އެމެރިކާއާއި އިޒްރޭލުން އީރާނަށް ދެމުންދާ ހަމަލާތަކަކީ ބައިނަލްއަގުވާމީ ގާނޫނުތަކާ ހިލާފު "ޖަންގަލީގެ އުސޫލު" ކަމަށް ސިފަކޮށް، އެ އަމަލުތައް ހުއްޓާލުމަށް ޗައިނާއިން ގޮވާލައިފި

އިޒްރޭލާއި އެމެރިކާ އިން އީރާނަށް ދެމުންދާ ހަމަލާތަކަކީ ޖަންގަލީގެ އުސޫލު ކަމަށް ޗައިނާ އިން ބުނެފި އެވެ.

ޗައިނާގެ ފޮރިން މިނިސްޓަރު ވަންގް ޔީ، ފްރާންސްގެ ފޮރިން މިނިސްޓަރު ޖީން-ނޮއެލް ބަރޯއާ ފޯނުން ގުޅުއްވައި ދެއްކެވި ވާހަކަފުޅުގައި، އެމެރިކާއާއި އިޒްރޭލުން އީރާނަށް ދެމުންދާ އުދުވާނީ ހަމަލާތައް ވަނީ ކުށްވެރި ކުރައްވާފައެވެ.

ޗައިނާގެ ފޮރިން މިނިސްޓްރީގެ ވެބްސައިޓުގައި އަންގާރަ ދުވަހު ޝާއިއުކުރި ބަޔާނެއްގައިވާ ގޮތުން، އަސްކަރީ ބާރުގެ ބޭނުންކޮށްގެން އަމިއްލަ އެދުން އިސްކޮށް ބައިނަލްއަގުވާމީ ގާނޫނުތަކާ ހިލާފުވާ ގައުމުތަކާ ދެކޮޅަށް ބައިނަލްއަގުވާމީ މުޖުތަމައު އެކަތިގަނޑަކަށް ވާންޖެހޭނެ ކަމަށް ވަންގް ޔީ ވިދާޅުވިއެވެ.

ވަންގް ޔީ ވިދާޅުވީ، ބޮޑެތި ބާރުތަކުން އެ ގައުމުތަކުގެ އަސްކަރީ ކުރިއެރުމަށް ބަރޯސާވެ، ބޭނުންހާ ގޮތަކަށް އެހެން ގައުމުތަކަށް ހަމަލާދީގެން ނުވާނެ ކަމަށާއި، ދުނިޔެ "ޖަންގަލީގެ އުސޫލަށް" ރުޖޫއަވިޔަދީގެން ނުވާނެ ކަމަށެވެ.

އީރާނުގެ ނިއުކްލިއާ މައްސަލައަށް އޮތް ހައްލަކީ ސިޔާސީ އަދި ހާރިޖީ މަޝްވަރާތަކުގެ މަގަށް އެނބުރި ރުޖޫއަވުން ކަމަށް އޭނާ ފާހަގަކުރެއްވިއެވެ.

ޗައިނާގެ ފޮރިން މިނިސްޓަރު އިތުރަށް ވިދާޅުވީ، ބައިނަލްއަގުވާމީ މުޖުތަމައުން ކަންކަމުގައި ދެފުށްދެގޮތް އުސޫލުތައް ގެންގުޅުން ހުއްޓާލަންޖެހޭ ކަމަށެވެ.

މީގެއިތުރުން، ފްރާންސުން މިކަމުގައި ވަކި ފަރާތަކަށް ނުޖެހޭ އިންސާފުވެރި ގޮތެއް އިހުތިޔާރުކޮށް، މަސްރަހު ފިނިކުރުމަށް ޗައިނާއާ ގުޅިގެން މަސައްކަތް ކުރާނެ ކަމަށް އުއްމީދު ކުރައްވާ ކަމަށާއި، ބައިނަލްއަގުވާމީ ގުޅުންތަކުގެ އަސާސީ އުސޫލުތައް ހިމާޔަތްކުރުމަށް ވަންގް ޔީ ގޮވާލެއްވިއެވެ.

ފްރާންސްގެ ފޮރިން މިނިސްޓަރު ބަރޯ ވިދާޅުވީ، އެމެރިކާއާއި އިޒްރޭލުން އީރާނަށް ދިން އަސްކަރީ ހަމަލާތަކަކީ އދ. ގެ ސަލާމަތީ މަޖިލީހުގެ އެއްވެސް މަޝްވަރާއެއް ނުވަތަ ހުއްދައެއް ނެތި ދީފައިވާ ހަމަލާތަކެއް ކަމަށެވެ.

އދ. ގެ ސަލާމަތީ މަޖިލީހުގެ ދާއިމީ މެންބަރުންގެ ހައިސިއްޔަތުން، ބައިނަލްއަގުވާމީ ސުލްހައާއި ސަލާމަތް ދެމެހެއްޓުމުގައި ފްރާންސާއި ޗައިނާގެ މައްޗަށް ހާއްސަ ޒިންމާއެއް އޮތްކަން އޭނާ ފާހަގަކުރެއްވިއެވެ.

އީރާނާއި ޕާޝިއަން ގަލްފުގެ އެހެން ގައުމުތަކާއެކު ޗައިނާއިން ބާއްވާ ގާތް ގުޅުމަށް އިޝާރާތް ކުރައްވައި، ސަރަހައްދީ ހަމަނުޖެހުންތައް ނިމުމަކަށް ގެނައުމަށް ބެއިޖިންގަށް އެހީތެރިވެދެވިދާނެ ކަމަށް އުއްމީދު ކުރައްވާ ކަމަށް ބަރޯ ވިދާޅުވިއެވެ.

އެމެރިކާއާއި އިޒްރޭލުން ގުޅިގެން ހޮނިހިރު ދުވަހު އީރާނަށް ދިން އަސްކަރީ ހަމަލާތަކުގައި، އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި އީރާނު ސިފައިންގެ އިސް އޮފިޝަލުންތަކެއް ވަނީ އަވަހާރަކޮށްލާފައެވެ.

އެ ހަމަލާތަކާ ގުޅިގެން، އީރާނުގެ އަސްކަރިއްޔާއިން ވަނީ ވަގުތުން ރައްދު ހަމަލާދީ، އިޒްރޭލުން ހިފާފައިވާ ބިންތަކަށާއި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ގިނަ އަދަދެއްގެ މިސައިލާއި ޑްރޯން ހަމަލާތަކެއް ފޮނުވާލާފައެވެ.

އީރާނުގެ އޮފިޝަލުން ވިދާޅުވެފައިވަނީ، އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދިނުމަކީ އަމިއްލަ ނަފްސުގެ ދިފާއުގައި ދިން ގާނޫނީ ހަމަލާތަކެއް ކަމަށެވެ.

އދ. ގެ ޗާޓަރުގެ 51 ވަނަ މާއްދާއާ ހަވާލާދީ އީރާނުން ބުނީ، އެމެރިކާ ނުވަތަ އިޒްރޭލުން ހިންގާ އުދުވާނީ އަމަލުތަކުން ދިފާއުވުމުގެ ގާނޫނީ ހައްގު އެ ގައުމަށް ލިބިގެންވާ ކަމަށެވެ.