ވަކި މުއްދަތެއް ނެތް ގޮތަށް، ކުވެއިތުގައި ހުންނަ އެމެރިކާގެ އެމްބަސީ ބަންދު ކޮށްފި

އެމެރިކާ އާއި އިޒްރޭލް އިން އީރާން އަށް ދެމުންގެންދާ ހަމަލާ ތަކުގެ ރައްދުގައި އީރާން އިން ހަމަލާ ދޭން ފަށައި، ބޮޑު ހަނގުރާމައެއް ފެށިފައިވާއިރު، ކުވެއިތުގައި ހުންނަ އެމެރިކާގެ އެމްބަސީ ބަންދު ކޮށްފި އެވެ. 

އަންގާރަ ދުވަހު މި ނިންމުން ނިންމާފައިވާއިރު، އެމްބަސީ ބަންދު ކޮށްފައި ވަނީ ވަކި މުއްދަތެއް ވެސް ނެތް ގޮތަށެވެ. މިއީ ސަރަހައްދީ މަސްރަހު ގޯސްވަމުން އަންނަ ދަނޑިވަޅެއްގައި، ސަލާމަތީ ފިޔަވަޅެއްގެ ގޮތުގައި އަޅާފައިވާ ފިޔަވަޅެއް ކަމަށް ބުނެފައިވެ އެވެ. 

އެމެރިކާގެ އެމްބަސީ އިން އެކްސްގައި އާންމު ކުރި ބަޔާނެއްގައި ބުނެފައި ވަނީ، ސަރަހައްދީ ނުތަނަވަސްކަން އިތުރު ވަމުން ދާތީ، ކުވެއިތުގައި ހުންނަ އެމެރިކާގެ މިޝަން، ވަކި އެންގުމެއް އަންގަންދެން ބަންދު ކޮށްފައިވާ ކަމަށެވެ. މީގެ އިތުރުން އެމްބަސީ އިން ދެމުން ގެންދިޔަ ކޮންސިއުލާ ޚިދުމަތްތަކާއި، ކުރިން ދީފައިވާ ހުރިހާ އެޕޮއިންޓްމަންޓެއް ވެސް، މިހާރު ކެންސަލް ކޮށްފައިވާ ކަމަށް އެ ބަޔާނުގައި ވަނީ ބުނެފަ އެވެ. 

މި އެމްބަސީ ބަންދު ކޮށްފައިވާއިރު، އީރާން އިން ކުވެއިތުގައި ހުންނަ އެމެރިކާގެ ބޭހަކަށް އަމާޒުކޮށް ހަމަލާ ދީފައިވެ އެވެ. އަދި އެ އެމްބަސީ ހުންނަ ސަރަހައްދުން ދުން ތަކެއް އަރާ މަންޒަރު ފެންނަ ވީޑިއޯ ވެސް، ހޯމަ ދުވަހު ސޯޝަލް މީޑިއާގައި ދައުރުވެފައިވެ އެވެ. އީރާން އިން ގެންދަނީ މެދު ކެނޑުމެއް ނެތި، ސަރަހައްދުގައި ހުރި އެމެރިކާގެ އަމާޒު ތަަކަށް ހަމަލާ ދެމުންނެވެ. 

އެމެރިކާގެ އެމްބަސީ އިން ވަނީ އެއްވެސް ބޭނުމެއްގައި އެމްބަސީ ހުންނަ ސަރަހައްދަށް މީހުން ނުދިޔުމަށް އިލްތިމާސް ކޮށްފަ އެވެ. މަސްރަހު ދިރާސާ ކުރާ ފަރާތް ތަކުން ބުނާ ގޮތުގައި، މިއީ މިފަަހަކަށް އައިސް އެ ސަރަހައްދުގައި އުފެދިފައިވާ އެންމެ ބޮޑު ނުތަނަވަސް ކަމެވެ. 

ކުވެއިތުގައި ހުންނަ އެމެރިކާގެ އެމްބަސީ ބަންދު ކޮށްފައި ވީ ނަަމަވެސް، އެ ޤައުމުގައި ތިބި އެމެރިކާގެ ރައްޔިތުންގެ ސަލާމަތީ ކަން ކަމަށް ސަމާލުވުމަށް ވަނީ އަންގައިފަ އެވެ. އަދި މަސްރަހަށް އަންނަ ބަދަލުތައް އެމެރިކާގެ ސްޓޭޓް ޑިޕާޓްމަންޓް އިން ވަރަށް ކައިރިން ބަލަމުން ދާނެ ކަމަށް ވެސް ބުނެފައިވެ އެވެ.