މިދިޔަ ދެ އަހަރުގެ ތެރޭގައި މުއިއްޒުގެ ސަރުކާރުން ރަށްރަށުގެ ތަރައްޤީއަށް އިހުމާލުވެއްޖެ: ޝާހިދު
ރައީސް ޑރ. މުޢިއްޒުގެ ސަރުކާރަށް ދެ އަހަރުވީއިރު ރަށްރަށުގެ ތަރައްޤީގެ މަޝްރޫޢުތައް ހުއްޓި، ރައްޔިތުންނަށް ވީ ވަޢުދުތައް ފުއްދުމުގައި އިހުމާލުވެފައިވާ ކަމަށް އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެ. ދައުލަތުގެ ބަޖެޓުން ބޮޑު ހޭދައެއް ކުރި ނަމަވެސް އަތޮޅުތެރޭގެ ތަރައްޤީއަށް ކުރިއެރުމެއް ނައިސް، ކުރީ ސަރުކާރުން ފަށާފައިވާ މަސައްކަތްތައް ވެސް މި ސަރުކާރުން ހުއްޓާލާފައިވާކަން އޭނާ ފާހަގަކުރެއްވި.
އެމްޑީޕީގެ ރައީސް ޢަބްދުﷲ ޝާހިދު. | ރާއްޖެ އެމްވީ
މިދިޔަ ދެ އަހަރެއްހާ ދުވަހުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރަށްރަށުގެ ތަރައްޤީއަށް ބޮޑުތަނުން އިހުމާލުވެފައިވާ ކަމަށް އިދިކޮޅު މައި ޕާޓީ އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެ އެވެ.
ޝާހިދު މިހެން ވިދާޅުވީ އަތޮޅުތެރޭގެ ރަށްތަކަށް ކުރައްވަމުން ގެންދަވާ ދަތުރުފުޅުތަކުގެ ތެރެއިން، ރަށްރަށުގެ މިހާރުގެ ހާލަތާ ގުޅޭގޮތުން ރާއްޖެޓީވީ އަށް މަޢުލޫމާތު ދެއްވަމުންނެވެ.
ޝާހިދު ވިދާޅުވީ މި ސަރުކާރަށް ދެ އަހަރުވެގެން ދިޔައިރު، ރަށްރަށުގައި ތަރައްޤީގެ އެއްވެސް މަޝްރޫޢެއް ހިނގަމުން ނުދާ ކަމަށެވެ. އަދި ރައީސް މުޢިއްޒު ރަށްރަށަށް ކުރެއްވި ދަތުރުފުޅުތަކުގައި އެކި މަޝްރޫޢުތަކަށް އެޅުއްވި ބިންގާތައް "ގައުވެފައި" ހުރި ތަން ފެންނަމުންދާ ކަމަށް ވިދާޅުވެ، ޝާހިދު ވަނީ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފަ އެވެ.
ތަރައްޤީގެ އެއްވެސް މަޝްރޫޢެއް ހިނގަމަކުން ނުދޭ. އަދި އޭގެއިތުރުން މި ދާކަށް ދުވަހު ކުރެއްވި ދަތުރުފުޅުގައި އެޅުއްވިހާ ބިންގަލެއް ގައުވެފައި ހުރި ތަން. ރައްޔިތުންގެ ޝަކުވާއަކީ، ކޮބައިތޯއޭ ރިޔާސީ އިންތިޚާބުގައި ވެވަޑައިގެންނެވި އެތައް ވަޢުދު، ކޮބައިތޯއޭ މި އޮތް ދިޔަ ދެ އަހަރު ދުވަހުގެ ތެރޭގައި ވެވަޑައިގެންނެވި ވަޢުދު؟ ކޮބައިތޯއޭ މި ރަށްރަށަށް ވަޑައިގެން އެޅުއްވި ބިންގާ؟ ކޮބައިތޯއޭ މިދިޔަ އަހަރު ފަންސާސް ހަތެއް ބިލިއަން ރުފިޔާގެ ބަޖެޓު ހުސްކުރެއްވިއިރު މި ސިޓީތަކަށް؛ އައްޑޫ ސިޓީއަށް، ފުވައްމުލަކު ސިޓީއަށް، ހުޅުދޫ މީދޫއަށް ކޮށްދެއްވި ކަމެއް. ފަންސާސް ހަތެއް ބިލިއަން ރައްޔިތުންގެ ފައިސާއިން ޚަރަދުކުރެއްވިއިރު.އެމްޑީޕީގެ ރައީސް ޢަބްދުﷲ ޝާހިދު
ރައްޔިތުންގެ ފަރާތުން ލިބެމުންދާ ޝަކުވާތަކަށް އަލިއަޅުއްވައިލައްވަމުން ޝާހިދު ވިދާޅުވީ، ރިޔާސީ އިންތިޚާބުގެ ދުވަސްވަރު ވެވަޑައިގެންނެވި އެތައް ވަޢުދެއް މިއަދު ފެންނަން ނެތް ކަމަށެވެ. ޚާއްޞަކޮށް އައްޑޫ ސިޓީ އާއި، ފުވައްމުލަކު ސިޓީގެ އިތުރުން ހުޅުދޫ އަދި މީދޫ ފަދަ ބޮޑެތި އާބާދީތަކަށް މިދިޔަ ދެ އަހަރު ދުވަހުގެ ތެރޭގައި އެއްވެސް ކަމެއް ކޮށްދީފައި ނުވާކަން އޭނާ ފާހަގަކުރެއްވި އެވެ.
މީގެ އިތުރުން، ނިމިދިޔަ އަހަރު ދައުލަތުގެ ބަޖެޓުން 57 ބިލިއަން ރުފިޔާ ޚަރަދުކުރިއިރު، އެ ފައިސާއިން ރައްޔިތުންނަށް ލިބުނު މަންފާއެއް ނެތް ކަމަށް ޝާހިދު ވިދާޅުވި އެވެ. ރައްޔިތުންގެ ފައިސާއިން ބޮޑު ހޭދައެއް ކުރިއިރު، ސިޓީތަކާއި ރަށްރަށުގެ ތަރައްޤީއަށް އެއްވެސް ކުރިއެރުމެއް ނައިސް، މަޝްރޫޢުތައް ހުއްޓިފައި ހުރުމަކީ ބަލައިގަނެވޭނެ ކަމެއް ނޫން ކަމަށްވެސް އޭނާ ވިދާޅުވި އެވެ.
ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ފަށްޓަވާފައިވާ ތަރައްޤީގެ މުހިންމު މަޝްރޫޢުތައް މި ސަރުކާރުން ވަނީ ހުއްޓާލާފަ އެވެ. އަދި މިދިޔަ ދެ އަހަރުގެ ތެރޭގައި މި ސަރުކާރަށް އަލަށް އެއްވެސް ބޮޑު މަޝްރޫޢެއް ފެށިފައި ނުވާ އިރު، މުޅި ރާއްޖޭގެ ތަރައްޤީ މިއަދު އޮތީ މަޑުޖެހިފައި ކަމަށް އިދިކޮޅުން ބުނެ އެވެ.
