އީރާނުން އެމެރިކާގެ ހަނގުރާމަތީ މަނަވަރު އަބްރަހަމް ލިންކަން އަށް މިސައިލް ހަމަލާދީފި

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އެމެރިކާގެ މަތިންދާބޯޓު އުފުލާ މަނަވަރު، ޔޫއެސްއެސް އަބްރަހަމް ލިންކަންއަށް އަމާޒުކޮށް ހަތަރު ބެލިސްޓިކް މިސައިލް ފޮނުވާލައިފިއެވެ.

އިޒްރޭލާއި އެމެރިކާއިން ހޮނިހިރު ދުވަހު އީރާނަށް ދިން އުދުވާނީ ހަމަލާތަކާ ގުޅިގެން ވަގުތުން ފެށި "އޮޕަރޭޝަން ޓްރޫ ޕްރޮމިސް 4" އާ ގުޅޭގޮތުން އައިއާރުޖީސީގެ ޕަބްލިކް ރިލޭޝަންސް އޮފީހުން އާދިއްތަ ދުވަހު ނެރުނު ހަތްވަނަ ބަޔާނުގައި ބުނެފައިވަނީ، މި ހަމަލާއަކީ އެމެރިކާއާއި އިޒްރޭލުގެ އަމާޒުތަކަށް ދެމުންދާ ހަމަލާތަކުގެ ތެރެއިން ދިން ހަމަލާއެއް ކަމަށެވެ.

އެ ބަޔާނުގައިވާ ގޮތުން، އެމެރިކާގެ މަތިންދާބޯޓު އުފުލާ މަނަވަރު ޔޫއެސްއެސް އަބްރަހަމް ލިންކަންއަށް އަމާޒުކޮށް ފޮނުވާލި ހަތަރު ބެލިސްޓިކް މިސައިލްވެސް ވަނީ ކާމިޔާބުކަމާއެކު އެ މަނަވަރަށް އަރާފައެވެ.

އައިއާރުޖީސީން އިތުރަށް ބުނި ގޮތުގައި އީރާނުގެ ހަތިޔާރު އެޅި ސިފައިން މިހާރު މިވަނީ ހަނގުރާމައިގެ އާ މަރުހަލާއަކަށް ވަދެފައެވެ. އަދި އީރާނަށް ހަމަލާދޭ ފަރާތްތަކަށް އެ ގައުމުގެ ބިމާއި ކަނޑުގެ ސަރަހައްދު ވެގެންދާނީ "ގަބުރުސްތާނަކަށް" ކަމަށް ބުނެ އެ އިދާރާއިން ވަނީ އިންޒާރު ދީފައެވެ.

މި އޮޕަރޭޝަނާ ގުޅޭ އިތުރު ތަފްސީލުތައް ފަހުން ހާމަކުރާނެ ކަމަށްވެސް އެ ބަޔާނުގައި ބުނެފައިވެއެވެ.

މެދުއިރުމަތީގައި އެމެރިކާގެ އަސްކަރީ ބާރުގަދަކުރުމަށް ފޮނުވާފައިވާ މި މަނަވަރަށް ހަމަލާދީފައިވަނީ، އެމެރިކާއާއި އިޒްރޭލު ގުޅިގެން އީރާނާ ދެކޮޅަށް ފެށި އުދުވާނީ ހަނގުރާމައިގެ ދެވަނަ ދުވަހުއެވެ.

އީރާނުގެ ހަތިޔާރު އެޅި ސިފައިން ވަނީ އެ ގައުމަށް ދެމުންދާ ހަމަލާތަކަށް ވަގުތުން ރައްދުދޭން ފަށާފައެވެ. އެގޮތުން އިޒްރޭލުން ހިފާފައިވާ ފަލަސްތީނުގެ ބިންތަކަށާއި، މުޅި ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ގިނަ އަދަދެއްގެ މިސައިލާއި ޑްރޯން ހަމަލާތައް ދަނީ ދެމުންނެވެ.

އީރާނާ ދެކޮޅަށް ދޭ އެއްވެސް ހަމަލާއެއްގައި ޕާޝިއަން ގަލްފްގެ ގައުމުތަކުގެ ބިން ބޭނުންކުރުމުގެ ފުރުސަތު ނުދިނުމަށް އީރާނުން މީގެ ކުރިން ވަނީ އެ ގައުމުތަކަށް އިންޒާރު ދީފައެވެ.

އީރާނުގެ ރެޑް ކްރެސެންޓް ސޮސައިޓީން މައުލޫމާތު ދޭ ގޮތުގައި، ދުޝްމަނުންގެ ހަމަލާތަކުގައި މިހާތަނަށް 200 އަށްވުރެ ގިނަ މީހުން އީރާނުން ވަނީ މަރުވެފައެވެ. މީގެ ތެރޭގައި އީރާނުގެ ދެކުނު ހޮރްމުޒްގާން ޕްރޮވިންސްގެ ޕްރައިމަރީ ސްކޫލަކަށް ދިން ހަމަލާގައި މަރުވި 100 އަށްވުރެ ގިނަ ކުޑަކުދިން ހިމެނެއެވެ.