އެމްޑީޕީ ނޫން ޕާޓީ އަކަށް ރައްޔިތުން ބޭނުންވާ ކަންތައްތައް އެނގިފަ ނެތް ކަން ތާރީޚުން ވެސް ސާބިތުވޭ: އާޒިމް
އެމްޑީޕީއަކީ އަބަދުވެސް ރައްޔިތުންގެ ގާތަށް ގޮސް، އެމީހުންގެ އަޑުއަހައިގެން ކަންކަން ނިންމާ ޕާޓީއެއް ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެެ. އާސަންދަ އާއި ހިލޭ ޑިގްރީ ފަދަ މުހިންމު ސިޔާސަތުތަކަކީ ރައްޔިތުންގެ ބޭނުންތައް ދެނެގަނެގެން ގެނައި ބަދަލުތަކެއްކަން ފާހަގަކުރައްވައި، އިންތިޚާބުތައް ވަކިވަކިން ބޭއްވުމުގެ މުހިންމުކަމުގެ މައްޗަށް އޭނާ އަލިއަޅުއްވާލެއްވި. އެހެންކަމުން، ރައްޔިތުންނަށް ދިމާވެފައިވާ ބޯހިޔާވަހިކަމާއި އެހެނިހެން ދަތިތަކަށް ހައްލު ހޯދުމަށްޓަކައި އެމްޑީޕީގެ ސިޔާސަތުތަކަށް ތާއީދު ކޮށްދެއްވުމަށް އާޒިމް ވަނީ އެދިވަޑައިގެންފަ.
މާލެ ސިޓީގެ މޭޔަރު އާދަމް އާޒިމް | ރާއްޖެއެމްވީ
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ނޫން އެއްވެސް އެހެން ސިޔާސީ ޕާޓީ އަކަށް ރައްޔިތުން ބޭނުންވާ ކަންތައްތައް އެނގިފަ ނެތް ކަން ތާރީޚުން ވެސް ސާބިތުވާ ކަމަށް މާލެ ސިޓީގެ މޭޔަރު އަދި އެމްޑީޕީގެ މާލޭގެ މޭޔަރުކަމަށް ވާދަކުރައްވާ ކެންޑިޑޭޓް އާދަމް އާޒިމް ވިދާޅުވެއްޖެ އެވެ.
ހުކުރު ދުވަހުގެ ރޭ އެމްޑީޕީ އިން ކުރިއަށް ގެންދިއަ ހުޅުމާލެ ދެކުނު ދާއިރާގެ ދޮރުން ދޮރަށް ހަރަކާތުގައި ވާހަކަ ދައްކަވަމުން އާޒިމް ވިދާޅުވީ އެމްޑީޕީ އަކީ އަބަދުވެސް ރައްޔިތުން ގާތަށް ގޮސް، ރައްޔިތުންގެ ކަންތައްތައް ދެނެގަނެގެން ކުރާ ޕާޓީ އެއް ކަމަށެވެ.
އާޒިމް ވިދާޅުވީ އެމްޑީޕީ އިން ބޭނުންވަނީ އިންތިޚާބުތައް މިހާރު ވެސް ހުރި ގޮތަށް ބަހައްޓަން ކަމަށެވެ. ފެހި ގާނޫނު އަސާސީ އެކުލަވާލި އިރު ވެސް އިންތިޚާބު ވަކިން ބޭއްވީ އެއްކޮށް ބާއްވަން ނޭނގިގެން ނޫން ކަމަށް އާޒިމް ވިދާޅުވި އެވެ.
