ޚާމަނާއީ އަވަހާރަ ވުމުގެ ހިތާމައިގައި ދިވެހި ދިދަ ބައި ދަނޑި އަށް ތިރި ނުކުރައްވާ، ރައީސް އެކަން ޖެއްސެވީ އަރަބި އިސްލާމީ ޤައުމު ތަކުގެ ބޮލަށް
އެ ސުވާލު ކުރުމުން ރައީސް މުޢިއްޒު ވިދާޅުވީ، ޢަރަބި އިސްލާމީ ޤައުމުތައް އޮންނަނީ އެއް ބްލޮކެއްގައި ކަމަށާއި، ރާއްޖެ އިން ވެސް އޮންނާނީ އެގޮތަށް ކަމަށް. އެ ސުވާލަށް ރައީސް ސާފުކޮށް ޖަވާބެއް ނުދެއްވާތީ، އެ ޖަވާބުން ދޭހަވަނީ ޢަރަބި އިސްލާމީ ޤައުމު ތަކުން އަންގައިގެން ދިދަ ބައި ދަނޑި އަށް ތިރި ނުކުރާ ކަމަށް.
ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް މުޢިއްޒު | ރައީސް އޮފީސް
އެމެރިކާ އިން ދިން ހަމަލާއެއްގައި އީރާންގެ ރޫހާނީ ލީޑަރު އާޔަތުﷲ އަލީ ޚާމަނާާއީ އަވަހާރަ ވެފައިވާއިރު، އެކަމުގެ ހިތާމައިގައި ރާއްޖޭގެ ޤައުމީ ދިދަ ބައި ދަނޑި އަށް ތިރި ނުކުރައްވައި، އެކަން ޢަރަބި އިސްލާމީ ޤައުމު ތަކުގެ ބޮލަށް ޖައްސަވައިފި އެވެ.
ހޮނިހިރު ދުވަހު އެމެރިކާގެ ހަމަލާ ތަކުގަައި ޚާމާނައީ އަވަހާރަވެފައިވާއިރު، އެކަމުގެ ހިތާމައިގައި ރާއްޖެ އިން ބައި ދަނޑި އަށް ދިދަ ތިރި ކޮށްފައި ނުވެ އެވެ. އެހެން ނަމަވެސް، އިސްލާމީ ޤައުމުތަކާއި، އިސްލާމް ނޫން ޤައުމު ތަކުގެ ލީޑަރުންނާއި ވެރިން އަވަހާރަވުމުން ވެސް، ރާއްޖެ އިން އާންމު ގޮތެއްގައި ބައި ދަނޑި އަށް ދިދަ ތިރި ކުރެ އެވެ.
ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި އެ ސުވާލު ކުރުމުން ރައީސް މުޢިއްޒު ވިދާޅުވީ، ޢަރަބި އިސްލާމީ ޤައުމުތައް އޮންނަނީ އެއް ބްލޮކެއްގައި ކަމަށާއި، ރާއްޖެ އިން ވެސް އޮންނާނީ އެގޮތަށް ކަމަށެވެ. އެ ސުވާލަށް ރައީސް ސާފުކޮށް ޖަވާބެއް ނުދެއްވާތީ، އެ ޖަވާބުން ދޭހަވަނީ ޢަރަބި އިސްލާމީ ޤައުމު ތަކުން އަންގައިގެން ދިދަ ބައި ދަނޑި އަށް ތިރި ނުކުރާ ކަމަށެވެ.
އަޅުގަނޑު ދެންނެވީ އަރަބި އިސްލާމީ ޤައުމުތަކާ އެކީގައޭ މި ސަރުކާރުން މަސައްކަތް ކުރަމުން ދާނީ. އަރަބި އިސްލާމީ ޤައުމުތައް އެއް ބްލޮކެއްގައި، އެއް ޔުނިޓެއްގެ ގޮތުގައި މިކަމުގައި މަސައްކަތް ކުރާނީ. އެހެންވީމާ އެ ޔުނިޓީ އަޅުގަނޑުމެން ހިފަހައްޓާނަން.ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު
ރާއްޖެއާ ސިޔާސީ ގޮތުން ގުޅިފައިވާ ބޭރު ޤައުމު ތަކުގެ ވެރިޔަކު އަވަހާރަ ވުމުގެ ހިތާމައިގައި ދިވެހި ޤައުމީ ދިދަ ބައި ދަނޑި އަށް ތިރި ކުރުމާއި، ހިތާމަ ފާޅު ކުރުމުގެ އުސޫލުގައި ވެސް އެކަން ބަޔާން ކޮށްފައި އެބަ އޮތެވެ. އެ އުސޫލުގެ ދެ ވަނަ މާއްދާގައި ބުނެފައި ވަނީ، އިސްލާމީ ޤައުމެއްގެ ނުވަތަ، ސާކްގެ ޤައުމެއްގެ ސަރުުކާރު ހިންގަވާ ވެރިޔާ (ބޮޑު ވަޒީރު ނުވަތަ އެފަދަ މަގާމެއްގައި ހުންނެވި ބޭފުޅަކު) އަވަހާރަވެއްޖެ ނަމަ، ތިން ދުވަސް ވަންދެން ދިވެހި ޤައުމީ ދިދަ ބަަައި ދަނޑި އަށް ތިރި ކުރަން ވާނެ ކަމަށެވެ.
އީރާންގެ ރޫހާނީ ލީޑަރު ޚާމަނާއީ އަވަހާރަ ކޮށްލި މައްސަލަ އާއި، އެކަމުގެ ހިތާމައިގައި ދިވެހި ދިދަ ބައި ދަނޑި އަށް ތިރި ކުރަން ސަރުކާރުން ނުނިންމާތީ އާންމުން ވެސް އަންނަނީ އެކަމުގެ ކަންބޮޑުވުން ފާޅު ކޮށްފަ އެވެ. މީގެ ކުރިން ރާއްޖޭގައި އޮތް ސަރުކާރުތަކުގައި އީރާނުގެ އެންމެ މަތީ ވެރިން އަވަހާރަ ވުމުން ރާއްޖެ އިން ވަނީ އެކަމުގެ ހިތާމައިގައި ބައިވެރިވެ، ދިވެހި ގައުމީ ދިދަ ބައިދަނޑިއަށް ތިރި ކޮށްފަ އެވެ.
