އީރާނުން އިޒްރޭލަށް ދިން ނުރައްކާތެރި ހަމަލާ އެއް ގައި މަދުވެގެން އަށް މީހުން މަރުވެއްޖެ، އެތައް ބަޔަކު ޒަޚަމްވެއްޖެ

އިޒްރޭލުގެ ބައިތު ޝެމޭޝް ސިޓީއަށް އާދީއްތަ ދުވަހު އީރާނުން ދިން މިސައިލް ހަމަލާތަކުގައި މަރުވި މީހުންގެ އަދަދު މަދުވެގެން އަށަކަށް އަރާފައިވާ ކަމަށް އެ ގައުމުގެ ކަމާބެހޭ ފަރާތްތަކުން ބުނެފިއެވެ. މިއީ މިހާރު ކުރިއަށްދާ ހަނގުރާމަ ފެށުނު ފަހުން އިޒްރޭލަށް ދިން އެންމެ ނުރައްކާތެރި އަދި އެންމެ ގިނަ ބަޔަކު މަރުވި ހަމަލާއެވެ.

އިޒްރޭލުގެ ކުއްލި ހާލަތްތަކުގައި ހަރަކާތްތެރިވާ މޭގަން ޑޭވިޑް އެޑަމް (އެމް.ޑީ.އޭ) އިން ބުނި ގޮތުގައި، ބައިތު ޝަމްސް ސަރަހައްދަށް ދިން މި ހަމަލާގައި އަށް މީހަކު މަރުވެފައިވާކަން އެ އިދާރާގެ ޕެރާމެޑިކުން ވަނީ ކަށަވަރުކޮށްދީފައެވެ. މީގެ އިތުރުން މި ހަމަލާގައި 28 މީހަކަށް އެކިވަރުގެ އަނިޔާތައް ލިބިފައިވާއިރު، ފުލުހުން ބުނީ މިސައިލް ސީދާ އަމާޒުވީ އެ ސިޓީގެ އިމާރާތަކަށް ކަމަށެވެ.

މިސައިލް ވެއްޓުނު ސަރަހައްދުގައި އިޒްރޭލުގެ އެތައް ބަޔަކު ސަލާމަތްކުރުމުގެ މަސައްކަތުގައި ހަރަކާތްތެރިވަމުންދާއިރު، އޭ.އެފް.ޕީގެ ފޮޓޯގްރާފަރަކަށް ވަނީ މިސައިލް އެންމެ ބޮޑަށް އަމާޒުވި އިމާރާތުގެ ތެރެއިން މީހެއްގެ ހަށިގަނޑު ނެރެނިކޮށް ފެނިފައެވެ.

ހަމަލާދިން ސަރަހައްދުގައި ހުރި އޭ.އެފް.ޕީގެ އެހެން ފޮޓޯގްރާފަރަކު ބުނި ގޮތުގައި، އިމާރާތުގެ ދަށުގައި ތާށިވެފައި ތިބި މީހުން ހޯދުމަށްޓަކައި އެކި ބާވަތުގެ ސާމާނުތައް އެ ސަރަހައްދަށް ދަނީ ގެންނަމުންނެވެ.

ސަލާމަތްކުރާ ޓީމުތަކުން މީހުން ހޯދުމުގެ މަސައްކަތް ކުރިއަށް ގެންދަނިކޮށް އޭނާ އިތުރަށް ބުނީ، ބެލެވޭ ގޮތުގައި އިމާރާތުގެ ފުނޑުވެފައިވާ ބައިތަކުގެ ދަށުގައި އަދިވެސް ބަޔަކު ތާށިވެފައި އެބަތިއްބެވެ.

އެ ސަރަހައްދުން ލިބިފައިވާ ފޮޓޯތަކުން ފެންނަ ގޮތުގައި، ބާރުގަދަ ގޮވުމުގެ ސަބަބުން އެ އިމާރާތް ވަނީ މުޅިން ސުންނާފަތިވެފައެވެ. އަދި އިމާރާތުގެ ފުރާޅު ވަނީ ކޮންކްރީޓާއި ދަގަނޑުތަކާއެކު ފުނޑުފުނޑުވެފައެވެ.

ސަލާމަތްކުރާ ޓީމުތަކުން އަދިވެސް ދަނީ އިމާރާތުގެ ދަށުގައި ދިރިތިބި ބަޔަކު ތިބިތޯ ބަލައި ހޯދުމުގެ މަސައްކަތް ހުއްޓުމެއް ނެތި ކުރަމުންނެވެ.

އެމް.ޑީ.އޭގެ ޕެރާމެޑިކެއް ކަމަށްވާ ޔެހޫދާ ޝްލޯމޯ ނެރުނު ބަޔާނެއްގައި ބުނީ، އޭނާއަށް އެ ސަރަހައްދަށް ދެވުނުއިރު ފެނުނީ ވަރަށް ބިރުވެރި މަންޒަރެއް ކަމަށެވެ.

އޭނާ އިތުރަށް ބުނި ގޮތުގައި، އިމާރާތްތަކަށް ބޮޑެތި ގެއްލުންތަކެއް ލިބި، މުޅި ސަރަހައްދުގައި ދުންބޯވެފައި އޮތްއިރު، ފެނިގެންދިޔައީ ވަރަށް ބޮޑު ހާސްކަމެކެވެ. އަދި ގެއްލުން ލިބުނު އިމާރާތްތަކުން ބިރުގަނެފައި ތިބި އެތައް ބަޔަކު ނުކުންނަމުންދިޔަ މަންޒަރު ފެނުނު ކަމަށްވެސް އޭނާ ބުންޏެވެ.