ސަލީމް ވިދާޅުވެ ދެއްވީ ދޫންޏަށް ވޯޓު ނުދީ، ތިލަފަތަށް ވޯޓު ދޭން ޖެހޭ ސަބަބުތައް
ކުރިއަށް އޮތް އިންތިޚާބުތަކުގައި އެމްޑީޕީ ނޫން ފިކުރަކަށް ވޯޓު ދީގެން ރައްޔިތުންނަށް ކުރެވުނު ތަޖުރިބާ ހިތްދަތި ކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އަޙުމަދު ސަލީމް ވިދާޅުވި. އަދި ލާމަރުކަޒީ ނިޒާމަށް ވަކާލާތުކޮށް ބާރުތައް ދޫކޮށްލުމުގެ ހިތްވަރު ހުރީ ހަމައެކަނި އެމްޑީޕީގައި ކަމަށާއި، ޕީއެންސީގެ ވިސްނުމަކީ ބާރުތައް މަރުކަޒުކުރުން ކަމަށް އޭނާ ފާހަގަކުރެއްވި.
ހޯރަފުށީ ދާއިރާގެ ކުރީގެ މެމްބަރު އަދި މަޖިލީހުގެ ކުރީގެ ނައިބު ރައީސް އަހުމަދު ސަލީމް | ރާއްޖެ އެމްވީ
ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީ އަދި ފެންނަ ނުފެންނަ ވޯޓުގައި ހެޔޮ ނަތީޖާ އެއް ބޭނުންވާ ނަމަ ތިލަފަތަށް ވޯޓު ދިނުން ނޫން ގޮތެއް ނެތް ކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އަޙުމަދު ސަލީމް (ސައްލެ) ވިދާޅުވެއްޖެ އެވެ.
އެމްޑީޕީ ހަރުގެ ޖަލްސާގައި ހޯމަ ދުވަހުގެ ރޭ ވާހަކަދައްކަވަމުން ސަލީމް ވިދާޅުވީ މި ދަނޑިވަޅަކީ ވަރަށް ހައްސާސް ދަނޑިވަޅެއް ކަމަށެވެ. ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީ އިންތިޚާބު އަދި ފެންނަ ނުފެންނަ ވޯޓަކީ ވެސް މުހިންމު އިންތިޚާބުތަކެއްކަން ސަލީމް ވަނީ ފާހަގަކުރައްވާފަ އެވެ. އެ އިންތިޚާބުގައި ޕީއެންސީ އިން އެ ޕާޓީގެ ނިޝާން، ދޫންޏަށް ވޯޓުލާން އެދެމުންދާ އިރު އެމްޑީޕީ އިން ދަނީ ތިލަފަތަށް ވޯޓުދިނުމަށް އެދެމުންނެވެ.
ހޯމަ ދުވަހުގެ ރޭގެ ޖަލްސާގައި ސަލީމް ވަނީ ދޫންޏަށް ވޯޓު ނުދީ، ތިލަފަތަށް ވޯޓު ދޭން ޖެހޭ ސަބަބުތައް ހާމަކޮށްދެއްވާފަ އެވެ. އެގޮތުން އެ އިންތިޚާބުގައި އެމްޑީޕީ އަށް ނުވަތަ ތިލަފަތަށް ވޯޓުލުން ނޫން ގޮތެއް ރައްޔިތުންނަށް ނެތް ކަަމަށާއި، އެ ނޫން ގޮތަކަށް ވޯޓުލައިގެން ރައްޔިތުން ކުރި ތަޖުރިބާ ރަނގަޅު ނޫން ކަަމަށް ވެސް އޭނާ ވަނީ ވިދާޅުވެފަ އެވެ. ސަލީމް ވަނީ ޕީއެންސީ އިން ދޫންޏަށް ވޯޓުލުމަށް އެދެމުން ދާއިރު ފާއިތުވެ ދިޔަ ދެ އަހަރު ބަޔަށް ނަޒަރު ހިންގާލުމުން ދޫނީގެ އުޅުމާއި ގުޅުން ތަޖުރިބާ ކުރެވިފައިވާ ކަމަށް ވިދާޅުވެފަ އެވެ. އެ ތަޖުރިބާ އަކީ އެހާ ރަނގަޅު ތަޖުރިބާ އެއް ނޫން ކަމަށް ސަލީމް ވިދާޅުވި އެވެ.
ބައެއް ބާވަތުގެ ދޫންޏަކީ އޭގެ އަހުލާގު ހުންނަ ގޮތުން އިންސާނުންނާއި އެކުގައި އުޅެން އެހާ ފަސޭހަ އެއްޗެއް ނޫންކަން ދިރާސާތަކުން ވެސް ހާމަވާ ކަމަށް ސަލީމް ވިދާޅުވި އެވެ.
"ދޫނީގެ ވާހަކަ ދައްކާފައި ވޯޓުލާން އެހީމަ ހަނދާނަށް އަންނަނީ ކުރީގެ ހާދިސާތައް. ވަޅު ދާ މަތީގައި ބާއްވާފައިދާ ސައިބޯނި ބުރި އޮންނަ ވަރެއް ނުވޭ ދޫންޏަކާއި ހެދި. އެ ވެސް ދޫންޏެއްގެ އުޅުން ހުރި ގޮތާއި ހެދި. އެ ވެސް ދޫންޏެއްގެ އަހުލާގު ހުރި ގޮތް. ބަދިގޭގައި ރޮށިފަޅި އެއް ނުބޭއްވޭ ދޫންޏާއި ހެދި." ސަލީމް ވިދާޅުވި އެވެ.
ސަލީމް ވަނީ ލާމަރުކަޒީ ނިޒާމަށް ވަކާލާތުކުރާ ހަމައެކަނި ޕާޓީ އަކީ އެމްޑީޕީ ކަމަށާއި އެމްޑީޕީ ނޫން ފިކުރުގެ މީހުން ވަކާލާތު ކުރަނީ މަރުކަޒީ ވިސްނުމަށް ކަމަށް ސަލީމް ވިދާޅުވި އެވެ. ޔުނިޓަރީ ދައުލަތެއްގެ ވާހަކަ ދައްކައިގެން ލާމަރުކަޒީ ނިޒާމާއި ދެކޮޅު ހެދުމަކީ އެއީ ޕީއެންސީ ފިކުރުގެ ސިފަ އެއް ކަމަށް ސަލީމް ވިދާޅުވި އެވެ. ބާރުތައް ދޫކޮށްލުމުގެ ހިތްވަރު ހުރި ޕާޓީ އަކީ އެމްޑީޕީ ކަމަށް އޭނާ ވިދާޅުވި އެވެ.
އެމްޑީޕީ ނޫން ވެރިކަމެއްގައި އެންމެން ޝާމިލްވާ ގޮތަށް އެކުލަވާލެވުނު ސިޔާސަތެއް ނެތް ކަމަށް ފާހަގަކުރައްވާ ސަލީމް ވަނީ އެމްޑީޕީ އަށް ވޯޓުދީގެން އާއްމުންނަށް ގެއްލުމެއް ނުވާނެ ކަމަށް ވިދާޅުވެފަ އެވެ.
