އިރާނާ ދެކޮޅަށް ކުރަމުންދާ ހަނގުރާމައިގައި އެމެރިކާގެ ތިން ސިފައިން މަރުވެއްޖެ، ސިފައިންގެ ފަސް މީހަކު ސީރިއަސް ކޮށް ޒަޚަމްވެއްޖެ

އީރާނާ ދެކޮޅަށް ކުރަމުންދާ ހަނގުރާމައިގައި އެމެރިކާ ސިފައިންގެ ތިން މީހަކު މަރުވެ، ފަސް މީހަކު ސީރިއަސްކޮށް ޒަޚަމްވެފައިވާކަން އެމެރިކާގެ އަސްކަރިއްޔާއިން ކަށަވަރުކޮށްދީފިއެވެ. މިއީ މި ކުރިމަތިލުންތަކުގައި އެމެރިކާ ސިފައިންގެ ބަޔަކު މަރުވި ނުވަތަ ޒަޚަމްވިކަން އެ ގައުމުން ހާމަކުރި ފުރަތަމަ ފަހަރެވެ.

އީރާނަށް އަމާޒުކޮށް އެމެރިކާއިން އިއްޔެ ވަރުގަދަ ހަމަލާތަކެއް ދީ، އެ ގައުމުގެ އެންމެ މަތީ ލީޑަރު އަވަހާރަކޮށްލާފައިވާއިރު، މިއަދުވެސް އެމެރިކާއިން ދަނީ މެދުކެނޑުމެއް ނެތި ހަމަލާތައް ދެމުންނެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ނެރުނު ބަޔާނެއްގައި ބުނެފައިވަނީ، "އޮޕަރޭޝަން އެޕިކް ފިއުރީ" ގެ ދަށުން ހިންގި ހަރަކާތްތަކުގައި އެމެރިކާ ސިފައިންގެ ތިން މީހަކު މަރުވެ، ފަސް މީހަކު ސީރިއަސްކޮށް ޒަޚަމްވެފައިވާ ކަމަށެވެ. މީގެ އިތުރުން ބައެއް ސިފައިންނަށް ކުދިކުދި އަނިޔާތައް ލިބިފައިވީ ނަމަވެސް، ފަރުވާއަށްފަހު އެ މީހުން އަލުން ޚިދުމަތަށް ނުކުތުމުގެ މަސައްކަތް ކުރަމުންދާ ކަމަށް އެ ބަޔާނުގައިވެއެވެ.

ސެންޓްކޮމްގެ ބަޔާނުގައި އިތުރަށް ބުނެފައިވަނީ، މައިގަނޑު އަސްކަރީ އޮޕަރޭޝަންތައް އަދިވެސް ކުރިއަށްދާ ކަމަށާއި، މަސްރަހު ބަދަލުވަމުންދާ ގޮތުންނާއި އާއިލާތަކަށް އިހުތިރާމް ކުރުމުގެ ގޮތުން، މަރުވި ސިފައިންގެ ވަނަވަރު ހާމަކުރާނީ އެ މީހުންގެ އާއިލާތަކަށް އެކަން އެންގުމަށްފަހު 24 ގަޑިއިރު ހަމަވުމުން ކަމަށެވެ.

އެމެރިކާގެ ވައިގެ އަދި ކަނޑުގެ ސިފައިން އިޒްރޭލުގެ ފައުޖުތަކާ ގުޅިގެން އީރާނަށް ވަރުގަދަ ހަމަލާތަކެއް ދެމުންދާއިރު، ރައީސް ޑޮނަލްޑް ޓްރަމްޕް ވިދާޅުވީ މި ހަމަލާތަކުގެ މަގްސަދަކީ އީރާނުގެ އަސްކަރީ ގާބިލްކަން މުޅިން ދުއްވާލުން ކަމަށެވެ.

މި ހަމަލާތަކުގެ ރައްދުގައި އީރާނުން ވަނީ އިޒްރޭލުގެ އެކި ސަރަހައްދުތަކަށާއި، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް މިސައިލް ހަމަލާތަކެއް ދީފައެވެ.

މިއަދުގެ ކުރީކޮޅު އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނެފައިވަނީ، ފާރިސް ކަނޑުއޮޅީގައި އޮތް އެމެރިކާގެ މަތިންދާބޯޓު އުފުލާ މަނަވަރު "ޔޫއެސްއެސް އަބްރަހަމް ލިންކަން" އަށް ހަތަރު ބެލިސްޓިކް މިސައިލް ކާމިޔާބުކަމާއެކު ފޮނުވާލާފައިވާ ކަމަށެވެ.

ނަމަވެސް، އެމެރިކާގެ ސެންޓްކޮމް އިން ވަނީ އީރާނުގެ މި ވާހަކަތައް ދޮގުކޮށް، އެ މަނަވަރަށް އެއްވެސް ހަމަލާއެއް އަރާފައި ނުވާކަމަށް ބުނެފައެވެ.

ސެންޓްކޮމްގެ ބަޔާނުގައި ބުނެފައިވަނީ، އީރާނުން ފޮނުވާލި މިސައިލްތައް މަނަވަރާ ގާތްވެސް ނުވާ ކަމަށާއި، އީރާނުގެ ނުރައްކާތަކުން އެމެރިކާގެ ރައްޔިތުން ސަލާމަތްކުރުމަށް ސެންޓްކޮމްއިން ހިންގާ އޮޕަރޭޝަންތަކުގައި "އަބްރަހަމް ލިންކަން" މަނަވަރުން އަދިވެސް މަތިންދާބޯޓުތައް އުދުއްސަމުންދާ ކަމަށެވެ.