސް ސެކްރެޓަރީ ޕީޓް ހެގްސެތު މި ހަމަލާތައް ދިފާއުކުރައްވަމުން ވިދާޅުވީ، މިއީ އީރާނުގެ ކަނޑުގެ ސިފައިންގެ ބާރު ކަނޑުވާލުމަށާއި، އެ ގައުމުގެ ނިއުކްލިއާ އަދި މިސައިލް އުފެއްދުމުގެ މަސައްކަތް ހުއްޓުވުމަށް ދޭ ހަމަލާތަކެއް ކަމަށެވެ.
މި ހަމަލާތަކަށް ރައްދު ދިނުމުގެ ގޮތުން އީރާނުގެ ރިވޮލިއުޝަނަރީ ގާޑުން ވަނީ ހޮރްމޫޒް ކަނޑުއޮޅި ބަންދުކޮށް، އެ ސަރަހައްދުން ދަތުރުކުރާ ކޮންމެ އުޅަނދެއްގައި އަލިފާން ރޯކޮށްލާނެ ކަމުގެ އިންޒާރު ދީފައެވެ. މީގެ އިތުރުން އީރާނުން ދަނީ އެ ސަރަހައްދުގައި ހުރި އެމެރިކާއާއި އެ ގައުމުގެ ބައިވެރިންގެ ތެޔޮ ވަސީލަތްތަކަށްވެސް ހަމަލާދެމުންނެވެ.
ގަލްފް ސަރަހައްދު
ގަލްފުގެ ގައުމުތަކަށް ބަލާއިރު، ގަތަރަށް ވަނީ މި ހަމަލާތަކުގެ ސީދާ އަސަރު ފޯރާފައެވެ. އީރާނުން ފޮނުވާލި އެތައް ބެލިސްޓިކް މިސައިލްތަކާއި ޑްރޯންތަކެއް ގަތަރުން ވަނީ ހުއްޓުވާފައެވެ. ނަމަވެސް، އޭގެ ތެރެއިން ދެ މިސައިލެއް އެމެރިކާ ސިފައިން ތިބޭ އަލް އުދައިދު އެއާ ބޭސްއަށް އަރާފައިވާއިރު، ޑްރޯންއެއް ވަނީ އަވަސް އިންޒާރުދޭ ނިޒާމަކަށް އަރާފައެވެ. އަދި ގަތަރުގެ ވައިގެ ސިފައިން ވަނީ އެ ގައުމާ ދިމާލަށް އައި އީރާނުގެ ދެ ހަނގުރާމަމަތީ ބޯޓު ވައްޓާލާފައެވެ. މި ހަމަލާތަކާ ގުޅިގެން ދުނިޔޭގައި އެންމެ ގިނައިން އެލް.އެން.ޖީ އުފައްދާ ގަތަރު އެނާޖީން ވަނީ އުފެއްދުންތައް މެދުކަނޑާލާފައެވެ.
ކުވެއިތު
ކުވެއިތުގައި އެމެރިކާގެ ތިން ހަނގުރާމަމަތީ ބޯޓެއް ވެއްޓިފައިވާއިރު، އެމެރިކާ ސިފައިން ބުނަނީ އެ ބޯޓުތައް ވައްޓާލެވުނީ "އޮޅުމަކުން" ކަމަށެވެ. ނަމަވެސް، އާންމުވެފައިވާ ވީޑިއޯތަކުން ފެންނަ ގޮތުގައި އެމެރިކާގެ އެފް-15 އީ މަރުކާރުގެ ބޯޓެއްގެ ފަހަތުގައި އަލިފާން ރޯވެ، ދުން އަރުވަމުން ބިމަށް ވެއްޓޭ މަންޒަރު ފެނެއެވެ. މީގެ އިތުރުން، އީރާނުން ކުވެއިތުގައި ހުންނަ އެމެރިކާ އެމްބަސީއަށް ހަމަލާދިނުމާ ގުޅިގެން ކުވެއިތުގެ ފޮރިން މިނިސްޓްރީން ވަނީ އެކަން ކުށްވެރިކޮށްފައެވެ. މަސްރަހު ގޯސްވުމުގެ ސަބަބުން އެމްބަސީ ވަނީ ވަކި މުއްދަތެއް ނެތް ގޮތަށް ބަންދުކޮށްފައެވެ.
