އެމްޑީޕީ ޕިކަޕް ޖަލްސާ: "އިންތިޚާބުތައް އެއްކޮށްލަނީ ދުސްތޫރީ ބާރުވެރިކަން ގެއްލޭ ގޮތަށް"
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަކީ ރައްޔިތުންގެ ދުސްތޫރީ ބާރުވެރިކަން ކުޑަކުރުމަށް ސަރުކާރުން ކުރާ ކަމެއް ކަމަށް އެމްޑީޕީން ތުހުމަތުކޮށްފި. މި ބަދަލަކީ ވެރިކަމުގެ ދައުރު ދިގުދައްމާލުމަށް ރައީސް ޑރ. މުއިއްޒު ކުރައްވާ ކަމެއް ކަމަށް ބުނެ، އެކަމާ ދެކޮޅަށް ފާޅުގައި ނުކުތުމަށް އެ ޕާޓީން ވަނީ ގޮވާލާފަ. އެހެންކަމުން، އިންތިޚާބުތައް އެއްކޮށްލުމަށް ނަގާ ފެންނަ ނުފެންނަ ވޯޓުގައި ރައްޔިތުންގެ ބާރުވެރިކަން ދެމެހެއްޓުމަށް އިދިކޮޅު ފަރާތްތަކުން ބާރުއަޅާ.
އެމްޑީޕީގެ ޕިކަޕް ޖަލްސާގެ ތެރެއިން | އެމްޑީޕީ
އިންތިޚާބުތައް އެއްކޮށްލަނީ ދުސްތޫރީ ބާރުވެރިކަން ގެއްލޭ ގޮތަށް ކަމަށް އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް ވަނީ ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ޕިކަޕް ޖަލްސާގައި ވާހަކަދައްކަވަމުންނެވެ.
ޝިފާޒް ވިދާޅުވީ ރާއްޖެ އަށް ޑިމޮކްރަސީ ގެނައުމުގެ މަސައްކަތް ފެށީއްސުރެ މިހާ ހިސާބަށް ބެލި ނަމަވެސް ޑިމޮކްރަސީ ކުރިއަރުވަން ޕީއެންސީގެ ފިކުރުން ކުރި ކަމެއް ނެތް ކަމަށެވެ. ޤާނޫނުއަސާސީގެ ބާރު ހިންގާ އާއްމުން ބާރުވެރިކުރުވުމަކީ އެއީ ޕީއެންސީ ދަންނަ ކަމެއް ނޫން ކަމަށް އޭނާ ވިދާޅުވި އެވެ. އޭނާ ވިދާޅުވީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަކީ ވެސް ރައްޔިތުންގެ ބާރުވެރިކަން ކުޑަކުރުމަށް ހިންގާ ކަންކަމުގެ ތެރެއަށް އިތުރުވާ ބޮޅެއް ކަމަށެވެ.
" ދެ އިންތިޚާބު އެއްކޮށްލުމަށް ނޫނެކޭ ބުނަން ޖެހެނީ ސިޔާސީ ގޮތުން ރާއްޖެ އަށް ބޮޑެތި ބަދަލުތައް އައި އިރު އެކަމާއި ނުވެސް ގުޅޭ، ނުވެސް ބެހޭ ބޭފުޅަކު ކުއްލިއަކަށް ރާއްޖެ ބަދަލުކުރުމަށް އުޅުއްވާތީ އަޅުގަނޑުމެން ކަންބޮޑުވާތީ." ޝިފާޒް ވިދާޅުވި އެވެ.
ޝިފާޒް އިތުރަށް ވިދާޅުވީ އިންތިޚާބުތައް މަދު ވުމަކީ ރައްޔިތުން ބަސް ބުނުމަށް ލިބޭ ފުރުސަތު ސީދާ ގޮތުން މަދުކޮށްލުން ކަމަށެވެ. އެހެންކަމުން އެކަމަށް ފުރުސަތު ދީފި ނަމަ އެއީ ފަހުން އާއްމުން ހިތާމަ ކުރާނެ ކަމެއް ކަމަށް ޝިފާޒް ވަނީ ވިދާޅުވެފަ އެވެ. އިތުރަށް ޝިފާޒް ވިދާޅުވީ ރައްޔިތުންގެ ބާރުވެރިކަން ކުޑަކޮށްލާ ކޮންމެ ފަހަރަކު އެކަމުގެ ދިފާއުގައި އާއްމުން ނިކުންނާނެ ކަމަށެވެ. ޝިފާޒްގެ އިތުރުން އެ ޖަލްސާގައި ވާހަކަދެއްކެވި އިތުރު ބޭފުޅުން ވެސް ވަނީ ރިޔާސީ އިންތިޚާބާއި މަޖިލިސް އިންތިޚާބާއި އެއްކޮށްލުމަށް ނަގާ ފެންނަ ނުފެންނަ ވޯޓުގެ ފަހަތުގައި ފޮރުވައިފައިވާ ކަންތައްތަކެއް ހުރި ކަމަށެވެ.
މީގެ އިތުރުން އިންތިޚާބުތައް އެއްކޮށްލުން އެއީ ވެރިކަމުގެ ދައުރު ދިގުދަންމާލުމަށް ރައީސް ޑރ. މުހައްމަދު މުއިއްޒު ކުރައްވާ ކަމެއް ކަމަށް ވެސް އެ ބޭފުޅުން ވިދާޅުވި އެވެ. މިކަންކަމާއި ދެކޮޅަށް ރައްޔިތުން ތެދުވެ، ފާޅުގައި އެ ކަންކަމަށް ނޫނެކޭ ބުނަން ޖެހޭ ކަމަށް ވެސް ޕިކަޕް ޖަލްސާގައި ވާހަކަދެއްކެވި ބޭފުޅުން ވަނީ ވިދާޅުވެފަ އެވެ.
