އިރާގުގައި ހުރި އެމެރިކާގެ އެމްބަސީ އަށް ވަދެގަންނަން އެތައް ސަތޭކަ ބަޔަކު މަސައްކަތް ކޮށްފި
އީރާނަށް ތާއީދުކުރާ ހަތިޔާރު އެޅި ޖަމާއަތްތަކުން އިރާގުގައި ހުންނަ އެމެރިކާގެ އެމްބަސީ އަށް ވަދެގަންނަން މަސައްކަތް ކޮށްފި. މި ހަމަލާތަކާ ގުޅިގެން ބަޣުދާދުގެ ގްރީން ޒޯނަށް ވަދެގަތުމަށް އާންމުން މަސައްކަތް ކުރަމުންދާއިރު، އުރުބީލް އެއާޕޯޓް ކައިރީގައި ހުންނަ ކޯލިޝަން ސިފައިންގެ މަރުކަޒަށް ވެސް ވަނީ ޑްރޯން ހަމަލާތަކެއް ދީފައި. ސަލާމަތީ ބާރުތަކުން ކަރުނަގޭސް ބޭނުންކޮށްގެން މުޒާހަރާގެ ބައިވެރިން ކޮންޓްރޯލް ކުރަމުންދާއިރު، މަސްރަހު ވަނީ ވަރަށް ބޮޑަށް ނުތަނަވަސްވެފައި.
އީރާނުގެ ރޫހާނީ ލީޑަރު އަލީ ޚާމަނާއީ އަވަހާރަކޮށްލުމާ ގުޅިގެން، އިރާގުގެ ބަޣުދާދުގައި ހުންނަ ގްރީން ޒޯންގެ ދޮރާށި ކައިރިއަށް މުޒާހަރާގެ ބައިވެރިން އެއްވެ، އެމެރިކާ އެމްބަސީއާ ދިމާލަށް މިސްރާބު ޖެހުމުން ސަލާމަތީ ބާރުތަކުން އެ ސަރަހައްދު ބަލަހައްޓަނީ - 2026 މާރިޗު 1، 2026. | ރޮއިޓާސް
އީރާނުގެ ރޫހާނީ ލީޑަރު އަލީ ޚާމަނާއީ އަވަހާރަވުމާ ގުޅިގެން، އެމެރިކާގެ އެމްބަސީ ހުންނަ އިރާގުގެ ބަޣުދާދުގެ ގްރީން ޒޯނަށް ވަދެގަތުމަށް އެތައް ސަތޭކަ އިރާގު ރައްޔިތުންނެއް އާދީއްތަ ދުވަހު މަސައްކަތް ކޮށްފި ކަމަށް އޭއެފްޕީގެ ނޫސްވެރިން ރިޕޯޓުކޮށްފިއެވެ.
ސަލާމަތީ ބާރުތަކުގެ މަސްދަރަކުން އޭއެފްޕީއަށް މައުލޫމާތު ދެމުން ބުނީ، މުޒާހަރާގެ ބައިވެރިން ގްރީން ޒޯނަށް ވަނުމަށް ކުރި މަސައްކަތްތައް މިހާތަނަށް ނާކާމިޔާބު ކޮށްލެވިފައިވީ ނަމަވެސް، އެމީހުން އަދިވެސް ދަނީ އެ ސަރަހައްދަށް ވަނުމަށް ތަކުރާރުކޮށް މަސައްކަތް ކުރަމުން ކަމަށެވެ.
އޭއެފްޕީގެ ނޫސްވެރިޔާ ބުނި ގޮތުގައި، އީރާނަށް ތާއީދުކުރާ ހަތިޔާރު އެޅި ޖަމާއަތްތަކުގެ ދިދަ ހިފައިގެން ތިބި މުޒާހަރާގެ ބައިވެރިން ވަނީ ސަލާމަތީ ބާރުތަކާ ދިމާލަށް އޮއްގާ އުކާފައެވެ. އަދި މުޒާހަރާގެ ބައިވެރިން ކޮންޓްރޯލް ކުރުމަށްޓަކައި ސަލާމަތީ ބާރުތަކުން ވަނީ ކަރުނަގޭސް ބޭނުންކޮށްފައެވެ.