އެއީ ހަމަ ސީދާ ކަނޑައެޅިގެން ރައްޔިތުން ކައިރިއަށް އެމްޑީޕީ އިން ދާން ބޭނުން ވާތީ އެމްޑީޕީ އިސްނަގައިގެން އެ ގާނޫނު އަސާސީ، ފެހި ގާނޫނު އަސާސީ އެއޮތީ ގެނަސްފަ. މިގޮތަށް ބޭއްވީ ކޮންމެ އިންތިޚާބަކާ ދިމާކޮށް ރައްޔިތުން ކައިރިއަށް ގޮސް، ރައްޔިތުންގެ އަޑު އަހައި ރައްޔިތުން ބޭނުންވާ ކަންތައްތައް ހައްލު ކޮށްދޭން. އެގޮތުގެ މަތިން އެމްޑީޕީ އަށް މި އެނގެނީ ރައްޔިތުން ބޭނުންވާ ކަންތައްތައް. އެއްވެސް އެހެން ސިޔާސީ ޕާޓީ އަކަށް ރައްޔިތުން ބޭނުންވާ ކަންތައްތައް އެނގިފަ ނެތް ކަން އަޅުގަނޑުމެންނަށް އެބަ ސާބިތުވޭ އަޅުގަނޑުމެންގެ ތާރީޚުން ވެސް. އެގޮތުގެ މަތިން އެމްޑީޕީ އިން ރައްޔިތުންގެ ކާރިއަށް ގޮސް ބެލިބެލުމުން މި އެނގެނީ، ބޭސްފަރުވާ އަށް ސަލާންޖަހަން ޖެހޭ ރައްޔިތުން އެބަ އުޅޭ.މާލެ ސިޓީގެ މޭޔަރު އާދަމް އާޒިމް
އާޒިމް ވިދާޅުވީ އާސަންދަ ތައާރަފު ކުރީ އެކަމަށް ހައްލެއް ހޯދައި ދިނުމަށް ކަމަށެވެ. މީގެ އިތުރުން އޯލެވެލް ނިންމާ ދަރިން ޑިގްރީ އަށް ނުފޮނުވޭ މައިންބަފައިން އެބަތިބި ކަމާއި، މާމަ އާއި ކާފަ އަށް އިތުރު މާލީ އެހީ ބޭނުންވާ ކަމާއި ގެދޮރުގެ ހާލަތު ވެސް ދަށް ކަން އެނގުނީ ވެސް އެގޮތަށް ދޮރުން ދޮރަށް އެ ޕާޓީ އިން ހިނގައި ކުރިއަށް ގެންދިއަ ހަރަކާތްތަކުގެ ތެރެއިން ކަމަށް ވެސް އާޒިމް ވިދާޅުވި އެވެ.
އެމްޑީޕީ އިން ރައްޔިތުން ކައިރިއަށް ގޮސްގެން މި އެނގުނީ ގެދޮރުގެ ހާލަތު ވެސް ވަރަށް ދަށް ކަން. މާލޭގަ ވެސް އަދި ރަށްރަށުގަ ވެސް. ޚާއްޞަކޮށް މާލޭގައި ވަރަށް ދަތިކޮށް ކަން ރައްޔިތުން ތިބީ، ދިރިއުޅެނީ. އެނގުނީމަ ފުލް ސޮލިއުޝަން އެއް. ހުރިހާ އެންމެންނަށް ގެދޮރު ލިބޭނެ ޕްރޮގްރާމް އެއް ރައީސް ސޯލިހުގެ ސަރުކާރުން އަޅުގަނޑުމެން އެގޮތަށް ކަނޑައަޅާފަ ނިންމީ. އަދި ހަމަ އެގޮތަށް މި އެނގުނީ މާލޭ ދަފްތަރުގައި ތިބި ރައްޔިތުން ވެސް މިތިބީ ވަރަށް ހާލުގަ ކަން. އެމީހުންނަށް މާލެ އިން ގޯތި ގެދޮރު ނުލިބޭ ގޮތަށް ސިޔާސަތެއް އޮތީމަ އެކަމަކީ ވެސް ވަރަށް ބޮޑު މައްސަލައެއް ކަން.މާލެ ސިޓީގެ މޭޔަރު އާދަމް އާޒިމް
މިހާރު މި ހުރިހާ ކަމަކަށް ހައްލު ހޯދައިދީފައިވާ ކަމަށާއި މިއީ ރައްޔިތުން އުފަލާއެކު ފާހަގަ ކުރާ ކަންކަން ކަމަށް ވެސް އާޒިމް ވިދާޅުވި އެވެ.
އާޒިމް ވިދާޅުވީ މި ހުރިހާ ކަމެއް ވެސް ކުރެވުނީ އިންތިޚާބުތައް މިގޮތަށް އޮންނާތީ ކަމަށެވެ. މިކަންކަން މިގޮތަށް ހަމަޖެހިފައި ނެތް ނަމަ ބޭސްފަރުވާގެ ކަންކަން ވެސް، ބޯހިޔާވަހިކަމުގެ ކަންކަން ވެސް ހަމަނުޖެހޭނެ ކަމަށާ އެހެން ކަމުން މި ސިޔާސަތުތައް ތަންފީޒު ކުރުމުގައި އެމްޑީޕީ އަށް އެހީވުމަށް ހުރިހާ ފަރާތްތަކުން ވެސް ތިލަފަތަށް ވޯޓު ދިނުމަށް ވެސް އާޒިމް ވަނީ ގޮވާލައްވާފަ އެވެ.
