މާލެސިޓީގައި ނުރައްކާތެރި އެކްސިޑެންޓްތައް ވަރަށް ގިނަ، މިދިޔަ މަހުގެ 23 ގައި އެކަނި ވެސް 9 އެކްސިޑެންޓް ހިނގާފައިވޭ
ފެބްރުއަރީ 22 އިން 28 އަށް މާލެ ސަރަހައްދުގައި 41 އެކްސިޑެންޓެއް ހިނގާފައިވާއިރު، މީގެ ތެރެއިން ގިނަ ހާދިސާތަކަކީ ދުވާލުގެ ވަގުތުތަކުގައި ސައިކަލުތައް ޖެހިގެން ހިނގާފައިވާ ހާދިސާތައް. މި އެކްސިޑެންޓްތަކުގައި ގިނަ ބަޔަކަށް އެކިވަރުގެ އަނިޔާ ލިބިފައިވާއިރު، ބްރިޖް ކައިރީގައި ހިނގި ނުރައްކާތެރި ހާދިސާއެއްގައި 16 އަހަރުގެ ކުއްޖަކު ވަނީ ނިޔާވެފައި.
ހުޅުމާލޭ ފޭސް-2ގައި ފުލުހުންގެ ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓް. | ސޯޝަލް މީޑިއާ
މިދިޔަ ހަފްތާގައި މާލެސިޓީގައި އެކަނި ވެސް 40ށް ވުރެ ގިނަ އެކްސިޑެންޓް ހިނގާފައިވާ ކަމަށް ފުލުހުން ބުނެފި އެވެ.
ޓްރެފިކް ތަފާސްހިސާބާ ގުޅޭގޮތުން ހޯމަ ދުވަހު ފުލުހުން ބުނީ، 2026 ފެބްރުއަރީ 22 އިން 28 ގެ ނިޔަލަށް މާލެ އާއި ބްރިޖް އަދި ހައިވޭ ހިމެނޭ ސަރަހައްދުގައި ޖުމްލަ 41 މަގުމަތީ އެކްސިޑެންޓް ހިނގާފައިވާ ކަމަށެވެ. މި މުއްދަތުގެ ތެރޭގައި އެންމެ ގިނަ އެކްސިޑެންޓް ހިނގާފައިވަނީ ފެބްރުއަރީ 23 ވަނަ ދުވަހު ކަމަށާއި، އެ ދުވަހު އެކަނިވެސް 9 އެކްސިޑެންޓް ހިނގާފައިވާ ކަމަށެވެ. އަދި މުޅި ހަފުތާގެ ތަފާސްހިސާބުތަކަށް ބަލާއިރު 36 އެކްސިޑެންޓް ހިނގާފައިވަނީ މާލެ ސިޓީގައި ކަމަށް ފުލުހުން ބުނެ އެވެ.
މި އެކްސިޑެންޓްތަކުގެ ތެރެއިން ގާތްގަނޑަކަށް 66 އިންސައްތަ ހާދިސާ ހިނގާފައިވަނީ ދުވާލުގެ ވަގުތުތަކުގައިކަން ފާހަގަކޮށް ފުލުހުން ބުނީ، އެންމެ ގިނައިން ހިނގާފައިވަނީ ސައިކަލުތައް ޖެހިގެން ހިނގި އެކްސިޑެންޓްތައް ކަމަށެވެ. އޭގެ ތެރޭގައި ސައިކަލާއި ސައިކަލު ޖެހިގެން ހިނގި 15 ހާދިސާއަކާއި، ސައިކަލާއި ކާރު ޖެހިގެން ހިނގި 8 ހާދިސާއެއް ހިމެނެ އެވެ.
މީގެ އިތުރުން ފުލުހުން ބުނީ، ރިޕޯޓްކޮށްފައިވާ ހުރިހާ ހާދިސާތަކަށް ބަލާއިރު، 38 އެކްސިޑެންޓެއްގައި މީހުންނަށް ކުދި އަނިޔާ ލިބިފައިވާ ކަމަށާއި، 2 ހާދިސާއެއްގައި މީހުންނަށް ސީރިއަސް އަނިޔާތަކެއް ލިބިފައިވާ ކަމަށެވެ. އަދި މި މުއްދަތުގެ ތެރޭގައި ހިނގި އެކްސިޑެންޓެއްގައި އެކަކު ނިޔާވެފައިވާ ކަމަށް ފުލުހުން ބުނެ އެވެ.
24 ފެބްރުއަރީ 2026 ވީ އަންގާރަ ދުވަހުގެ ރޭ މާލެގެ ބޮޑުތަކުރުފާނު މަގު، ބްރިޖު ލައިޓް ކައިރިން ހިނގި ނުރައްކާތެރި އެކްސިޑެންޓުގައި އަނިޔާވި 16 އަހަރުގެ ފިރިހެން ކުއްޖާ އަށް ފަރުވާ ދެމުން ދަނިކޮށް 25 ފެބްރުއަރީ ގައި ވަނީ ނިޔާވެފަ އެވެ.
މިފަހުން މާލެސިޓީގައި ހިނގާ އެކްސިޑެންޓްތަކުގެ އަދަދު ވަނީ އިތުރުވެފަ އެވެ.
އެހެންކަމުން މަގުމަތީގެ ސަލާމަތާއި ރައްކާތެރިކަމަށްޓަކައި ހުރިހާ ފަރާތްތަކުން ވެސް ސަމާލުވުމަށާއި، ޓްރެފިކް ގަވާއިދުތަކަށް ފުރިހަމައަށް ބޯލެނބުމަށް ފުލުހުން އިލްތިމާސްކޮށްފައިވެ އެވެ. އަދި އެކަކު އަނެކަކަށް އަޅާލައި، މަގުތަކަކީ އަމާން ތަނަކަށް ހެދުމަށް އެންމެން ގުޅިގެން މަސައްކަތް ކުރަމަށް އެދިފައިވެ އެވެ.