އިރާގުގެ ދެކުނުގެ އެހެން ޕްރޮވިންސްތަކުގައި ވެސް މިފަދަ މުޒާހަރާތައް ކުރިއަށްދާ ކަމަށް އެ ގައުމުގެ މީޑިއާތަކުން ވަނީ ރިޕޯޓުކޮށްފައެވެ.
އީރާނުގެ މަދަދުލިބޭ އިރާގުގެ ހަތިޔާރު އެޅި ބައެއް ޖަމާއަތްތަކުން ހޮނިހިރު ދުވަހު ބުނެފައިވަނީ، މި މައްސަލައިގައި އެ ޖަމާއަތްތަކުން "ވަކި ފަރާތަކަށް ނުޖެހި" މަޑުން ނުތިބޭނެ ކަމަށާއި، އިސްލާމީ ޖުމްހޫރިއްޔާ (އީރާން) ދިފާއުކުރާނެ ކަމަށެވެ.
އިރާގުގެ ދެކުނުގެ ސަރަހައްދުތަކަށް ދިން ވައިގެ ހަމަލާތަކެއްގައި ހިޒްބުالله ޖަމާއަތުގެ ދެ ހަނގުރާމަވެރިއަކު މަރުވުމާ ގުޅިގެން، އެމެރިކާގެ އަސްކަރީ މަރުކަޒުތަކަށް ހަމަލާދޭނެ ކަމަށް ނުފޫޒުގަދަ އެ ޖަމާއަތުން ވަނީ ބުނެފައެވެ.
އާދީއްތަ ދުވަހުގެ ފަތިހުގެ ވަގުތެއްގައި، އިރާގުގެ ކުރުދިސްތާން ސަރަހައްދުގައި އެމެރިކާ އިސްވެ އޮންނަ ކޯލިޝަން ސިފައިން ތިބޭ އުރުބީލް އެއާޕޯޓް ކައިރިން ބާރުގަދަ ގޮވުންތަކެއްގެ އަޑު އިވިފައިވާ ކަމަށް އޭއެފްޕީގެ ނޫސްވެރިޔާ ރިޕޯޓުކޮށްފައިވެއެވެ.
މީގެ އިތުރުން، އެއާޕޯޓް ހިމެނޭ ސަރަހައްދުން ކަޅު ދުންތަކެއް އަރަމުންދާ މަންޒަރު ފެނިފައިވާ ކަމަށް ވެސް އޭނާ ރިޕޯޓުކުރިއެވެ.
މި ހާދިސާ ހިނގިތާ މާގިނަ އިރުތަކެއް ނުވަނީސް، އީރާނަށް ތާއީދުކުރާ ކުޑަ ޖަމާއަތަކުން ވަނީ އުރުބީލްގައި ތިބި އެމެރިކާ ސިފައިންނަށް އަމާޒުކޮށް ޑްރޯން ހަމަލާތަކެއް ދީފައިވާ ކަމަށް ބުނެ އެކަމުގެ ޒިންމާ އުފުލާފައެވެ.
ހޮނިހިރު ދުވަހު ވެސް އުރުބީލްގެ މަތިން ދަތުރުކުރި ބައެއް މިސައިލްތަކާއި ގޮވާތަކެތި ހަރުކޮށްފައިވާ ޑްރޯންތަކެއް، އެމެރިކާ އިސްވެ އޮންނަ ކޯލިޝަން ބާރުތަކުން ވައްޓާލާފައިވާ ކަމަށް އެ ސަރަހައްދުގެ ކަމާބެހޭ އިދާރާތަކުން ވަނީ ބުނެފައެވެ.
މަސްދަރު: އޭއެފްޕީ