ސައުދީ އަރަބިއްޔާ
ސައުދީ އަރަބިއްޔާގެ ރިޔާޟް އަދި އަލް-ޚަރްޖް ސަރަހައްދުން އަށް ޑްރޯންއެއް ހުއްޓުވާފައިވާއިރު، ރިޔާޝްގައި ހުންނަ އެމެރިކާ އެމްބަސީއަށް ދެ ޑްރޯން ހަމަލާއެއް އަރައި އަލިފާނުގެ ހާދިސާއެއް ވަނީ ހިނގާފައެވެ. މިއާއެކު އެމްބަސީގެ ހުރިހާ ޚިދުމަތްތަކެއް މެދުކަނޑާލައި އެމްބަސީ ވަނީ ބަންދުކޮށްފައެވެ. އެމެރިކާގެ ސްޓޭޓް ޑިޕާޓްމަންޓުން ވަނީ ބަހްރޭން، ކުވެއިތު، އޮމާން، ގަތަރު، ސައުދީ އަރަބިއްޔާ އަދި ޔޫ.އޭ.އީގައި ތިބި އެމެރިކާ ރައްޔިތުން ވަގުތުން އެ ގައުމުތަކުން ފޭބުމަށް އިލްތިމާސްކޮށްފައެވެ. މި ނުރައްކާތަކުގެ ތެރެއިންވެސް، ދުބާއީގެ އެއާޕޯޓް އޮތޯރިޓީން ވަނީ ދުބާއީ އިންޓަނޭޝަނަލް އެއާޕޯޓުން މަދު ފްލައިޓްތަކެއް އޮޕަރޭޓް ކުރުމުގެ ހުއްދަ ދީފައެވެ.
އިޒްރޭލް
އިޒްރޭލުން ބުނާ ގޮތުގައި އީރާނުން ފޮނުވާލި މިސައިލްތައް ދެނެގަނެވިފައިވާ ކަމަށާއި، އެ ގައުމުގެ ވައިގެ ދިފާއީ ނިޒާމުތައް ދަނީ ހަރަކާތްތެރިވަމުންނެވެ. އަދި ލުބުނާނުން ފޮނުވާލި ދެ ޑްރޯންއެއްވެސް އިޒްރޭލުން ވަނީ ވައްޓާލާފައެވެ. ހިޒްބުﷲ އިން ބުނަނީ އިޒްރޭލަށްދޭ ހަމަލާތަކަކީ ފާއިތުވި 15 މަސްދުވަހު އިޒްރޭލަށާއި ހިންގި އުދުވާނަށާއި 2024 ވަނަ އަހަރުގެ ސުލްހައިގެ އެއްބަސްވުމާ ޚިލާފުވުމުން ދޭ ރައްދެއް ކަމަށެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ އީރާނުގެ ނިއުކްލިއާ މަރުކަޒުތަކަށް ދޭ ހަމަލާތައް ދިފާއުކުރައްވައި، އީރާނުގެ ސަރުކާރު ބަދަލުކުރުމަކީ އެ ގައުމުގެ ރައްޔިތުންގެ އަތްމަތީގައި އޮތް ކަމެއް ކަމަށް ވިދާޅުވެފައެވެ.
އެމެރިކާ
އެމެރިކާގެ ސިފައިންގެ ހަ މީހަކު މަރުވެ 18 މީހަކު ޒަޚަމްވެފައިވާއިރު، ރައީސް ޓްރަމްޕް ވިދާޅުވީ ވަރަށް އަވަހަށް މީގެ ބަދަލު ހިފާނެ ކަމަށެވެ. ނަމަވެސް އެއްގަމު މަގުން ސިފައިން ފޮނުވަން ޖެހިދާނެ ކަމަކަށް ގަބޫލެއް ނުކުރައްވާ ކަމަށް ޓްރަމްޕް ވިދާޅުވިއެވެ. ނައިބު ރައީސް ޖޭ.ޑީ ވޭންސް ވިދާޅުވީ، އަމާޒަކީ އީރާނުގެ ސަރުކާރުގެ ވިސްނުން ބަދަލުކޮށް، އެ ގައުމަށް ދުވަހަކުވެސް ނިއުކްލިއާ ހަތިޔާރެއް ނުލިބޭނެކަން ކަށަވަރު ކުރުން ކަމަށެވެ.
ލުބުނާން
ލުބުނާނާއި އުރުދުންގެ މަސްރަހަށް ބަލާއިރު، އިޒްރޭލުން ވަނީ ލުބުނާނުގެ 59 ސަރަހައްދަކުން މީހުން ހުސްކުރުމަށް އަންގާފައެވެ. އަދި އުރުދުންގެ ވެރިރަށް އައްމާންގައި ހުންނަ އެމެރިކާ އެމްބަސީގެ ހުރިހާ މުވައްޒަފުން ވަނީ ނުރައްކަލަކަލުގެ ސަބަބުން ވަގުތީ ގޮތުން އެތަނުން ބޭރުކޮށްފައެވެ. އެމެރިކާގެ ސްޓޭޓް ޑިޕާޓްމަންޓުން ވަނީ އިޒްރޭލާއި، ހިފާފައިވާ ހުޅަނގު އައްސޭރިއާއި ޣައްޒާ ގައި ތިބި އެމެރިކާ ރައްޔިތުންވެސް ވަގުތުން އެ ސަރަހައްދުތަކުން ފޭބުމަށް އަންގާފައެވެ.
