އަންނަ މަހުގެ 4 ގައި ބާއްވާ އިންތިޚާބަށް 588 ވޯޓު ފޮށި ބަހައްޓާނެ
ކުރިއަށް އޮތް އިންތިޚާބުގައި މާލެ ސަރަޙައްދުގައި 240 ފޮށި އަދި އަތޮޅުތަކުގައި 322 ފޮށި ބެހެއްޓުމަށް ނިންމާފައިވާއިރު، އެންމެ ގިނަ ފޮށި ބަހައްޓަނީ އައްޑޫ ސިޓީ އާއި ރ އަތޮޅުގަ. ރާއްޖެ އިން ބޭރާއި، ސިނާޢީ ރަށްތަކުގައި މިފަހަރު ފޮށި ނުބަހައްޓަން ނިންމާފައިވާއިރު، ޖުމުލަ 294,937 މީހުންނަށް ވޯޓުލުމުގެ ޙައްޤު ލިބިގެންވޭ. މި އިންތިޚާބުގައި ކައުންސިލްތަކާއި އަންހެނުންގެ ކޮމިޓީތަކުގެ އިތުރުން ރައްޔިތުންގެ ޚިޔާލު ހޯދުމުގެ ވޯޓެއްވެސް ކުރިއަށްދާނެ.
ލޯކަލް ކައުންސިލް އިންޚާބު 2020 | ރާއްޖެއެމްވީ
ކުރިއަށް އޮތް ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓުލުމަށްޓަކައި ރާއްޖޭގެ އެކި ސަރަޙައްދުތަކުގައި ޖުމުލަ 588 ވޯޓު ފޮށި ބެހެއްޓުމަށް ނިންމާފައިވާ ކަމަށް އިލެކްޝަންސް ކޮމިޝަނުން ހާމަކޮށްފި އެވެ. އޭޕްރިލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބުގައި، އެހެން ފަހަރުތަކެކޭ ވެސް އެއްގޮތަށް އެންމެ ގިނަ ވޯޓު ފޮށި ބެހެއްޓުމަށް ހަމަޖެހިފައިވަނީ އަތޮޅުތެރޭގެ ރަށްތަކުގަ އެވެ.
އިލެކްޝަންސް ކޮމިޝަނުން އާންމުކޮށްފައިވާ ތަފާސްހިސާބުތަކަށް ބަލާއިރު، އަތޮޅުތެރޭގައި 322 ވޯޓު ފޮށި ބެހެއްޓުމަށް ވަނީ ނިންމާފަ އެވެ. މާލެ ސަރަޙައްދަށް ބަލާއިރު، މާލެ އާއި ހުޅުމާލެ އަދި ވިލިމާލެ ހިމެނޭހެން ޖުމުލަ 240 ވޯޓު ފޮށި ބަހައްޓާނެ އެވެ. މީގެ ތެރޭގައި ހިމެނެނީ މާލޭގައި ބަހައްޓާ 180 ފޮށްޓާއި، ހުޅުމާލޭގައި ބަހައްޓާ 51 ފޮށީގެ އިތުރުން ވިލިމާލޭގައި ބަހައްޓާ 9 ފޮށްޓެވެ. މާލެ ސަރަޙައްދުގައި ބަހައްޓާ ފޮށިތަކުގެ ތެރެއިން 98 ފޮށްޓަކީ މާލޭގެ ރައްޔިތުން ވޯޓުލުމަށް ޚާއްޞަ ފޮށިތަކެވެ. އަދި އަތޮޅުތަކާއި ސިޓީތަކަށް ނިސްބަތްވާ، މާލޭގައި ދިރިއުޅޭ ރައްޔިތުން ވޯޓުލުމަށް 142 ފޮށި ބެހެއްޓުމަށް ވަނީ ހަމަޖެހިފަ އެވެ.
އަތޮޅުތަކުގެ ތެރެއިން އެންމެ ގިނަ ވޯޓު ފޮށި ބެހެއްޓުމަށް ހަމަޖެހިފައިވަނީ އައްޑޫ ސިޓީ އާއި ރ އަތޮޅު އަދި ހއ އަތޮޅުގަ އެވެ. އެގޮތުން އައްޑޫ ސިޓީގައި 29 ފޮށި، ރ އަތޮޅުގައި 25 ފޮށި އަދި ހއ އަތޮޅުގައި 23 ފޮށި ބެހެއްޓުމަށް ވަނީ ނިންމާފަ އެވެ. މީގެ އިތުރުން ރިސޯޓުތަކުގައި 21 ވޯޓު ފޮށި ބަހައްޓާއިރު، ޖަލުތަކުގައި ޖުމުލަ 5 ފޮށި ބަހައްޓާނެ އެވެ. ޖަލުތަކުގެ ތެރެއިން މާފުށި ޖަލުގައި 2 ފޮށި ބަހައްޓާއިރު، އައްސޭރި ޖަލާއި ހުޅުމާލެ ޖަލު އަދި ދޫނިދޫ ޖަލުން ކުރެ ކޮންމެ ތަނެއްގައި އެއް ފޮށި ބަހައްޓާނެ އެވެ.
އިލެކްޝަންސް ކޮމިޝަނުން ބުނި ގޮތުގައި، ވޯޓު ފޮށި ބެހެއްޓުމަށް ބޭނުންވާ އަދަދަށް މީހުން ރަޖިސްޓްރީވެފައި ނުވާތީ، މިފަހަރުގެ އިންތިޚާބުގައި ރާއްޖެއިން ބޭރުގެ އެއްވެސް ޤައުމެއްގައި އަދި ސިނާޢީ މަސައްކަތްކުރާ އެއްވެސް ރަށެއްގައި ވޯޓު ފޮށި ނުބެހެއްޓުމަށް ވަނީ ނިންމާފަ އެވެ.
މި އިންތިޚާބުގައި ވޯޓުލުމުގެ ޙައްޤު ޖުމުލަ 294,937 މީހުންނަށް ލިބިގެންވާއިރު، އެކި މަޤާމުތަކަށް 2,960 ކެންޑިޑޭޓުން ވާދަކުރެ އެވެ. އޭޕްރިލް 4 ގައި ބާއްވާ މި ވޯޓުލުމުގައި ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުން، ރައްޔިތުންގެ ޚިޔާލު ހޯދުމުގެ ޢާންމު ވޯޓެއްވެސް ކުރިއަށްދާނެ ކަމަށް އިލެކްޝަންސް ކޮމިޝަނުން މަޢުލޫމާތު ދީފައިވެ އެވެ.
