2 އިންތިޚާބު އެއްކުރަނީ ރައީސް މުއިއްޒު ރައްޔިތުން ކައިރަށް ނުދާންވެގެން: އާޒިމް
ރައީސުލްޖުމްހޫރިއްޔާ އިންތިޚާބުތައް އެއްކުރަން މަސައްކަތް ކުރައްވަނީ ރައްޔިތުންނާ ބައްދަލުކުރަން ބޭނުންފުޅު ނުވާތީ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ. އިންތިޚާބުތައް ގިނަވުމަކީ ރައްޔިތުންގެ ގާތަށް ވެރިން ދިއުމަށް އޮތް ފުރުސަތެއް ކަމަށް ފާހަގަކުރައްވައި، ތަރައްޤީ ބޭނުންވާނަމަ އެ ނިންމުމާ ދެކޮޅު ހެދުމަށް މޭޔަރު ވަނީ ގޮވާލައްވާފަ. މީގެ އިތުރުން، ކައުންސިލަށް ބޭނުންވަނީ ރައްޔިތުންގެ ކަންކަމުގައި އިޚުލާޞްތެރިކަމާއެކު ވަކާލާތުކުރާނެ މުރާލި މެންބަރުން ކަމަށްވެސް އާޒިމް ވިދާޅުވި.
މާލެ ސިޓީގެ މޭޔަރު އާދަމް އާޒިމް، ހެންވޭރު ހުޅަނގު ދާއިރާގެ ކެމްޕޭން ހަރަކާތުގެ ތެރެއިން ވާހަކަ ދައްކަވަނީ. | ރާއްޖެ އެމްވީ
އިންތިޚާބުތައް އެއްކުރަން ރައީސް ޑރ. މުހައްމަދު މުއިއޒު މަސައްކަތްކުރައްވަނީ ރައްޔިތުން ކައިރިއަށް ނުދާންވެގެން ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
ހެންވޭރު ހުޅަނގު ދާއިރާގެ ކެމްޕޭން ހަރަކާތުގައި ވާހަކަދައްކަވަމުން މޭޔަރު ވިދާޅުވީ މިހާރު ވެސް އިންތިޚާބުތައް އެއް ނުކޮށް އޮތްއިރު، އިހައްދުވަހަކު ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވިދާޅުވެފައިވަނީ ރަށްރަށަށް ދިއުމާއި މީހުންނާ ބައްދަލުކުރުން ބޭނުން ނުވާ ކަމުގައެވެ.
މޭޔަރު ވިދާޅުވީ މިހާރު ވެސް ރައީސް އެ ހިސާބުގައި ހުންނަވާ ކަމަށާއި، އިންތިޚާބެއް ނެތިއްޔާ އަދި އަމުދުން ރައްޔިތުން ކައިރިއަށް ނުދާނެ ކަމަށެވެ. އިންތިޚާބުތައް އޮތީމަ ގިނަގިނައިން ރައީސުން ތަންތަނަށް ވަޑައިގަންނަވާ ކަމަށް ވިދާޅުވެ، މޭޔަރު ވިދާޅުވީ ތަރައްޤީ ބޭނުންކަމަށްވާ ނަމަ އިންތިޚާބު އެއްކުރުމަށް ނޫނެކޭ ބުނެ ފެއިލްކޮށްދެއްވުމަށެވެ.
މިހާރުވެސް އިންތިޚާބުތައް އެއްނުކޮށް އޮތް އިރު، އިހައްދުވަހަކު ރައީސް ވިދާޅުވެއްޖެ، ތިމަންނަ ބޭނުމެއް ނޫނޭ ރަށްރަށަށް ދާކަށް މީހުންނާ ބައްދަލުކުރާކަށް. މިހާރުވެސް އެހުރީ އެހިސާބުގަ. އެހެންވީމާ، އިންތިޚާބެއް ނެތިއްޔާ އަދި އަމުދުން ނުދާނެނޫންތޯ. އެހެންވީމާ، އަޅުގަނޑު ހަމަ އެދެނީ ތި ބޭފުޅުން ތަރައްޤީ ބޭނުންކަމަށްވަންޏާމު އިންތިޚާބު އެއްކުރުމަށް ނޫނެކޭ ބުނެ މިކަން ފެއިލްކޮށްލަދެއްވަން.މާލެ ސިޓީގެ މޭޔަރު އާދަމް އާޒިމް
ހެންވޭރު ހުޅަނގު ދާއިރާއަށް ވާދަކުރައްވާ ޝަހޫ ރިޒާ އަކީ ވަރަށް މުރާލި، ވަރަށް ތެދުވެރި އަމާނާތްތެރި ކެންޑިޑޭޓެއް ކަމަށް މޭޔަރު ވިދާޅުވި އެވެ. ކައުންސިލަށް ބޭނުންވަނީ މުރާލި، ތެދުވެރި އަމާނާތްތެރި ކައުންސިލަރުން ކަމަށާއި، ޙާޒިރުވެ، ރައްޔިތުންގެ ކަންތައްތައް ބަލައި، ކައިރިން މަސައްކަތްކުރާނެ މީހުން ކަމަށް މޭޔަރު ވިދާޅުވި އެވެ.
މޭޔަރު ވިދާޅުވީ ހެންވޭރު ހުޅަނގު ދާއިރާގެ ހުރިހާ ރައްޔިތުން ނުކުމެވަޑައިގެން ޝަހޫ ރިޒާ ހޮވައިދެއްވުމަށް ވަރަށް ބޮޑަށް އެދިލައްވާ ކަމުގައެވެ. އޭނާ އަކީ ރައްޔިތުންގެ ކަންތައްތައް ކައިރިން ބަލައި، އުނދަގޫތައް ކައިރިން ބަލައި، ކައުންސިލަށް ގެންގޮސް ވަކާލާތުކޮށް، ހުރިހާ ކަމެއް ވަރަށް ހަމަޖައްސައިދޭނެ ބޭފުޅެއް ކަމަށް މޭޔަރު ވިދާޅުވި އެވެ.
