ކުވެއިތާއި ސައުދީގައި ހުރި އެމެރިކާ އެމްބަސީތަކަށް އީރާނުން ހަމަލާ ދިނުމާ ގުޅިގެން އެ ތަންތަން ބަންދުކޮށްފި
ސަރަޙައްދީ މަސްރަޙު ނުތަނަވަސްވެ، ސައުދީ އަރަބިއްޔާ އާއި ކުވެއިތުގައި ހުންނަ އެމެރިކާގެ އެމްބަސީތަކަށް އީރާނުން ހަމަލާދިނުމާއެކު އެތަންތަނުގެ ޚިދުމަތްތައް މެދުކަނޑާލައިފި. ސައުދީގައި ހުންނަ އެމްބަސީއަށް ޑްރޯން ހަމަލާތަކެއް އަމާޒުވުމާ ގުޅިގެން، އެ ގައުމުތަކުގައި އުޅޭ އެމެރިކާ ރައްޔިތުން ރައްކާތެރިކަމުގެ ފިޔަވަޅުތައް އެޅުމަށް ވަނީ އިލްތިމާސްކޮށްފައި.
މިއީ ސައުދީ އަރަބިއްޔާގެ ރިޔާޟްގައި ހުންނަ އެމެރިކާގެ އެމްބަސީގައި 2025 މާރިޗު 3 ވަނަ ދުވަހު އަލިފާން ރޯވެފައިވާ މަންޒަރު ފެންނަ ކަމަށް ބުނެ، ސޯޝަލް މީޑިއާގައި ދައުރުވަމުންދާ ވީޑިއޯއަކުން ނަގާފައިވާ ސްކްރީންޝޮޓެއް. | ސްކްރީން އިމޭޖް
ސަރަޙައްދީ މަސްރަޙު ނުތަނަވަސްވެފައިވާތީ، ވަކި ގޮތެއް އަންގަންދެން ކުވެއިތުގައި ހުންނަ އެމެރިކާގެ އެމްބަސީ ބަންދުކޮށްފި ކަމަށް އެ އެމްބަސީން އަންގާރަ ދުވަހު ބުނެފިއެވެ. މީގެ އިތުރުން ސައުދީ އަރަބިއްޔާގައި ހުންނަ އެމެރިކާގެ މިޝަން ވެސް އެ ދުވަހަށް ބަންދުކޮށްފައިވާކަން ވަނީ އިޢުލާންކޮށްފައެވެ.
އެކްސްގައި އާންމުކުރި ބަޔާނެއްގައި ކުވެއިތުގައި ހުންނަ އެމެރިކާގެ އެމްބަސީން ބުނީ، ސަރަޙައްދީ މަސްރަޙު ނުތަނަވަސްވެފައިވާތީ، ވަކި ގޮތެއް އަންގަންދެން އެމްބަސީ ބަންދުކޮށްފައިވާ ކަމަށެވެ. އަދި ކޮންސިއުލާ ޚިދުމަތްތަކަށް ދީފައިވާ އާންމު އެޕޮއިންޓްމަންޓްތަކާއި ކުއްލި ހާލަތްތަކުގައި ދޭ އެޕޮއިންޓްމަންޓްތައް ވެސް މިހާރު ކެންސަލްކޮށްފައިވާ ކަމަށް އެ ބަޔާނުގައިވެއެވެ.
މި އެމްބަސީ ބަންދުކުރަން ނިންމާފައި މިވަނީ، ކުވެއިތުގައި ހުންނަ އެމެރިކާގެ އެމްބަސީ އަށް ދިން ހަމަލާތަކަކާ ގުޅިގެން އެމްބަސީ ހުންނަ ސަރަޙައްދުން ދުން އަރަމުންދާތަން ފެނުނުތާ އެއް ދުވަސް ފަހުންނެވެ. އީރާނުން ގަލްފުގެ ގައުމުތަކުގައި ހުރި އެމެރިކާއާ އިޒްރޭލާ ގުޅުން ހުރި ތަންތަނަށް ހަމަލާދޭތާ ތިން ދުވަސް ވެފައިވާއިރު، އެމްބަސީ ހުންނަ ސަރަޙައްދަށް އެއްވެސް މީހަކު ނުދިއުމަށް އެމެރިކާގެ ޑިޕްލޮމެޓިކް މިޝަނުން ވަނީ އިލްތިމާސްކޮށްފައެވެ.
ސައުދީ އަރަބިއްޔާގެ ދިފާއީ ވުޒާރާއިން މައުލޫމާތުދޭ ގޮތުގައި، ރިޔާޟުގައި ހުންނަ އެމެރިކާގެ އެމްބަސީއަށް އަމާޒުކޮށް ދެ ޑްރޯން ހަމަލާއެއް ދީފައިވާތީ، އަންގާރަ ދުވަހު އެމްބަސީ ބަންދުކޮށްފައިވާ ކަމަށް ރިޔާޟްގައި ހުންނަ އެމެރިކާގެ އެމްބަސީން ވަކިން ނެރުނު ބަޔާނެއްގައި ބުނެފައިވެއެވެ.
އެކްސްގައި ކުރި ޕޯސްޓެއްގައި އެމްބަސީން ބުނީ، އެމެރިކާގެ ރައްޔިތުންނަށް ދޭ އާންމު އަދި ކުއްލި ހާލަތުގެ ހުރިހާ ޚިދުމަތްތަކެއް މިހާރު މެދުކަނޑާލާފައިވާ ކަމަށެވެ. އަދި ޖިއްދާ، ރިޔާޒް އަދި ދަހްރާންގައި ތިބި އެމެރިކާ ރައްޔިތުން ރައްކާތެރިކަމުގެ ފިޔަވަޅެއްގެ ގޮތުން ގޭގައި މަޑުކުރުމަށް (ޝެލްޓަރ އިން ޕްލޭސް) ދީފައިވާ އިރުޝާދު ދަމަހައްޓާފައިވާ ކަމަށާއި، ސައުދީގައި ތިބި އެމެރިކާގެ ހުރިހާ ރައްޔިތުން ވެސް ރައްކާތެރި ތަންތަނުގައި މަޑުކުރުމަށް އިލްތިމާސްކުރާ ކަމަށް އެމްބަސީން ބުންޏެވެ. މީގެ އިތުރުން، އެމްބަސީއަށް ހަމަލާއެއް ދީފައިވާތީ، ވަކި ގޮތެއް އަންގަންދެން އެ ސަރަޙައްދަށް ނުދިއުމަށާއި، އެ ސަރަޙައްދުގައި ހުރި އަސްކަރީ މަރުކަޒުތަކަށް ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް ވެސް ވަނީ އަންގާފައެވެ.
