ސައުދީ ގައި ހުންނަ އެމެރިކާ އެމްބަސީއަށް އީރާނުން ހަމަލާ ދީފި، ސައުދީން ވަނީ މި "ރަހްމުކުޑަ" ޑްރޯން ހަމަލާ ކުށްވެރިކޮށްފައި

ސައުދީ އަރަބިއްޔާގެ ވެރިރަށް ރިޔާޟް ގައި ހުންނަ އެމެރިކާގެ އެމްބަސީއަށް އަމާޒުކޮށް އީރާނުން ޑްރޯން ހަމަލާ އެއް ދީފި އެވެ. އެއާއެކު މި ޑްރޯން ހަމަލާ، ސައުދީ ސަރުކާރުން އަންގާރަ ދުވަހު ކުށްވެރިކޮށްފިއެވެ. ކަމާބެހޭ އިދާރާތަކުން ބުނި ގޮތުގައި މި ހަމަލާގެ ސަބަބުން އެމްބަސީގެ އިމާރާތަށް ގެއްލުންތަކެއް ލިބި، އަލިފާނުގެ ހާދިސާއެއް ވަނީ ހިނގާފައެވެ.

ސައުދީ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ، ރިޔާޟް ގައި ހުންނަ އެމެރިކާގެ އެމްބަސީއަށް އަމާޒުކޮށް އީރާނުން ދިން ރަހުމުކުޑަ ހަމަލާ އެންމެ ހަރުކަށި އިބާރާތުން ކުށްވެރިކުރާ ކަމަށާއި، އެފަދަ އަމަލުތަކަށް އެ ގައުމުން ދެކޮޅު ހަދާ ކަމަށެވެ.

މީގެ އިތުރުން، އެ ބަޔާނުގައި ވަނީ މިއީ ފިނޑި އަދި އެއްވެސް އުސޫލެއް ނެތް ހަމަލާއެއްގެ ގޮތުގައި ސިފަކޮށްފައެވެ. އަދި ހަނގުރާމައެއްގެ ތެރޭގައި ވެސް ޑިޕްލޮމެޓިކް މިޝަންތަކާއި އެ ތަންތަނުގެ މުވައްޒަފުންނަށް ރައްކާތެރިކަން ކަށަވަރުކޮށްދޭ ޖެނީވާ ކޮންވެންޝަނާއި ވިއެންނާ ކޮންވެންޝަން ފަދަ ބައިނަލްއަގުވާމީ ގާނޫނީ ހަމަތަކާ މި ހަމަލާ މުޅިން ޚިލާފުވާކަން ސައުދީން ފާހަގަކޮށްފައިވެއެވެ.

އީރާނުގެ މި އަމަލުގެ ސަބަބުން ސަރަހައްދީ މަސްލަހަތު އިތުރަށް ގޯސްވެގެން ހިނގައިދާނެ ކަމުގެ އިންޒާރު ވެސް ސައުދީން ވަނީ ދީފައެވެ.

ސައުދީ އަރަބިއްޔާގެ ބިމާއި، ރައްޔިތުންނާއި، އެ ގައުމުގައި ދިރިއުޅޭ މީހުންނާއި، ގައުމުގެ މުހިންމު މަސްލަހަތުތައް ހިމާޔަތްކުރުމަށްޓަކައި އަޅަންޖެހޭ ހުރިހާ ފިޔަވަޅެއް އެޅުމުގެ ފުރިހަމަ ހައްގު އެ ގައުމަށް ލިބިގެންވާ ކަމަށާއި، އޭގެ ތެރޭގައި ދޭ ހަމަލާތަކަށް ރައްދު ދިނުން ވެސް ހިމެނޭނެ ކަމަށް އެ ގައުމުން ތަކުރާރުކޮށް ބުނެފައިވެއެވެ.

ވޭތުވެދިޔަ ހޮނިހިރު ދުވަހުން ފެށިގެން އިޒްރޭލާއި އެމެރިކާއިން ދަނީ އީރާނުގެ އެކި އަމާޒުތަކަށް ހަމަލާދެމުންނެވެ. މީގެ ރައްދުގައި އީރާނުން ވެސް ދަނީ ސަރަހައްދުގެ އެކި ތަންތަނުގައި ހުރި އިޒްރޭލާއި އެމެރިކާގެ އަމާޒުތަކަށް ހަމަލާދެމުންނެވެ.