އީރާނުގެ ސިފައިންގެ ބޭސްތަކާއި، މިސައިލް މަރުކަޒު ތަކެއް ހަލާކު ކޮށްލާފައިވާ ކަމަށް އެމެރިކާ އިން ބުނެފި

އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ކޮމާންޑު ޕޯސްޓުތަކާއި، އީރާންގެ ވައިގެ ދިފާއީ ނިޒާމު އަދި މިސައިލް ފޮނުވާ ތަންތަން ހަލާކު ކޮށްލާފައިވާ ކަމަށް އެމެރިކާ އިން ބުނެފި އެވެ. 

އެމެރިކާގެ ސެންޓްރަލް ކޮމާންޑް އިން އަންގާރަ ދުވަހު ބުނީ، އެ ޤައުމުގެ ސިފައިން ވަނީ އައިއާރުޖީސީގެ ކޮމާންޑް ކޮންޓްރޯލް ސެންޓަރުތަކާއި، އީރާންގެ ވައިގެ ދިފާއީ ނިޒާމާއި، މިސައިލާއި، ޑްރޯން ފޮނުވާ ތަން ތަނުގެ އިތުރުން، ސިފައިންގެ އެއާފީލްޑުތައް ހަލާކު ކޮށްލާފައި ކަމަށެވެ. 

މިދިޔަ ހޮނިހިރު ދުވަހުން ފެށިގެން އެމެރިކާ އާއި އިޒްރޭލް އިން ގެންދަނީ އީރާންއާ ދެކޮޅަށް ހަނގުރާާމަ ކުރަމުންނެވެ. އެމެރިކާ އިން ބުނެފައި ވަނީ، މިހާތަނަށް އީރާންގެ 190 އަށް ވުރެ ގިނަ ތަންތަނަށް ހަމަލާ ދީފައިވާ ކަމަށެވެ. މި ހަމަލާ ތަކުގައި އީރާންގެ މިސައިލް މަރުކަޒުތަކާއި، ނޭވީ އަދި ކޮމާންޑު ކޮންޓްރޯލުކުރާ ތަންތަން ހިމެނޭ ކަމަށް އެމެރިކާ އިން ބުނެފައިވެ އެވެ. 

އެމެރިކާ އާއި އިޒްރޭލްގެ ހަމަލާ ތަކުގެ ރައްދުގައި އީރާނުން ވެސް ގެންދަނީ ވަރުގަދަ ހަމަލާ ތަކެއް ދެމުންނެވެ. އެ ހަމަލާ ތަކުގައި އެމެރިކާގެ އަސްކަރިއްޔާގެ ހަތަރު އޮފިސަރަކު މިހާތަނަށް މަރުވެފައިވާއިރު، އެ ޤައުމުގެ ތިން ފައިޓާ ޖެޓެއް އީރާން އިން ވަނީ ވައްޓާލައިފަ އެވެ. މީގެ އިތުރުން އީރާން އިން ގެންދަނީ ސަރަހައްދުގައި ހުރި އެމެރިކާގެ ބޭސް ތަކަށް ވެސް ހަމަލާ ދެމުންނެވެ. 

އީރާާނުން ދަނީ ބަހްރެއިން އާއި، ޖޯޑަން އާއި، ކުވެއިތު އާއި، ޤަތަރު އަދި އެކުވެރި އަރަބި އިމާރާތުގައި ހުރި އެމެރިކާގެ ބޭސް ތަކަށް އަމާޒުކޮށް ހަމަލާ ދެމުންނެވެ. މީގެ އިތުރުން، އެކި އެކި ޤައުމު ތަކުގައި ހުރި އެމެރިކާގެ އެމްބަސީ ތަކަށް އަމާޒުކޮށް ވެސް އީރާން އިން ހަމަލާ ދެމުން ގެންދެ އެވެ. މިކަމަކީ އެމެރިކާގެ ރައީސް ޑޮނަލްޑް ޓްރަމްޕް އަށް ވަރަށް ބޮޑު ހައިރާން ކަމެއް ލިބިވަޑައިގެންފައިވާ ކަމެކެވެ.