ހަމަލާ ތަކުގައި އީރާން އިން މަރުވި މީހުންގެ އަދަދު 787 އަށް
3 މާރިޗު 2026 | އަންގާރަ 10:49އީރާންގެ ރެޑް ކްރެސެންޓް އިން ބުނި ގޮތުގައި، ހަމަލާތައް ދީފައިވާ ސަރަހައްދު ތަކުގައި މީހުން ސަލާމަތް ކުރުމުގެ މަސައްކަތް ހުއްޓުމެއް ނެތި ދަނީ ކުރިއަށް ގެންދަމުން.
އެމެރިާކާ އާއި އިޒްރޭލް އިން، އީރާންގެ ވެރި ރަށް ތެހެރާން އަށް ދިން ހަމަލާ ތަކުގައި ގެއްލުންވެފައިވާ އިމާރާތެއްގައި ފަޔާ ފައިޓަރުން މަސައްކަތް ކުރަނީ. | ގެޓީ އިމޭޖަސް
އެމެރިކާ އާއި އިޒްރޭލް އިން އީރާން އަށް ދެމުން އަންނަ ހަމަލާ ތަކުގައި، އެ ޤައުމުން މަރުވެފައިވާ މީހުންގެ އަދަދު 787 އަށް އަރާފައިވާ ކަމަށް، އީރާންގެ ދައުލަތުގެ މީޑިއާ އިން ހާމަ ކޮށްފި އެވެ.
އީރާންގެ ރެޑް ކްރެސެންޓްއާ ހަވާލާދީ ދައުލަތުގެ މީޑިއާ އިން ބުނެފައި ވަނީ، ފާއިތުވި ދުވަސް ތަކުގައި ދިން ހަމަލާ ތަކުގައި މަރުވި މީހުންގެ އަދަދު އިތުރު ވަމުންދާއިރު، ގިނަ ބަޔަކަށް އެކިވަރުގެ އަނިޔާތައް ލިބިފައިވާ ކަމަށެވެ. އެމެރިކާ އާއި އިޒްރޭލް އިން ދެމުން އަންނަ ހަމަލާތައް އަމާޒު ކުރަނީ އީރާންގެ އެކި ސަރަހައްދު ތަކަށެވެ.
އީރާންގެ ރެޑް ކްރެސެންޓް އިން ބުނި ގޮތުގައި، ހަމަލާތައް ދީފައިވާ ސަރަހައްދު ތަކުގައި މީހުން ސަލާމަތް ކުރުމުގެ މަސައްކަތް ހުއްޓުމެއް ނެތި ދަނީ ކުރިއަށް ގެންދަމުންނެވެ. ނަމަވެސް، ހަމަލާ ތަކުގެ ސަބަބުން ލިބިފައިވާ ގެއްލުންތައް ބޮޑުވުމާއި، ބައެއް ސަރަހައްދު ތަަކަށް ވަނުމަށް ހުރި ހުރަސް ތަކުގެ ސަބަބުން، މަރުވި މީހުންގެ އަދަދު މިއަށްވުރެ އިތުރުވުން އެކަށީގެންވާ ކަމަށް އެ އިދާރާ އިން ވަނީ ބުނެފަ އެވެ.
އެމެރިކާ އާއި އިޒްރޭލް އިން އީރާން އަށް ހަމަލާ ދޭން ފެށުމާާ އެކު، އީރާން އިން ވަނީ އެ ޤައުމުގެ ދިފާއުގައި ވެސް ހަމަލާތައް ދޭން ފަށައިފަ އެވެ. އެކަމުގެ ސަބަބުން، ސަރަހައްދުގައި ވަނީ ހަނގުރާމައިގެ ބިރުވެރިކަން ބޮޑުވެފަ އެވެ. އެމެރިކާ އާއި އިޒްރޭލްގެ ހަމަލާ ތަކުގައި އީރާންގެ އެކި ސަރަހައްދު ތަަކަށް ވަނީ ގިނަ ގެއްލުން ތަކެއް ލިބިފަ އެވެ. އޭގެ ތެރޭގައި މީހުން ދިރިއުޅޭ ސަރަހައްދު ތަކަށް ލިބުނު ގެއްލުން ބޮޑު ކަމަށް ފާހަގަ ކޮށްފައިވެ އެވެ.
އީރާން އިން ބުނެފައި ވަނީ، އެމެރިކާ އާއި އިޒްރޭލް އިން އެ ޤައުމަށް ހަމަލާ ދީފައި ވަނީ ބައިނަލްއަޤުވާމީ ޤާނޫނު އަދި އުސޫލުތަކާ ޚިލާފަށް ކަމަށެވެ. އަދި އެމެރިކާ އާއި އިޒްރޭލްގެ އަމަލު ހަރުކަށި އިބާރާތުން ކުށްވެރި ކުރާ ކަމަށް ބުނެ، ބަދަލު ހިފާނެ ކަމުގެ ގަދަ އިންޒާރު އީރާން އިން ދީފައިވެ އެވެ.
ދުނިޔޭގެ އެކި ޤައުމު ތަކުން ވެސް ވަނީ، އެމެރިކާ އާއި އިޒްރޭލްގެ އަމަލުތައް ކުށްވެރި ކޮށްފަ އެވެ. އަދި ހަމަލާ ބަދަލު ކުރުން ހުއްޓާލައި، ސުލްޙަ އާއި ހަމަޖެހުން ޤާއިމު ކުރުމަށް ވެސް އަންނަނީ ގޮވާލަމުންނެވެ.
މަސްދަރު: އަލް ޖަޒީރާ
