އީރާން ހަނގުރާމަ އަކީ ނިމުމެއް ނެތް ހަނގުރާމަ އަކަށް ނުވާނެ: ނަތަންޔާހޫ

އެމެރިކާ އާއި އިޒްރޭލް އިން އީރާނަށް ދިން ހަމަލާ ތަކުގެ ސަބަބުން ފެށިފައިވާ ހަނގުރާމަ އަކީ، ނިމުމެއް ނެތް ހަނގުރާމަ އަކަށް ނުވާނެ ކަމަށާއި، އެކަމަށް ކޮންމެ ވެސް ވަރެއްގެ ވަގުތެއް ނަގާނެ ކަމަށް، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ. 

ހޯމަ ދުވަހު ފޮކްސް ނޫހަށް ދެއްވި އިންޓަވިޔުއެއްގައި ނަތަންޔާހޫ ވިދާޅުވީ، އިޒްރޭލް އާއި، އެމެރިކާ އިން އީރާންއާ ދެކޮޅަށް ފިޔަވަޅު އަޅާން މަޖުބޫރުވީ ކަމަށެވެ. އެއީ ކުރިއަށް އޮތް މަދު ދުވަސް ތަކެއްގެ ތެރޭގައި، ހަމަލާ ނުދެވޭނެ ފެންވަރުގެ ވަރުގަދަ ނިއުކްލިއާ މަރުކަޒު ތަކެއް އީރާން އިން ބިނާ ކުރަމުން ދާތީ ކަމަށް ނަތަންޔާހޫ ވިދާޅުވި އެވެ. 

މިހާރު ކުރިއަށްދާ ހަނގުރާމަ އަކީ ނިމުމެއް ނެތް ހަނގުރާމަ އަކަށް ނުވާނެ ކަމަށާއި، އެއީ ވަރަށް އަވަސް އަދި ނަތީޖާ ނެރެވޭނެ ފަދަ ހަރުދަނާ ފިޔަވަޅު ތަކެއް ކަަމަށް ވެސް ނަތަންޔާހޫ ވިދާޅުވެފައިވެ އެވެ. އެމެރިކާ އާއި އިޒްރޭލުން އީރާން އަށް ހަމަލާ ދޭން ފެށީ މިދިޔަ ހޮނިހިރު ދުވަހު އެވެ. 

ހަމަލާތަކާ ގުޅޭ ގޮތުން އިތުރަށް ވާހަކަ ދައްކަވަމުން ނަތަންޔާހޫ ވިދާޅުވީ، މި ކުރިމަތިލުން ތަަކަށް ކޮންމެ ވެސް ވަރެއްގެ ވަގުތެއް ނަގާނެ ކަމަށެވެ. ނަމަވެސް، އެކަން އަހަރު ތަކަކަށް ދެމިގެން ނުދާނެ ކަމަށް ނަތަންޔާހޫ ވިދާޅުވި އެވެ. އެކަން ފާހަގަ ކުރައްވައި އޭނާ ވިދާޅުވީ މިދިޔަ އަހަރުގެ ޖޫން މަހުގެ ތެރޭގައި އެމެރިކާ އާއި އިޒްރޭލް އިން އީރާން އަށް ދިން ހަމަލާ ތަކަށް ފަހު، އީރާން އިން ގެންދިޔައީ ނިއުކްލިއާ މަރުކަޒު ތަކެއް ބިނާ ކުރަމުންނެވެ. 

އެއާ އެކު ނަތަންޔާހޫ ވިދާޅުވީ، އީރާން އިން ބިނާ ކުރަމުންދާ ބިންގަރާސްތަކާއި، އައު މަރުކަޒު ތަކުގެ ސަބަބުން އެ ޤައުމުގެ ބެލިސްޓިކް މިސައިލް ޕްރޮގްރާމް އާއި، އެޓޮމިކް ބޮން އުފެއްދުމުގެ މަސައްކަތް ތަަކަށް ހަމަލާ ނުދެވޭނެ ފަދަ ރައްކާތެރި ކަމެއް ކުރިއަށް އޮތް މަސް ތަކުގެ ތެރޭގައި ލިބިގެން ދާނެ ކަމަށެވެ. އެހެންކަމުން މިހާރު އިޒްރޭލް އާއި އެމެރިކާ އިން އަޅާފައިވާ ފިޔަވަޅު ނާޅައިފި ނަމަ، މުސްތަޤުބަލުގައި އެއްވެސް ފިޔަވަޅެއް އެޅުމުގެ ފުރުސަތު ނޯންނާނެ ކަމަށް އޭނާ ވިދާޅުވި އެވެ.